Ạsuor 108 - Ạḍinya Iigbia

Ịlo eenan ạbumulogh-ḍien

¹ Esi ạna kụ ẹdi mị ạkpasi oomo oḍuom-ologhi ạmi, Ẹnaan. Mị kạmoor ạsephom nyịna. Ḅetenu, uwaloor ạmi.

² Iḅetenu, ọne rꞌọkama ạmi, mị kạsumeeny erumuḍio phọ.

³ Mị kạseph nyịna Ọmoogh-we igbo areelhe phọ. Mị kaboom nyịna igbo aweye phọ.

⁴ Ẹphomoghian phọ ạna rémuneen ghan bọ epeleghom sịke phọ; amabi-ólho phọ ạna ạḅogh okuaḍio phọ.

⁵ Ḍeenaan igbogh phọ ạna ẹpe okuaḍio phọ, Ẹnaan, ḅịle eegu phọ ạna eleeny oomo ade phọ.

⁶ Ụphelom iyoor rꞌịnyaam mọ ạna; ạnaghan ịiḅereghi ayoor, ẹrol dị awe phọ nạ ạphomoghian bọ ọmoogh ọtagharan.

⁷ Sịphe ạdol iigbia phọ ọdi, Ẹnaan mẹḅem: “Esi ọkpar-opu mị kadi ni Sẹkem kụ adiemi Eḍiiny aSukot we phọ ạmi.

⁸ ẠGiliad ẹlo ạmi rꞌạManase kẹn; Ifraim eghoony ạmi kụ aJuda ịkpara ạraalha ạmi.

⁹ Kụ mị katene Mọab gbạgba ootolaam ạraghaagh ạmi kụ mị atebeeny rokoro ạmi sịphe Idom, esi eḍeenaan dị mị kụ ạmoogh ẹmha phọ. Mị kạlo ḍịolho ọkpar opuom awe aFilistia”.

¹⁰ Ạnhian, Ẹnaan, kụ kụsighe ịmi aḍighom ẹmha phọ okpeki bọ? Ạnhian kụ kuḍiemiom ịmi aḍighom Idom?

¹¹ Nạ mạkar ri ughel iyoor ḍụghum? Nạ kátelhiom we ẹgham ayoor amitenom ḍụghum?

¹² Ụphel iyoor eenan mụlogh-ḍien phọ. Ọloghonaan ạḍighaagh oye, oopho ịyaar bịn.

¹³ Ẹnaan kụ ẹrolan rꞌayira, pọ yira kọkpar ri opu; ọdi kabinighiom ni bụmulogh-ḍien phọ ayira.