Ạsuor 119 - Ạḍinya Iigbia

Ologh Ọmoogh-we phọ.

¹ Ọḅaal ologhi odianaan bụphe ghuḍum ạbidi ịyaar ị́biph bọ, bụphe odi ghan bọ ọdaphan ologh Ọmoogh-we phọ.

² Ọḅaal ologhi odianaan bụphe ọdaph bọ ịtooghi phọ ọdi, bụphe ọnaghanan bọ nyọdi rꞌoomo ologhi ạbidi.

³ Bịdi rọ́pioman ghan; bịdi rotelhe ghan reten Ọmoogh-we phọ.

⁴ Ọmoogh-we, nạ mụngo iyoor iilogh phọ ạna kụ ụḅeni iyoor mọ ọmaar ooko.

⁵ Rꞌoomo ologhi ạmi mị rạwa ni ọmaar ọpham iromoghiom mọ ạna.

⁶ Eḍighi mạar dị mị ạnaghanan oomo ịtooghi phọ ạna bịn ịmi kúseere dọl umugholoor.

⁷ Ịdipho mị ạtuugha bọ ịiruen aruukuan phọ ạna, mị kaboom ni nyịna rꞌọserereeny ologhi.

⁸ Mị kaako ni iilogh phọ ạna; ịmi kụ́ḅitonaan.

Ọnaghanan ologh Ọmoogh-we phọ

⁹ Ika kụ onyugheel ọony aseere dọl ọdi ịdi ịyaar ọḍagha kẹ́tol? Esi ọnaghanan ghan ịtooghi phọ ạna.

¹⁰ Rꞌoomo ologhi ạmi kụ ẹdi mị ạnyaam okumu ạna. Kámeera dị mị kạgbagharan iilogh phọ ạna.

¹¹ Mị aseere ologh phọ ạna ologhi ạmi ọbo mị kaḍighi ghan bọ ịkaraph esi ạna.

¹² Mị raboom nyịna, Ọmoogh-we; ụtughemi ịmi reten phọ ạna.

¹³ Mị kạḅem ghan amitiom oomo iilogh phọ nạ mạlhogh bọ.

¹⁴ Mị ạmoogh ḍịḅeeraan ọdaph ghan ịtooghi phọ ạna apuemi ọmoogh eboom ẹelha.

¹⁵ Mị ạtuugha oroma phọ ạna; mị rạaḅeghion ịtughemi phọ ạna.

¹⁶ Mị ạmoogh ḍịḅeeraan esi iilogh phọ ạna; ịtooghi phọ ạna mị kábula.

Ọḅaal ologhi odi esi ologh Ọmoogh-we phọ.

¹⁷ Ḍighi iiḅi ụngo ịmi, otelhedom mọ ạna, ọbo mị ạtol eye ạnaghanan ịtughemi phọ ạna.

¹⁸ Ḅạrion riḍien ạmi ẹrol dị mị ạmiin ịikia igey phọ edi bọ sịphe ologh phọ ạna.

¹⁹ Mị odi sịen ade phọ ẹnum amem bịn; kụ́aaghinaan ịmi iilogh phọ ạna.

²⁰ Ologhi ạmi odimom rụuphua; mị rạwa olegheri ịiruen phọ ạna oomo amem.

²¹ Nạ rạḅaam ghan we dị ophoophe loor; itonyonaan kụ edianaan bụphe ụ́naghanan bọ ịtooghi phọ ạna.

²² Ụutoghion ịmi esi ịḅenian rꞌitonyonaan, ịdi eḍighi bọ mị maako iilogh phọ ạna.

²³ Bụphe ọda bọ ookpomoghan kụ umitenom ịmi ẹkaraph ezue, kụ ọlo mị kạtuugha ni ịtughemi phọ ạna.

²⁴ Oroma phọ ạna rụngo ghan ịmi ọḅaal ologhi; bịdi abutomoghiom ạmi.

Ọkururu ọnaghanan ologh Ọmoogh-we phọ

²⁵ Mọkpar upu ịmi kụ mị ạmina esi ophugh; ụusa ịmi ịdipho nạ maguanaan bọ.

