Ạsuor 132 - Ạḍinya Iigbia

Ịlo ọsephom Otu Ịiḅereghi phọ

¹ Ọmoogh-we, kábula Devid rꞌoomo ạḍiikpara ạdol phọ ọdi ạkparagham bọ.

² Tụutughian, Ọmoogh-we, ịpe ọdi aguanaan bọ, ịyo phọ ọdi aghiran bọ rꞌạna Egbogh Ẹnaan phọ ạJekob:

³ “Mị kạ́ki ologhi otu, ḅịle mị kạ́mina;

⁴ mị kápooghian, ḅịle mị kạ́naani,

⁵ tụtu mị aḍighinaan esi Ọmoogh-we phọ, marugh Egbogh Ẹnaan phọ ạJekob.”

⁶ Ẹpe Bẹtilihem, yoor ụnaghan ịlo Igbe Ịyo phọ, kụ yoor ọmiin ẹpe iizo aJiarim.

⁷ Yoor ọḅem mọ, “Iḅerenu ọghi otu Ọmoogh-we phọ; iḅerenu ooseeny sịphe egbodo ạgada phọ ọdi.”

⁸ Pạm Igbe Ịyo phọ, eḍeenaan ịikpo phọ ạna, Ọmoogh-we, arumom sịphe Otu Ịiḅereghi phọ ạna, kụ ạrol sịen kꞌagee-pọ.

⁹ Ariil ạrikia phọ ạna oḍighi ghan oomo amem ịpe eḍighi bọ elhiom! Awe phọ ạna ọlo ḍịolho iboh!

¹⁰ Nạ uguanaan ni otelhedom mọ ạna Devid; kákel ọdaam mọ nạ ạsaḅar bọ.

¹¹ Nạ ughunyian kụ aguanaan Devid oguan, oguanaan dị nạ kạ́aḅemion mọ, “Mị kaḍighi oniin ọony ạna ọdaam, kụ ọdi kạda mem dị nạ úlho mun.

¹² Eḍighi ịyaar dị ạnmuny phọ ạna ọdaph ịyo phọ ạmi rꞌiilogh phọ mị ạngo bọ bịdi, pọ ạnmuny ạbidi kọda aani kẹn ni ọkiom ghisigh.”

¹³ Ọmoogh-we phọ mạsaḅar Zạyon; ọdi rạwa oḍighi ịsiphe phọ ẹmha ọdi:

¹⁴ “Ịsien kụ esi dị mị kạtol kꞌagee-pọ; ịsien kụ esi dị mị rạwa ọda.

¹⁵ Mị kamuzeḍinaan Zạyon oomo ịlo ọdi ạwa; mị kạperemi rukulom mọ ọdi eḍien.

¹⁶ Mị kạseph oomo ịlo ariil ạrikia phọ oḍighi, kụ awe ọdi ọmoor sụor, ọlo ḍịolho iboh.

¹⁷ Ịsien kụ ẹdi mị kaḍighi oniin ẹemara ẹemara aDevid ogbogh ọdaam; ịsien kụ ẹdi mị kạmaar ri aseere ạgada ọdaam ọdaam mọ mị ạsaḅar bọ.

¹⁸ Mị kasiphe bụmulogh-ḍien ọdi rꞌumugholoor, kụ ọlo ọmar phọ ọdi kaḍum ni ạḅile apoph.”