Ạsuor 109 - Ạḍinya Iigbia

Ọghaaph emoghi oye dị odi ịiḅaghami

¹ Mị aboom nyịna, Ẹnaan; káḅoorian.

² Awe ẹkaraph eḍighinom ịyaar rꞌọkpe muzuom ịmi elephiri. Bịdi rụgbaam ghan ịmi ọkpe,

³ ḅịle bịdi rọkaaph ghan ịkaraph ạraraar ịlo ạmi, ruzuom ghan ịmi dị ẹmhu ílho.

⁴ Bịdi rómeeraam ghan ịlo mị ạḅem, kụ ạri mị ạpomoghian ni bịdi, ḅịle mị mạaḅereghinaan ni bịdi.

⁵ Bịdi ọsighe ghan ịkaraph kụ rọkpiom igey lọ mị aḍighi, ẹ́pomoghian kụ ọkpiom ẹphomoghian.

⁶ Sạḅar ọkaraph oye ịiruen asophonaan ịiruen mụlogh-ḍien ạmi, kụ oniin ạmulogh-ḍien ọdi aphogh ịyaar ạghaaphaan nyọdi.

⁷ Ọoḅeghion rạghaaph phọ ọdi ophogh kụ osoph opume nyọdi! Ọsighenom ịiḅereghi ọdi mọ ọpioman!

⁸ Eḍighi ịdi aghuḍum ọdi kạnuun akureri, ọnon oye ạsighe dọl phọ ọdi!

⁹ Eḍighi ịdi ạnmuny ọdi koḍighi bụnyigo, kụ ạnir ọdi aḍighi ekpukele!

¹⁰ Eḍighi ịdi ạnmuny ọdi kọlom ghan kụ ole ḅịle ruutu kọ́moogh; ophorogh bịdi ọsighiogh ịgbenem ariisi lọ bịdi odiighi ghan!

¹¹ Oomo awe lọ ọdi aleeghi ịimugh orool ruphua ọdi ọḍuanam, kụ aruuruen ọsighiogh oomo elhoman arukumuan phọ ọdi!

¹² Oye nyọdi iiḅi kúḍighi, ḅịle oye kúpogh bụnyigo ạnmuny lọ ọdi ạwile!

¹³ Oomo ạnmuny ạnmuny ọdi omuughu, kụ ḍien ọdi kụ́utughian esi oghiil dị ratu!

¹⁴ Ọmoogh-we phọ ạatughian sịpioghom ạburude ạburude ọdi, ḅịle kụ́sar ụ́bilenaan ịkaraph onhiin ọdi!

¹⁵ Ọmoogh-we phọ ạatughian oomo amem ịkaraph ạbidi, kụ ọlo oomo awe owula ni bịdi ọmadan!

¹⁶ Oye phọ ọpo phọ amem ị́tol dị ạatughian oḍighi iiḅi; ọdi ạgbiphoghom ạḅile ạze rukulom, bụphe ẹkparam mọ, rꞌạbulo oye ọloghonaan ạbidi ḍịghaagh ólho bọ.

¹⁷ Ọdi ạmoogh ḍịḅeeraan oronyon — oronyon ni nyọdi! Ikia nyọdi ọngo ạḍiseph — oye nyọdi kụ́seph!

¹⁸ Ọdi agbor aronyon ghan ịdipho ọdi aanmenan ghan bọ. Itonyonaan ịghighimaam iinmenan esi ọdi, kụ eḍigh loor ọdi ịdipho ạmuum kụ erelhe ịphuuny ọdi ịdipho elho!

¹⁹ Itonyonaan ọdi ezu nyọdi ịdipho arukpe, ḅịle oomo amem ekoom nyọdi ịdipho okuughaam!

²⁰ Ọmoogh-we, tụugh ịdipho kụ ạlhiom bụmulogh-ḍien phọ ạmi — bụphe ụḅaanaan bọ ịmi ịkaraph ạroḍogh phọ.

²¹ Kụ ọlo, Ẹnaan ạmi Ọmoogh-we, ụphel ịmi ịdipho nạ maguanaan bọ, ạḅile ụtagharan ịmi loor ẹmhu ẹnighe ẹphomoghian phọ ạna.

²² Mị uwekulom dị odi dọl ẹkparam; muḍighi ịmi ịyaar dị righiigh ịmi.

²³ Mụdi oogho adulhe, mị ramugh; muphula ịmi otoph ịdipho ẹemara.

²⁴ Aruukum ạmi medugh loor ọkoony; mị masugha ruzu rꞌịḅarara bịn.

²⁵ Mem lọ awe ụmiin ịmi, bịdi ụmilogh ghan ịmi; bịdi ooḅoghomi rụmhu kụ ọḅiphaan.

²⁶ Ụphel ịmi, Ọmoogh-we Ẹnaan ạmi; loor ẹmhu ẹphomoghian phọ ạna rémuneen ghan bọ, ụphel ịmi.

²⁷ Ḍighi ịdi ạbumulogh-ḍien ạmi kolegheri mọ nạ kụ rụphel ghan ịmi.

²⁸ Bịdi kuronyon ni ịmi, kụ ọlo nạ kụ ụseph ni ịmi. Eḍighi ịdi bụphe rụgbiphoghom bọ ịmi komeleghu kụ mị otelhedom mọ ạna ạmoogh ọḅaal ologhi!

²⁹ Eḍighi ịdi umugholoor kaakpereghiom bụmulogh-ḍien phọ ạmi; umugholoor ạrol sịphe aloor phọ ạbidi mụdi ogbogh ạsuoma.

³⁰ Mị kạlo ḍịolho ạḍiseph ạkiom ạnyu; mị kaboom Ọmoogh-we phọ sịphe ookpomoghan awe phọ,

³¹ loor esi dị ọdi rạpel ghan uwekulom oye kụ kạtagharan nyọdi rạghaagh ạbuphe mọḅem bọ mọ oghiigh nyọdi phọ.