²⁶ Mị uruphughian ni oomo ịlo mị maḍighi, kụ nạ ụphagharanaan ịmi; ụtughemi ịmi reten phọ ạna.

²⁷ Lọgh ḍịghaagh mị ụnaghanan iilogh phọ ạna bịn mị kagim ni ẹmhu esi ịikia ịtughemi phọ ạna.

²⁸ Ạdol ọto bịn kụ ẹdi mị odi ghan; ụngo ịmi ịnyaam ịdipho nạ maguanaan bọ.

²⁹ Ụgbole ịmi ọghi ghan eten dị ị́nighe, ḅịle esi egey eḍighinom mọ ạna ụtughemi ịmi ologh phọ ạna.

³⁰ Mị mạsaḅar ọnaghanan ghan; mị malher rụru ọnaghan ịiruen phọ ạna.

³¹ Mị mạdaphan oromoghiom mọ ạna, Ọmoogh-we; kámeera umugholoor usiph ịmi.

³² Rꞌẹghologhol mị kạnaghanan ni ịtooghi phọ ạna loor esi dị nạ kụngo ni ịmi ọnaghanam ạḍughum dị ạbugh.

Ịiḅereghi ọnaghanan ạḍughum

³³ Ụtughemi ịmi, Ọmoogh-we, ẹmhu iilogh phọ ạna, bịn mị kaako ghan ni oomo amem.

³⁴ Kạaph ạagburion ologh phọ ạna ụḅeni ịmi, bịn mị kạnaghanan ni. Mị kaako ni rꞌoomo ologhi ạmi.

³⁵ Ḍighi ịdi mị kạpamanam iilogh phọ ạna loor esi dị ịsiphe kụ ẹdi mị kạmoogh ọḅaal ologhi.

³⁶ Ụngo ịmi ẹephua ooko iilogh phọ ạna kpạripe rꞌạḍigbo.

³⁷ Kámeera mị ạnaghanan rạraar lọ ị́moogh ịyaar oḍighinom; ḍighi iiḅi ụngo ịmi, ịdipho nạ maguanaan bọ.

³⁸ Ḍighi oguan phọ ạna amitiom ụngo ịmi, otelhedom mọ ạna — oguanan phọ nạ ạmoogh bọ rꞌạbuphe rọnaghanan ghan bọ nyịna.

³⁹ Ụphel ịmi esi ịḅenian phọ mị rakiilaan bọ; ịiruen phọ ạna eḍighi ḍiigu!

⁴⁰ Mị rạwa ọnaghanan ghan ịtooghi phọ ạna; ụngo ịmi kumoom aghuḍum, loor esi dị nạ oye aruukuan.

Ọkpasi emooph ayira esi ologh Ọmoogh-we phọ

⁴¹ Uḍeenaan ịmi esi dị nạ ụphomoghian ịmi asiemi, Ọmoogh-we, ạḅile ụphel ịmi ạdapham oguanan phọ ạna.

⁴² Kụ mị agbi nụun ọphagharanaan ạbuphe ụḅeni yogh bọ ịmi ịdi eḍighi bọ mị ạkpasaghi emooph ạmi esi ekpo ọnhu phọ ạna.

⁴³ Ḍighi ịdi mị kạgba ghan igey oomo amem loor esi dị oḍuom-ologhi ạmi odi loor ịiruen phọ ạna.

⁴⁴ Mị kạnaghanan ni ologh phọ ạna oomo amem kꞌagee-pọ kꞌagee-pọ.

⁴⁵ Mị kạtol dọl ẹereegh, loor esi dị mị rạkururu ghan ọdaphan ịtughemi phọ ạna.

⁴⁶ Mị kạkaaph ịlo ịtooghi phọ ạna ạḅeni bụdaam kụ umugholoor ịmi kúsiph.

⁴⁷ Mị ạmoogh ḍịḅeeraan ọnaghanan ghan ịtooghi phọ ạna loor esi dị mị ạpomoghian bịdi.

