Ạsuor 118 - Ạḍinya Iigbia

Ịiḅereghi ọsephom esi ọkpar opu.

¹ Ịngo ḍịseph Ọmoogh-we phọ loor esi dị ọdi ạnighe ni, ḅịle ẹphomoghian phọ ọdi edi ghan bịn.

² Awe phọ Ịzirel ọḅem: “Ẹphomoghian phọ ọdi edi ghan bịn kꞌagee-pọ.”

³ Ariil ạrikia phọ Ẹnaan ọḅem: “Ẹphomoghian phọ ọdi edi ghan bịn kꞌagee-pọ.”

⁴ Oomo ạbulo rooseeny nyọdi rọḅem ghan: “Ẹphomoghian phọ ọdi edi ghan bịn kꞌagee-pọ.”

⁵ Mem ịiḅaghami mị ạmagh Ọmoogh-we phọ; ọdi ụnaghanan ịmi kụ useere ịmi ẹereegh.

⁶ Ọmoogh-we phọ odianaan rꞌạmi, mị kákiilaan; eeghe ịyaar kụ ẹdi oye kuḍighi ịmi?

⁷ Ọmoogh-we phọ kụ rụlhoghonaan ghan ịmi ḍịghaagh, kụ mị kạmiin ni ḍio dị kọkpar opu bụmulogh-ḍien phọ ạmi.

⁸ Ẹnighe ọkpasi emooph ayira esi Ọmoogh-we phọ epu oḍuom ologhi oye.

⁹ Ẹnighe ọkpasi emooph ayira esi Ọmoogh-we phọ epu oḍuom ologhi buḍiemiom awe.

¹⁰ Ịbadi ạbumulogh-ḍien ukoom ịmi, kụ ọlo mị uphiemi ni bịdi esi ịikpo Ọmoogh-we phọ.

¹¹ Bịdi ukoom ịmi oomo ịigaany; kụ ọlo mị uphiemi ni bịdi esi ịikpo Ọmoogh-we phọ.

¹² Bịdi ụuphunogh ukoom ịmi mụdi aḍiowo, kụ ọlo bịdi ụnuughi egina amem ịdipho ạnian esi iitoor; esi ịikpo Ọmoogh-we phọ mị aphiemi ni bịdi.

¹³ Uzuom ịmi igey kụ esugha ẹnum rọkpar kupu ịmi, kụ ọlo Ọmoogh-we phọ ụlhoghonaan ni ịmi ḍịghaagh.

¹⁴ Ọmoogh-we phọ ụngo ịmi ịikpo rꞌịnyaam; ọdi mụphel ịmi.

¹⁵ Ịnaghan ḍịolho iboh ọkpar-opu ologhi arugbogo awe phọ Ẹnaan: “Iboom ịikpo Ọmoogh-we phọ meḍighi oḍighi.

¹⁶ Ịikpo phọ ọdi miruomaan iyira ọkpar opu — iboom ịikpo phọ ọdi ghisigh ẹgham.”

¹⁷ Mị kámugh; kpạripe ghụn mị kạtol li kụ agbeelom ịpe Ọmoogh-we phọ maḍighi.

¹⁸ Ọdi mụlhiom ịmi agey, kụ ọlo ọdi ọ́ngo ọgel mọ mị umugh.

¹⁹ Ughughuronaan ịmi rughuugh Otu Ịiḅereghi phọ; mị kaḍigh ologhi kụ ạngo ḍịseph Ọmoogh-we phọ.

²⁰ Ịphen kụ arughuugh Ọmoogh-we phọ; awe aruukuan bịn kụ koḍigh ologhi.

²¹ Mị aboom nyịna, Ọmoogh-we, loor esi dị nạ ụnaghanan ịmi, loor esi dị nạ mụngo ịmi ọkpar opu.

²² Ẹko phọ ạbuloghom ruutu phọ oghel bọ kụ mẹḅile eḍighi ẹko ogbo.

²³ Ọmoogh-we phọ kụ aḍighi ịduon phọ kụ eḍighi ni iikia riḍien ayira.

²⁴ Rodon kụ aḍio ọkpar opu Ọmoogh-we phọ; itu ọmoogh iboh, olhe ẹyaal.

²⁵ Ụphel iyoor, Ọmoogh-we, ụphel iyoor. Ụngo iyoor ẹnighenom, Ọmoogh-we.

²⁶ Ẹnaan ẹseph ni nyọon phọ ratumom bọ ḍien Ọmoogh-we phọ! Kꞌịsiphe Otu Ọmoogh-we phọ kụ ẹdi yoor ọseph nyịna.

²⁷ Ọmoogh-we phọ kụ Ẹnaan; ọdi muḍeenaan iyira ẹnighe. Ịpam ịphiph ireeny rạghaagh anyina, emiigh igiri iboh kụ egiriph erelhe eeghironom enmeny ạrikia phọ.

²⁸ Nạ kụ Ẹnaan ạmi, kụ mị ạngo nyịna ḍịseph; mị kagbeelom ni igbogh phọ ạna.

²⁹ Ịngo ḍịseph Ọmoogh-we phọ loor esi dị ọdi ạnighe ni, ḅịle ẹphomoghian phọ ọdi edi ghan bịn kꞌagee-pọ.