Ạsuor 112 - Ạḍinya Iigbia

Ọḅaal ologhi ogey oye

¹ Boom Ọmoogh-we phọ! Ọḅaal ologhi kụ odianaan oye dị aghueni Ọmoogh-we phọ, dị ạmoogh ḍịḅeeraan ọnaghanan ghan ịto phọ ọdi.

² Ạnmuny ogey oye kọmoogh ịikpo sịphe ade phọ; nmụny ạnmuny ọdi kọseph ni.

³ Eghunotu ọdi kọmoogh ẹelha kụ oḍum iboom, kụ ọdu egey eḍighinom ịyaar ọdi kaaleghaan ni.

⁴ Ạḍiḅaal resoor ghan esi ufiri kẹngo bugey awe, bụphe ọmoogh bọ ọnma ighirigiir rꞌegey eḍighinom ịyaar rꞌiiḅi ịiruen.

⁵ Ọḅaal ologhi kụ odianaan oye lọ rạ́logh ghan ạaku ạale oye ikpoki, ọpo rạpam ghan bọ oḍighi ọwa ikpoki ọdi igey areten.

⁶ Ogey oye kámeel; kọotughian ni nyọdi oomo amem.

⁷ Ọdi ọ́moogh oghiilaan ọnaghan ọkaraph ọghaaph; omeeraam ọdi ạkpar kụ ọdi aḍuom ologhi Ọmoogh-we phọ.

⁸ Ọdi rạ́aḅaghamian ghan loor ḅịle rákiilaan ghan; ọdi ạḅem mọ ọno kạmiin bụmulogh-ḍien ọno dị momeel.

⁹ Ọdi ranmo ghan inmo kạngo tọrobo oye lọ ị́nighenom, kụ ọnma ighirigiir ọdi rámuneen ghan; ọdi kạmoogh ịikpo kụ okueni ghan nyọdi.

¹⁰ Ạbukaraph awe phọ ọmiin ịphen phọ kụ repin ologhi; bịdi ọnmagharan rꞌophin ologhi kụ ope nyanam; oḍuom-ologhi ạbidi ạḍua bịn óḅula mun.