⁴⁸ Mị ạlogh eghuan kụ ạpomoghian iilogh phọ ạna; mị kagim ẹmhu esi ịtooghi phọ ạna.

Oḍuom ologhi sịphe ologh Ọmoogh-we phọ

⁴⁹ Tụutughian oguanan phọ ạna esi ạmi, otelhedom mọ ạna; oguanan phọ mụngo ịmi oḍuom-ologhi.

⁵⁰ Ghạlamo amem ịminimiin ạmi bịn ịidereghi ịrolonaan ni ịmi loor esi dị oguanan phọ ạna ụngo ni ịmi ghuḍum.

⁵¹ Awe ophoophe aloor odi ghan ọnmoghoghom ạmi, kụ ọlo mị kọ̋gbol sịphe ologh phọ ạna.

⁵² Mị ạatughian ịiruen phọ ạna ịlo amem dị mebia ni, kụ bịdi ịngo ịmi ịidereghi, Ọmoogh-we.

⁵³ Mem lọ mị ạmiin ịdi awe ạsipioghom roogbonyon ologh phọ ạna, repin ghan ni ologhi ạmi.

⁵⁴ Ọony amem ạdol aḅirini phọ ạmi mị adoghoḍi ni sụor ịlo ịtooghi phọ ạna.

⁵⁵ Ogbo aḍughul mị ạatughian nyịna, Ọmoogh-we, mị ạḅile ạatughian ịlo ologh phọ ạna.

⁵⁶ Mị rạmoogh ghan ọḅaal ologhi esi ọnaghanan ghan ịtooghi phọ ạna.

Oseere ologhi sịphe ologh Ọmoogh-we phọ

⁵⁷ Nạ bịn kụ ẹdi mị rạwa, Ọmoogh-we; mị aguanaan ọnaghanan ghan iilogh phọ ạna.

⁵⁸ Mị ạlom nyịna rꞌoomo ologhi ạmi ọnma ighirigiir esi ạmi, ịdipho nạ maguanaan bọ.

⁵⁹ Mị magbiighi ẹzo phọ ạmi, kụ mị ạmerenyan ọdaph oromoghiom mọ ạna.

⁶⁰ Dị úpiemi mem, mị aagborion ọnaghanan ịtooghi phọ ạna.

⁶¹ Bụo ạsipioghom mọ mụkpaminaan ịmi ḍiphil, kụ ọlo mị úbula ologh phọ ạna.

⁶² Ogbo aḍughul mị ạsuma ịlo oboom ạna loor esi ịiruen aruukuan phọ ạna.

⁶³ Bụen kụ ạrighiri ạmi: oomo ạbuphe rokumu bọ nyịna, oomo ạbuphe rọnaghanan bọ iilogh phọ ạna.

⁶⁴ Ọmoogh-we, sịen ade phọ ẹphomoghian phọ ạna kụ imuza; ụtughemi ịmi iilogh phọ ạna.

Ạsuo dị odi sịphe ologh Ọmoogh-we phọ

⁶⁵ Nạ maḍighi amitiom oguanan phọ ạna, Ọmoogh-we, ḅịle nạ aḍighi iiḅi ụngo ịmi otelhedom mọ ạna.

⁶⁶ Ụngo ịmi ologhi rꞌolegheri ịyaar loor esi dị mị ạkpasaghi emooph ạmi esi ịtooghi phọ ạna.

⁶⁷ Tụtu nạ rụlhiom ịmi, mị mạpioman ghan ni, kụ ọlo nyịidipho mị rạnaghanan ni ekpo phọ ạna.

⁶⁸ Pọ eeghe ịdi nạ ạnighe — rꞌọnma ighirigiir. Ụtughemi ịmi ịtooghi phọ ạna.

⁶⁹ Awe ophoophe aloor mụgbaam ịmi ọkpe, kụ ọlo rꞌoomo ologhi ạmi mị ạnaghanan oromoghiom phọ ạna.

⁷⁰ Awe phọ ạbuen ụ́moogh ọnaghanan ạḍughum, kụ ọlo mị ạmoogh ḍịḅeeraan esi ologh phọ ạna.

