Ạsuor 137 - Ạḍinya Iigbia

Ọkunuma ịlo ịminimiin phọ Ịzirel

¹ Sịphe iigbom ạriphiiny ạBabilon kụ ẹdi yoor ọrologhu ude; sịphe kụ ẹdi yoor omoghi ghan mem dị yoor ọotughian bọ Zạyon.

² Sịphe ịla ạgala phọ, kụ ẹdi yoor ọkomoghi rạraar ephegh ayoor.

³ Bụphe usiphi bọ iyoor ụḅeni iyoor mọ ọmoor ḍụor; bịdi ụḅeni iyoor mọ ọzaami bụno: “Ịmooraan iyoor ḍụor ạZayon.”

⁴ Ika kụ ẹdi yoor kọmooraan bọ ḍụor Ọmoogh-we phọ ḍiiruen ade?

⁵ Mị kútue mun uti ọne, eḍighi ịyaar lọ mị awula nyịna, Jeruselem.

⁶ Mị kútue mun ụmoor sụor, eḍighi mạar dị mị nyịna ụ́utughian eḍighi ịyaar lọ mị ụ́utughian mọ nạ kụ ọkar igbogh iboh phọ ạmi.

⁷ Tụutughian, Ọmoogh-we, ịpe awe Idom mọ oḍighi bọ ḍio phọ bịdi oḍigh bọ Jeruselem. Tụutughian ịdipho bịdi ọrol ghan bọ ọḅem mọ, “Ilereghi esiemi ude.”

⁸ Weye ạBabilon, kiigulemi ni inyina. Ọḅaal ologhi kụ ạrolonaan oye lọ iḅulemian inyina esi ịpe nyina iḍighi bọ iyoor —

⁹ oye lọ ạsighiogh nmụny asipugh anyina kụ ạgurogh bịdi ạze loor asighiigh.