Ạsuor 111 - Ạḍinya Iigbia

Ạḍuor oboomiom Ọmoogh-we phọ

¹ Boom Ọmoogh-we phọ! Rꞌoomo ologhi ạmi mị kạseph Ọmoogh-we phọ sịphe ookpomoghan awe phọ ọdi.

² Pọ eeghe ịikia ạraraar dị Ọmoogh-we phọ aḍighi. Oomo ạbulo ạraraar phọ ẹḅeeraan rọwa ghan ni ịlo ọnaghanan ạbidi.

³ Oomo ịlo ọdi aḍighi eghuan rꞌigbogh kụ imuza; aruukuan ọdi edi ghan bịn.

⁴ Ọmoogh-we phọ ómeera yira owula iiḍighi ịiḍaany phọ ọdi; ọdi oye iiḅi rꞌọnma ighirigiir.

⁵ Ọdi ramitiom ghan eḍien kạngo bụphe oghueni bọ nyọdi; ọdi ówula ịyo phọ ọdi.

⁶ Ọdi maḍeenaan ịikpo phọ ọdi we phọ ọdi ịdipho ọdi ạngo bọ bịdi rere aruuruen phọ.

⁷ Oomo ịlo ọdi aḍighi ị́moogh mabi, ḅịle esel li; tọrobo ịlo ọdi ạto, ẹkpianaan ni.

⁸ Iilogh phọ ọdi kẹmeera ni kꞌagee-pọ; ụlogh bịdi rꞌigey rꞌaruukuan.

⁹ Ọdi ạtagharan we phọ ọdi kụ aghiran ịyo dị kẹtol bịn rꞌạbidi. Iigbia rꞌogbogh kụ ọdi phọ!

¹⁰ Ọlogh eegu Ọmoogh-we phọ — ẹpe kụ eten ọsu ologhi. Ọnaghan ạḍughum — ọlo oomo ạbulo ooko iilogh phọ ọdi. Koboom ni nyọdi kꞌagee-pọ.