⁷¹ Ạmuliom mọ ạmi ạnighenom ni rꞌạmi loor esi dị eḍighi ịdi mị ạtuugha ịtooghi phọ ạna.

⁷² Ologh phọ nạ ạlogh bọ eboom ịyaar ri esi ạmi dị epu oomo ikpoki ịsien aḅirini phọ.

Iseleman ịiruen dị edi sịphe ologh Ọmoogh-we phọ

⁷³ Nạ ụlhem ịmi kụ nạ uuroghi ịmi; ụngo ịmi ọnaghanan ạḍughum ẹrol dị mị ạtuugha iilogh phọ ạna.

⁷⁴ Bụphe oghueni bọ nyịna kọmoogh ni ọḅaal ologhi mem dị bịdi ụmiin ịmi, loor esi dị mị ạkpasi emooph ạmi sịphe oguan phọ ạna.

⁷⁵ Mị alegheri ni mọ ịiruen phọ ạna eseleman ni, Ọmoogh-we, kụ nạ ụlhiom ịmi loor esi dị nạ raḍighi ghan ni ịpe nạ ạghaaph bọ.

⁷⁶ Ẹphomoghian phọ ạna rémuneen ghan bọ kụ ịidereghi ịmi, ịdipho nạ muguanaan bọ ịmi, otelhedom mọ ạna!

⁷⁷ Ụnma ịmi ighirigiir kụ mị ạtol eye loor esi dị mị ạmoogh ni ḍịḅeeraan esi ologh phọ ạna.

⁷⁸ Umugholoor asiph we ophoophe aloor esi ọgbaanaan ạmi sịagba ọkpe! Ẹlo ạmi, mị kagim ẹmhu sịphe oromoghiom mọ ạna.

⁷⁹ Bụphe ọlogh bọ nyịna eghuan oru esi ạmi — oomo ạbuphe olegheri bọ ịtooghi phọ ạna!

⁸⁰ Eḍighi ni ịdi mị kạkar aako iilogh phọ ạna ọbo mị akpetenaan umugholoor apum.

Ịiḅereghi ọtagharanam

⁸¹ Aloor ạmi medugh, Ọmoogh-we, okori ghan dị nạ kuuroghi ịmi; mị ạkpasi oḍuom-ologhi ạmi esi ekpo ọnhu phọ ạna.

⁸² Mẹpher riḍien ạmi okori ghan ịpe nạ aguanaan bọ, kụ mị rapuru ghan, “Pụr aḍio kụ ẹdi nạ kụloghonaan bọ ịmi ḍịghaagh?”

⁸³ Mughel ịmi ịdipho okuru amiim ozu ẹnam dị moroph; kụ ọlo, mị kőwula ịtooghi phọ ạna.

⁸⁴ Kꞌạpur amem kụ ẹdi mị kạtol ghan okori? Pụr amem kụ ẹdi nạ kạliom bọ bụphe ụgbiphoghom bọ ịmi?

⁸⁵ Awe ophoophe aloor dị úuko iilogh phọ ạna moguph ooni aḍiphil osiphom ạmi.

⁸⁶ Oomo iilogh phọ ạna ịlo oḍuom ologhi ni; awe ọsighe ọkpe rụgbiphoghom ịmi. Ụphel ịmi.

⁸⁷ Ẹnum kụ isugha ọbo mughiigh ịmi; kụ ọlo, mị kőghel ịtooghi phọ ạna.

⁸⁸ Loor esi ẹphomoghian phọ ạna rémuneen ghan bọ, ḍighi iiḅi ụngo ịmi ẹrol dị mị aako ghan iilogh phọ ạna.

Ologh Ọmoogh-we phọ rábi

⁸⁹ Ekpo ọnhu ạna, Ọmoogh-we, kẹtol kꞌagee-pọ; edi ghan bịn kꞌạke.

⁹⁰ Ịpe nạ maguanaan bọ nạ rábi ghan oghiil atum oghiil; nạ maseere de phọ esi ọrol, kụ kẹtol bịn.

