Ạsuor 144 - Ạḍinya Iigbia

Ọdaam mọ ạseph Ẹnaan loor esi ọkpar opu

¹ Boom Ọmoogh-we phọ, eekpereghian ạmi! Ọdi ụtughemi ịmi ịlo elephiri kụ ụkparami ịmi ịlo ẹgham.

² Ọdi kụ eekpereghian ạmi rꞌọsuaram ạmi, aḍibuo ạmi, oghophaam arisigh ạmi rꞌuba ạmi, esi ọdi kụ ẹdi mị aḍuom ologhi pẹleeny. Ọdi abinighiom reelhe dị edi eeḍian ạmi.

³ Ọmoogh-we, oye phọ eeghe ịyaar dị nạ ạmanami bọ mạar, oopho phọ oye dị nạ rạnaghanan ghan bọ!

⁴ Ọdi ạkigh ookuugh; ariiḍio ọdi ẹkigh oogho dị ratelhe.

⁵ Ọmoogh-we, kughuron okuaḍio phọ aru asoor; ḅọgh rạaḅaraph phọ bịn bịdi kemiteghom ni mụghi.

⁶ Tom ḍio dị rẹmepheghian ạawalamiom bụmulogh-ḍien ạna; tạḅal ịkpina phọ ạna aḍighi ịdi bịdi kosumughu.

⁷ Ḍụa kꞌạke asoor ude, uḍur ịmi amitiom esi aḍigher, ạḅile ụtagharan ịmi; ụphel ịmi ạsighe rạghaagh aruuruen,

⁸ dị igey rọ́gba ghan kụ rọgba ghan ọkpe mem dị oghunya.

⁹ Mị kạmooraan nyịna ḍimoom ạḍuor, Ẹnaan; mị kati ọne ạmooraan nyịna ḍụor.

¹⁰ Nạ ạngo ọkpar opu rạalha kụ ạtagharan otelhedom ạna, Devid.

¹¹ Ụphel ịmi ạsighe esi ạbumulogh-ḍien ạmi; ụtagharan ịmi esi ịikpo aruuruen dị igey rọ́gba ghan kụ rọgba ghan ọkpe mem dị oghunya.

¹² Eḍighi ịdi alephiri ạnmuny ayoor mem ugheel ạbidi kọkigh ịizupha dị eḍum kụ ẹmoogh ịnyaam. Eḍighi ịdi ạnmanyaan ayoor kọkigh ịma ạroko dị ogimi rụghulukul ọnighemiom ogiga.

¹³ Eḍighi ịdi arukue ayoor eḍien kịrokiro. Eḍighi ịdi ạrutu-ịga phọ ayoor kẹmaraghi sịmuunir.

¹⁴ Eḍighi ịdi ạsinam ayoor kẹmaraghi bịn eghun kẹ́ḍua ḅịle ịyaar képe. Eḍighi ịdi emoghi ẹkaraph ẹmugh kẹ́tol reten ẹmha phọ.

¹⁵ Ọḅaal ologhi kụ odianaan eelhe dị ịphen kụ eru ịdi edi; ọḅaal ologhi kụ odianaan we dị Ẹnaan ạbidi kụ eḍighi Ọmoogh-we phọ.