Ạsuor 139 - Ạḍinya Iigbia

Ịyaar dị Ẹnaan úlegheri ílho

¹ Ọmoogh-we, nạ mụuḅeghion ịmi ạḅile ulegheri ịmi.

² Nạ alegheri ni tọrobo ịyaar lọ mị aḍighi; kꞌẹekela ekpisi nạ alegheri ni ịitughian ạmi.

³ Nạ ụmiin ni ịmi mụghumo mị rakumuan mọ rapooghian; nạ alegheri ni oomo ariḍighinom ạmi.

⁴ Ghạlamo tụtu mị kạkaaph ịyaar, nạ malhegheri ni ịlo mị rạwa ọḅem.

⁵ Nạ ukoom ịmi oomo ịigaany, nạ uukpereghiom ịmi rꞌịikpo phọ ạna.

⁶ Olegheri ịyaar ạna ịlo ạmi ạkel iboom; upel ịmi ọnaghanan.

⁷ Mị kạki ẹghen kụ akpetenaan nyịna? Mị kaḍighi ika kụ ạgbol egbodo ạna?

⁸ Eḍighi ịyaar lọ mị ạghi kꞌạke, nạ kạtol li ẹpe; eḍighi ịyaar lọ mị amugh, nạ kạtol li ẹpe.

⁹ Mị ạpheeph ạḍua ạḅeeny emitenom erumuḍio phọ, mụghumo ọrol ekpisi dị ẹkel iboom emeelom erumuḍio phọ,

¹⁰ nạ kạtol li ẹpe oḍiemiom ạmi, nạ kạtol li ẹpe ọphel ạmi.

¹¹ Mị ạḅeni ufiri mọ ạaghi ịmi, ḅịle mọ ạḍiḅaal phọ ikoom bọ ịmi eten ḍughul,

¹² ghạlamo ufiri phọ bịn ówil esi ạna ḅịle aḍughul ẹḅaal mụdi ootaany. Ufiri rꞌạḍiḅaal eḍighi eniin esi ạna.

¹³ Nạ kụ ụlhem tọrobo esi aloor ạmi; nạ uukpomoghi ịmi ạlogh ọkuruḅaka onhiin ạmi.

¹⁴ Mị aboom nyịna loor esi dị nạ ạkpe ni oghiilaan; oomo ịlo nạ aḍighi eḍighi ịikia rꞌịiḍaany. Mị alegheriom ni oomo ologhi ạmi.

¹⁵ Mem mọ rọlem bọ ịḅarara phọ ạmi komiighe loor ọlogh ọkuruḅaka onhiin ạmi, mem mọ mị rapoph bọ esi ịbooghian, nạ ulegheri ni mọ mị odi sịphe —

¹⁶ nạ ụmiin ni mị kụ ogbi ọmar ạmi. Riiḍio phọ useenaan bọ ịmi mọgeeghi ni ologhi ạḍinya phọ ạna kụ tọrobo ọnyo ạbidi agbi omiigh.

¹⁷ Ẹnaan, ịkparanaan ịmi ịikia olegheri ịitughian ạna; ọkar ọnhu ịlo bịdi ọman bọ.

¹⁸ Eḍighi ịyaar dị mị agbi bịdi, bịdi mupu ni ikpo ịisaar. Mem lọ mị ạsuma, mị odianan ni rꞌạna.

¹⁹ Ẹnaan, kịḅeeraan ịmi iboom dị nạ kạze bụo ạsipioghom mọ, kịḅeeraan ịmi dị awe igbagbaar kụwile ịmi bịn!

²⁰ Bịdi rọkaaph ghan ịkaraph ạraraar ịlo ạna; bịdi rọkaaph ghan ịkaraph ạraraar ịlo aḍien phọ ạna.

²¹ Ọmoogh-we, mị akel bụphe oghel bọ nyịna, mị ạḅitonaan bụphe ọḅaar bọ ẹmhu esi ạna.

²² Mị ạkar kụ akel bịdi, mị apogh bịdi mọ ạbumulogh-ḍien ạmi.

²³ Ụuḅeghion ịmi, Ẹnaan, kụ alegheri ologhi ạmi; pogh ologhi ạmi ạḅile ạwaaghi ịitughian ạmi.

²⁴ Wạaghi aphogh mụghumo ịkaraph edi ni esi ạmi, kụ ạmaar ụuḅaki ịmi ẹpe eten kꞌagee-pọ phọ.