⁹¹ Kꞌaḍio arodon oomo ạraraar edi ghan loor esi ịtooghi phọ ạna, loor esi dị bịdi abutelhedom ạna.

⁹² Mụghumo ologh phọ ạna kụ óḍighi bọ esi dị iboh ạmi ẹḍua eru, ọbo mị mamugh loor esi ịminimiin phọ ạmi.

⁹³ Mị kákel ịtooghi phọ ạna, loor esi dị ụtuan bịdi kụ ẹdi nạ ruseere bọ ịmi eye phọ.

⁹⁴ Mị ọlo ạna — ụphel ịmi. Mị mạkpar ri ọdaph ịtooghi phọ ạna.

⁹⁵ Awe ạsipioghom rosophoghian ghan oghiigh ạmi, kụ ọlo, mị kagim ẹmhu sịphe iilogh phọ ạna.

⁹⁶ Mị malhegheri mọ oomo ạraraar ẹmoogh ni rụuku; kụ ọlo, ologh phọ ạna kụ ạkar ạnighe aatolonu.

Ẹphomoghian ẹlo ologh Ọmoogh-we phọ

⁹⁷ Pọ eeghe ịdi mị ạphomoghian ologh phọ ạna! Mị rạatughian ghan ni ologh phọ oomo aḍio.

⁹⁸ Iilogh phọ ạna edianaan ghan rꞌạmi oomo amem kụ mịngo ịmi olegheri ịyaar dị apu ọlo ạbumulogh-ḍien phọ ạmi.

⁹⁹ Mị ạnaghanan apu oomo ạbutughemia phọ ạmi loor esi dị mị ragim ghan ẹmhu ọdaph ịtooghi phọ ạna.

¹⁰⁰ Mị ạmoogh olegheri ịyaar dị apu ọlo ikumoor awe loor esi dị mị rạnaghanan ghan ịtooghi phọ ạna.

¹⁰¹ Mị mạwileghi ẹkaraph ẹzo loor esi dị mị rạwa ghan ọnaghanan ekpo ọnhu phọ ạna.

¹⁰² Mị kőghel ịtooghi phọ ạna, ịdi eḍighi bọ nạ rꞌaloor kụ ọtughemia ạmi.

¹⁰³ Pọ eeghe ạḍimen dị ịtooghi phọ ạna rẹmen — ẹmen epu ẹnuum aḍiowo.

¹⁰⁴ Mị ạmoogh sụo olegheri ịyaar loor esi iilogh phọ ạna, kụ iḍighi kụ mị maghel oomo ịkaraph ạroozo.

Ạḍiḅaal dị rẹdaphan ghan ologh Ọmoogh-we phọ

¹⁰⁵ Ekpo ọnhu ạna ọtozi dị rurelhiom ghan ịmi, rꞌạḍiḅaal dị edi eten ạmi.

¹⁰⁶ Mị kạpamanam ni iikunya phọ mị aghunya bọ ọnaghanan ghan iseleman ịtooghi phọ ạna.

¹⁰⁷ Ịminimiin phọ ạmi, Ọmoogh-we, ẹbugh ni ẹpughan; seere ịmi eye ịdipho nạ maguanaan bọ.

¹⁰⁸ Sịghe ni ịiḅereghi ọsephom ạna phọ, Ọmoogh-we, ạḅile ụtughemi ịmi ịtooghi phọ ạna.

¹⁰⁹ Mị ạnya ni oomo amem ọpham aghuḍum ạmi ẹḅeelia; mị kőwula ologh phọ ạna.

¹¹⁰ Ịkaraph awe ụkpaminaan ịmi ḍiphil; kụ ọlo, mị kọ̋ḅaar ẹmhu esi ịtooghi phọ ạna.

¹¹¹ Iilogh phọ ạna kụ ẹmoogh ạmi dị epu oomo ịnon ạraraar; bịdi kụ ọḍe dị ạḅaalami ologhi ạmi.

¹¹² Mị mạḅem mọ mị kaako ghan iilogh phọ ạna tụtu ẹteeny ḍio aḍuugh ạmi.

