Ạsuor 140 - Ạḍinya Iigbia

Ịiḅereghi ookpereghian

¹ Ụphel ịmi, Ọmoogh-we, ạsighe esi ạbukaraph awe; mạar ụpham ịmi esi awe ofughughuuny.

² Bịdi romite ghan ịkaraph aruuzue; oomo amem rọwa ghan ọruonu.

³ Asinem ạbidi ẹkigh rạkaraph ịyaar; ikpo ọnhu ạbidi ẹkigh ịghor ophugh.

⁴ Ụphel ịmi, Ọmoogh-we, ạsighe esi ịikpo awe ạsipioghom; mạar ụpham ịmi esi awe ofughughuuny dị umitenom ịmi ẹkaraph ezue ịlo olher ạmi.

⁵ Awe ophoophe aloor mụkpaminaan ịmi ḍiphil; bịdi muḍianaan ịmi ịka ạbidi ḅịle sịphe eten phọ ụkpamaghinaan ịmi siphil osiphom ịmi.

⁶ Mị ạḅeni Ọmoogh-we phọ mọ, “Nạ kụ Ẹnaan ạmi.” Nạghanan emoghi ọloghonaan ạḍighaagh phọ ạmi, Ọmoogh-we.

⁷ Ọmoogh-we Ẹnaan ạmi, ọokpara ọpelia ạmi, nạ mụphel ịmi risigh ẹgham.

⁸ Ọmoogh-we, kạ́ngo weye ạsipioghom mọ ịlo bịdi ọwa; kámeera ịkaraph aruuzue phọ ạbidi ẹtuugh emite.

⁹ Kámeera ạbumulogh-ḍien ạmi ọmoogh ọkpar-opu; ḍighi ịdi ịpaaraghan phọ ạbidi esi ạmi keḅula loor ạbidi.

¹⁰ Eḍighi ịdi iiḅu dị rẹda kemeleghuom bịdi! Eḍighi ịdi kosumeeny bịdi ooni kụ kótue opune!

¹¹ Eḍighi ịdi bụphe ọpu bọ bịn ọkpalham bụnon awe kúḍum; eḍighi ịdi ịiḅaghami kezuom we ạsipioghom kụ eegulemi bịdi.

¹² Ọmoogh-we, mị alegheri ni mọ nạ rạpamanam ghan rukulom mọ kụ kaako riliom ạbuphe ẹkparam mọ edianaan bọ.

¹³ Awe aruukuan phọ kọseph nyina agey; bịdi kọtol li egbodo ạna.