Ạsuor 141 - Ạḍinya Iigbia

Ịiḅereghi adulhe

¹ Mị atu esi ạna, Ọmoogh-we, ụphel ịmi nyịidipho. Ụnaghanan ịmi mem lọ mị ạmagh nyịna.

² Sịghe ni ịiḅereghi phọ ạmi ịdipho ịnsens eeḅi eḍu; rạghaagh phọ ạmi ophoophe bọ ịdipho ẹkia adulhe.

³ Ọmoogh-we, gborori ịyaar ọnhu ạmi; mẹremi okoriom sịen ọnhu-aḍibuo ịidoronhu phọ ạmi.

⁴ Ụgbole ịmi oḍighi ịlo ị́nighe, rꞌọḅophan ịkaraph awe esi eḍighinom ạbidi. Ịlo ạmi ríḍigh olian ẹyaal rꞌạbidi.

⁵ Ogey oye atue ni ụliom ịmi ạḅile ụḅaam ịmi rꞌọnma ighirigiir; kụ ọlo Ẹnaan kímeera dị mị kạsighe rughuenian esi ịkaraph awe loor esi dị mị agbor rạaḅereghi ghan ọphuenom ẹkaraph eḍighinom mọ ạbidi!

⁶ Mem dị mosiph bụdaam mọ ạbidi otebeeny ude sịphe ạraaḅaraph asighiigh phọ, awe phọ komeeraam ni mọ ikpo ọnhu phọ ạmi igey ni.

⁷ Mụdi ạḍipe dị opol kụ ọoperion, kụ ẹdi ọwalalami ịḅarara ạbidi ọgbal oḍi phọ.

⁸ Kụ ọlo mị ạkpasaghi ni emooph ạmi esi ạna, Ọmoogh-we Ẹnaan ạmi, mị rạwa ghan eekpereghian phọ ạna. Kámeera mị amugh.

⁹ Uukpereghi ịmi esi asiphil phọ bịdi mụkpaminaan bọ ịmi, esi asiphil awe ạsipioghom mọ ạbuphe.

¹⁰ Awe ạsipioghom mọ oḅula omeel siphil phọ ạbidi kụ mị ạḍua sạghaph!