Eekpereghian edi ni ologh Ọmoogh-we phọ

¹¹³ Mị akel bịn ạmadan bụphe ụ́ḅogh bọ loor phọ ạbidi ụ́ngo nyịna, kụ ọlo mị ạpomoghian ni ologh phọ ạna.

¹¹⁴ Nạ kụ ọsuaram ḅịle rꞌọpelia ạmi; mị ạkpasi oḍuom-ologhi ạmi sịphe oguanaan phọ ạna.

¹¹⁵ Ịḍua esi ạmi, nyina abuḍighinom ịkaraph. Mị kaako ịtooghi Ẹnaan phọ ạmi.

¹¹⁶ Ụngo ịmi ịnyaam ịdipho nạ aguanaan bọ, ọbo mị ạrol eye; kámeera mị ạmoogh mabi esi oḍuom-ologhi phọ ạmi.

¹¹⁷ Ụpham ịmi bịn mị uḍighi eekpereghian, ḅịle mị kaler rụru oomo amem ọnaghanan ịtooghi phọ ạna.

¹¹⁸ Nạ akel tọrobo oye lọ ạḅaar ẹmhu esi iilogh phọ ạna; igbiighi iikeleghian ạbidi oopho ni bịn.

¹¹⁹ Nạ ạmiin oomo awe ạsipioghom ịdipho egu ẹenir. Kụ iḍighi kụ mị ạpomoghian bọ ịtooghi phọ ạna.

¹²⁰ Loor ẹmhu ạna mị ạmoogh ni oghiilaan; oghiilaan phọ ukpobiom ịmi loor esi ịiruen phọ ạna.

Ọnaghanan ọdaph ologh Ọmoogh-we phọ

¹²¹ Mị maḍighi ni ịdi eḍighi elhiom kụ ẹnighe; kúkpor ịmi ạlogh ḍịghaagh ạbumulogh-ḍien phọ ạmi.

¹²² Guanaan mọ nạ kạpel li otelhedom mọ ạna; kámeera awe ophoophe aloor ụgbiphoghom ịmi.

¹²³ Mẹpher riḍien ạmi okori ọloghonaan ạpeleeny phọ, okori ọtagharan phọ nạ aguanaan bọ.

¹²⁴ Ụphamam ịmi ịlo ẹphomoghian phọ ạna rémuneen ghan bọ ạḅile ụtughemi ịmi ịtooghi phọ ạna.

¹²⁵ Mị otelhedom ạna; ụngo ịmi ọnaghan ạḍughum, ọbo mị alegheri aani ịtughemi phọ ạna.

¹²⁶ Ọmoogh-we, mẹteeny mem dị nạ kaḍighi amitiom loor esi dị awe róoko mun ologh phọ ạna.

¹²⁷ Mị ạpomoghian ịtooghi phọ ạna apuemi gol, apuemi gol dị ạnighe ạphueghi.

¹²⁸ Ịduon kụ ẹdi mị ạdaph oomo ịtooghi phọ ạna; mị akel oomo ịkaraph areten.

Ẹephua ọnaghanan ologh Ọmoogh-we phọ

¹²⁹ Ịtughemi phọ ạna ịdipho ịiḍaany; mị rạdaph ghan rꞌoomo ologhi ạmi.

¹³⁰ Ọghaaph ogbononomi ịtughemi phọ ạna rẹngo ghan ḍịḅaal ẹḅile retuomaan ghan olegheri ịyaar nyọpo úlegheri bọ.

¹³¹ Mị ạmoogh ẹephua olegheri ịtooghi phọ ạna; mị rapooghuom ghan rꞌophoghoghoony ọnhu.

¹³² Kiton uphogh ịmi, ụnma ịmi ighirigiir, ịdipho nạ raḍighinaan ghan bọ bụphe ọphomoghian bọ nyịna.

¹³³ Ịdipho nạ maguanaan bọ, ụmeremi ni ịmi; kámeera ịiḅaghami izuoghom ịmi.

¹³⁴ Ụphel ịmi ạsighe ḍịghaagh ạbuphe rụgbiphoghom bọ ịmi ọbo mị ạdaph ịtooghi phọ ạna.

