Ạsuor 116 - Ạḍinya Iigbia

Oye dị ọphel esi aḍuugh raboom ghan Ẹnaan

¹ Mị ạpomoghian Ọmoogh-we phọ loor esi dị ọdi ụnaghanan ịmi. Ọdi rạnaghan ghan ni ịiḅereghi ạmi.

² Ọdi rụnaghanan ghan ni ịmi tọrobo amem lọ mị ạmagh nyọdi.

³ Ariiphina aḍuugh-aḍuugh iko ịmi ekitonom; ogbogh aruugu oḍi phọ uukpereghiom ịmi. Aḍiigu isiph ịmi rꞌọoḅaghamian aloor.

⁴ Kụ mị ạmagh Ọmoogh-we phọ. “Seseeny, Ọmoogh-we, ụphel ịmi.”

⁵ Ọmoogh-we phọ ogey oye ọnma ighirigiir; Ẹnaan ayira ạmoogh igbiririph.

⁶ Ọmoogh-we phọ rabianaan ghan oye lọ ọloghonaan ạḍighaagh úlho; mem dị mị ạrol esi ịiḅaghami, ọdi ụphel ịmi.

⁷ Mạar ạkpar, nạ oḅio phọ ạmi, loor esi dị Ọmoogh-we phọ muḍighi ịmi ịma.

⁸ Ọmoogh-we phọ ụphel ịmi ạsighe esi aḍuugh; ọdi agbuurogh izin ạmi ạḅile aḍighi ịdi oye ịmi ụ́kpar úpu.

⁹ Ịduon phọ kụ ẹdi mị katelhe ghan risigh Ọmoogh-we phọ sịen aḅirini ạbuphe odi bọ eye phọ.

¹⁰ Mị ụphamanam ni omeeraam mọ ghạlamo amem dị mị ạḅem mọ, “Mị mạkar ape ạman,”

¹¹ ghạlamo amem dị mị aghiilaan kụ ạḅem mọ, “Oye ólho dị koḍuom ologhi.”

¹² Eeghe kụ ẹdi mị kạngo Ọmoogh-we phọ ọkpiom oomo iiḅi phọ ọdi uḍighi bọ ịmi?

¹³ Mị katuomaan Ọmoogh-we phọ ruunmo amiim, ạsephom nyọdi loor esi ịdipho ọdi ụphel bọ ịmi.

¹⁴ Sịphe ookpomoghan oomo awe phọ ọdi kụ ẹdi mị kạngo nyọdi ịlo mị aguanaan.

¹⁵ Aḍuugh oniin oye ọdi repin ghan ni iboom esi Ọmoogh-we phọ.

¹⁶ Mị otelhedom ạna, Ọmoogh-we. Mị rakumu nyịna, ịdipho onhiin phọ ạmi akumu ghan bọ. Nạ mụphel ịmi ạsighe esi aḍuugh.

¹⁷ Mị kạpighiron ẹkia ạḍiseph ạngo nyịna, kụ ạaḅereghi.

^18-19 Sịphe ogbo ookpomoghan oomo awe phọ ạna, ẹpe Jeruselem sịphe ạdol iigbia Otu Ịiḅereghi phọ ạna, mị kạngo nyịna ịpe mị aguanaan bọ. Iboom Ọmoogh-we phọ!