¹³⁵ Mite egaan ụngo aani ịmi ḍịseph ạḅile ụtughemi ịmi iilogh phọ ạna.

¹³⁶ Izin ạmi rekil ghan ịdipho ạmuum ọphiiny, loor esi dị awe úuko mun ologh phọ ạna.

Eseleman ologh Ọmoogh-we phọ

¹³⁷ Nạ oye aruukuan ni, Ọmoogh-we, ḅịle iilogh phọ ạna eseleman ni.

¹³⁸ Ịinua phọ nạ mạngo bọ emunughan ẹnighe kụ eeleeny.

¹³⁹ Ophin ologhi raamor ghan sịen aloor phọ ạmi ịdipho ạnian, loor esi dị ạbumulogh-ḍien ạmi ụ́maghami ịyaar ịtooghi phọ ạna.

¹⁴⁰ Nạ rábi ghan oguan ạna. Ọpo eeghe ịdi mị ạphomoghian ịduon phọ!

¹⁴¹ Mị oghiil oye dị mọḅitonaan, kụ ọlo, mị úkel ịtughemi phọ ạna.

¹⁴² Ạdol aruukuan ạna kẹtol li kꞌagee-pọ, kụ ologh phọ ạna ạmeera ni oomo amem.

¹⁴³ Ịiḅaghami rꞌokaphian oomiigh kụ izuoghom ịmi, iilogh phọ ạna riruomaan ghan ịmi ọḍe.

¹⁴⁴ Ịtooghi phọ ạna eseleman ni oomo amem; ụngo ịmi ọnaghanan ạḍughum bịn mị kạtol li eye.

Ịiḅereghi ọtagharanam

¹⁴⁵ Mị ạsighe oomo ologhi ạmi kụ rạmagham bọ nyịna; ụnaghanan ịmi, Ọmoogh-we, bịn mị kạdaph ni ịtooghi phọ ạna.

¹⁴⁶ Mị rạmagh ni nyịna; ụphel aani ịmi, bịn mị kaako ghan ni iilogh phọ ạna.

¹⁴⁷ Tụtu erumuḍio remite mị mạmagh nyịna ọloghonaan ạmi ḍịghaagh. Mị ạkpasi oḍuom-ologhi ạmi esi ịpe nạ maguanaan bọ.

¹⁴⁸ Oomo aḍughul phọ mị ụ́naani, mị agim ẹmhu esi ịtooghi phọ ạna.

¹⁴⁹ Loor esi dị ẹphomoghian ạna rémuneen ghan bọ, ụnaghanan ịmi, Ọmoogh-we; ḍeenaan ọnma ighirigiir phọ ạna kụ aako ghuḍum ạmi.

¹⁵⁰ Ạbuphe rụgbiphoghom bọ ịmi rꞌọkaraph ologhi phọ mọobeeph, awe dị róoko ghan ologh phọ ạna.

¹⁵¹ Kụ ọlo, nạ utuman ni ịmi, Ọmoogh-we, ḅịle oomo ịtooghi phọ ạna edi ghan ni bịn.

¹⁵² Mebia ni mị ạnaghan bọ ịlo ịtooghi phọ ạna; nạ kụ uḍighi ịdi bịdi kẹtol kꞌagee-pọ.

Ịlom ọloghonaan ạḍighaagh

¹⁵³ Mịin ịminimiin phọ ạmi kụ ụphel aani ịmi, loor esi dị mị kősoor ghan ologh phọ ạna.

¹⁵⁴ Eenaan mị ụmiin ịpe mị rạwa bọ, ạḅile useere ịmi ẹereegh; ụphel ịmi, ịdipho nạ maguanaan bọ.

¹⁵⁵ Ạbukaraph awe kọ́moogh pẹleeny loor esi dị bịdi róoko ghan iilogh phọ ạna.

¹⁵⁶ Kụ ọlo, igbiririph phọ ạna, Ọmoogh-we, ẹbugh ni iboom; ḍeenaan ọnma ighirigiir phọ ạna kụ ụphelom ịmi.

¹⁵⁷ Mị ạmoogh ni ịbadi ạbumulogh-ḍien rꞌawe ịgbiphoghom, kụ ọlo mị kọ̋wile ghan ooko iilogh phọ ạna.

¹⁵⁸ Mem lọ mị aphogh bụphe areekeleghian phọ, mị rạmoogh ghan ḍikia loor esi dị bịdi ụ́pamanam ịtooghi phọ ạna.

¹⁵⁹ Mịin ịdi mị ạphomoghian ịtooghi phọ ạna, Ọmoogh-we. Ẹphomoghian phọ ạna rénmia ghan. Kụ iḍighi kụ ụphelom aani ịmi.

¹⁶⁰ Ookpomoghi ologh phọ ạna aḍighi igey phọ, kụ oomo ịiruen phọ ạna eseleman ni kụ kẹtol kꞌagee-pọ.

Ọḅogh aloor ọngo ologh Ọmoogh-we phọ

¹⁶¹ Awe ịikpo ọga ni bịn uzuom ịmi, kụ ọlo mị ạlogh ni eghuan ologh phọ ạna.

¹⁶² Ologhi ạmi ạḅaal li iboom loor ẹmhu ịpe nạ maguanaan bọ, ạḅaal mụdi oye dị ạḅom egbe.

¹⁶³ Mị akel kụ ạḅile ạḅitonaan oomo ịlo eḍighi ọkpe, kụ ọlo mị ạpomoghian ni ologh phọ ạna.

¹⁶⁴ Oḍual amem ḍio mị rạseph ghan bọ nyịna loor eselaman ịiruen phọ ạna.

¹⁶⁵ Bụphe ọphomoghian bọ ologh phọ ạna ọmoogh eekpereghian, kụ ịyaar ílho dị keḍighi ịdi bịdi komeel.

¹⁶⁶ Mị rakori ghan dị nạ kụphel ịmi, Ọmoogh-we, kụ mị raḍighi ghan ịlo nạ ạto.

¹⁶⁷ Mị rạdaph ghan ni ịtughemi phọ ạna; mị ạpomoghian bịdi rꞌoomo ologhi ạmi.

¹⁶⁸ Mị ạnaghanan ịtooghi rꞌịlo nạ ạḅem mọ oḍighi ghan; nạ rạmiin ghan ni tọrobo ịyaar lọ mị aḍighi.

Ịiḅereghi ọloghonaan ạḍighaagh

¹⁶⁹ Ạḍimagh ọloghonaan ạḍighaagh phọ ạmi ẹteeny ni nyịna, Ọmoogh-we! Ụngo ịmi ọnaghanan ạḍughum ịdipho nạ maguanaan bọ.

¹⁷⁰ Nạghanan ịiḅereghi phọ ạmi ạḅile ụphel aani ịdipho nạ aguanaan bọ.

¹⁷¹ Mị kaboom ghan ni nyịna oomo amem ịdi eḍighi bọ nạ rụtughemi ghan ịmi iilogh phọ ạna.

¹⁷² Mị kạmoor ghan sụor ịlo ologh phọ ạna loor esi dị ịtooghi phọ ạna eeleeny ni.

¹⁷³ Nyạ ghan ọloghonaan ạmi ḍịghaagh oomo amem, loor esi dị mị ạnaghanan ni ịtooghi phọ ạna.

¹⁷⁴ Mị rạwa ghan ọloghonaan ạḍighaagh ạpeleeny phọ ạna, Ọmoogh-we. Esi ologh phọ ạna kụ ẹdi mị ạmoogh ọḅaal ologhi.

¹⁷⁵ Ụngo ịmi ghuḍum ẹrol dị mị aboom ghan nyịna; ịtooghi phọ ạna ịloghonaan ịmi ḍịghaagh!

¹⁷⁶ Mị rayeela ịdipho oyool-ọga dị aphe. Esi ịduon phọ tue ụwa ịmi oye arukumuan phọ ạna, loor esi dị mị kősoor iilogh phọ ạna.