Ạsuor 105 - Ạḍinya Iigbia

Ẹnaan rꞌawe ọdi

¹ Ịngo ḍịseph Ọmoogh-we phọ, egbeelom igbogh phọ ọdi; ịḅeni reelhe phọ ịpe ọdi maḍighi bọ.

² Ịmoor sụor eboomiom Ọmoogh-we phọ; ẹghaaph ịlo iiḍighi ịiḍaany phọ ọdi maḍighi bọ.

³ Itu ọmoogh ọḅaal ologhi ịdipho yira oḍighi bọ bụo ọdi; oomo ạbulo rooseeny ghan nyọdi ọmoogh iboh.

⁴ Ịiḅereghi Ọmoogh-we mọ ịloghonaan inyina ḍịghaagh kụ eeseeny nyọdi oomo amem.

^5-6 Nyina ạnmuny ạnmuny Ebraham otelhedom mọ ọdi; nyina ạnmuny ạnmuny ạJekob, oye phọ ọdi ạsaḅar bọ: ịitughian ịiḍaany phọ Ẹnaan eḍighi bọ rꞌịiruen phọ ọdi aagbo bọ.

⁷ Ọmoogh-we phọ kụ Ẹnaan ayira; ịto phọ ọdi ịlo oomo aḅirini phọ.

⁸ Ọdi kạpamanam ịyo phọ ọdi kꞌagee-pọ rꞌaruguanaan phọ ọdi oniin ọonir oghiil.

⁹ Ọdi kaako ni ịyo phọ ọdi aghiran bọ rꞌEbraham rꞌiikunya phọ ọdi aguanaan bọ Ạizik.

¹⁰ Ọmoogh-we phọ aghiran ịyo rꞌạJekob dị kẹtol kꞌagee-pọ.

¹¹ Ọdi ạḅem mọ, “Mị kịngo inyina de phọ aKenan. Ade phọ ạḍiphe keḍighi bin anyina.”

¹² Awe Ẹnaan ụ́bugh ḍita, bịdi uḍighi ruuruen sịphe ade phọ aKenan.

¹³ Bịdi oyeela ọḍua eelhe ọgba eelhe, ọḍua eniin ạga aḅirini osi ẹnon.

¹⁴ Kụ Ẹnaan ímeera mọ oye aviilom bịdi; esi ọmaar ọpham ạbidi, ọdi ạphur rụru rạalha.

¹⁵ Ọdi ạḅem mọ, “Kéḍighi ịyaar butelhedom mọ mị mạsaḅar bọ; kẹ́ḅogh riil phọ ạmi.”

¹⁶ Ọmoogh-we phọ ạghiomaan ịgbakuro ẹmha phọ ạbidi kụ aphiemi oomo ariiḍien phọ ạbidi.

¹⁷ Kụ ọdi arom oye aḍia ghan risigh ạbidi, Jọsef nyọpo aal bọ ịdipho ẹbene.

¹⁸ Udoghoḍi ruwol ọdi izime, kụ okuron akoom orum ọdi ịdipho oḍigh,

¹⁹ tụtu ịpe ọdi ạḅem bọ emite. Ekpo ọnhu Ọmoogh-we phọ ẹḅem mọ ọdi ạgba ni igey.

²⁰ Kụ ọdaam mọ Ijipt ạtagharan nyọdi; ọdaam areelhe phọ aseere nyọdi dọl ẹereegh.

²¹ Ọdi aseere nyọdi uwo ẹmhu ịtooghi kụ aḍighi ịdi ọdi ạda oomo ade phọ.

²² Ọdi ạngo nyọdi ịikpo ophoghom awe iiḍighi ọdi, rꞌịikpo ọtughemi ghan ạbuphe rotomoghiom ghan bọ ọdaam mọ.

²³ Kụ ạJekob ạghi Ijipt kụ ạrol ghan ẹpe eelhe phọ ẹpe.

²⁴ Ọmoogh-we phọ ạngo ịbadi ạnmuny we phọ ọdi, kụ aḍighi ịdi bịdi ọkpar opu bụmulogh-ḍien ạbidi.

²⁵ Ọdi aḍighi ịdi awe Ijipt ọlogh ḍien we phọ ọdi kụ ọrolom bụo iiḍighi ọdi reekeleghian.

²⁶ Kụ ọdi arom Mozis otelhedom mọ ọdi, rꞌEeron nyọpo ọdi mạsaḅar bọ.

²⁷ Bịdi oḍighi iboom iiḍighi Ẹnaan, kụ oḍighi ịiḍaany ẹpe Ijipt.

²⁸ Ẹnaan ẹghiomonaan ufiri eelhe phọ ẹpe, kụ awe Ijipt phọ ụ́naghanan ịto phọ ọdi.

²⁹ Ọdi akiton rịphiiny atene ịḅaal kụ ạze oomo ina phọ.

³⁰ Ịḅal kụ imuza tọrobo esi sịphe eelhe phọ; ghạlamo sịphe otu ọdaam mọ bịn ịḅal kụ ịrol.

³¹ Ẹnaan ẹto ẹḅem kụ ạragay rꞌịphi eleeny oomo eelhe phọ.

³² Kpạripe rꞌọlophia, ọdi arom ibikpo rꞌọmepheghian aḍio ạghiomaan de phọ ạbidi.

³³ Ọdi aagulemi tọrobo oozin avain rꞌạfig kụ alhereghi oomo ireeny phọ.

³⁴ Ọdi ạto kụ igurubia eru, ḍita dị ịlo ogbi ílho.

³⁵ Bịdi ẹraal oomo ịizupha sịphe eelhe phọ, ẹḅile elhe oomo ibugha.

³⁶ Ọdi ạze ịkpana ạnmuny sịphe oomo arughunotu Ijipt.

³⁷ Kụ ọdi ạsighe we Ịzirel amitenom; bịdi ọsighe silva rꞌagol, kụ oomo ạbidi omoon kụ ọmoogh ịnyaam.

³⁸ Awe Ijipt ughiilaan bịdi kụ ologhi ạbidi ạḅaal mem dị bịdi ọḍua bọ.

³⁹ Ẹnaan ẹngo ni we ọdi ẹghoph ọotu, rꞌạnian ạḍiḅaal mem aḍughul.

⁴⁰ Bịdi ọlom, kụ ọdi aruomaan rạsaraghu; ọdi ạngo bịdi eḍien kꞌạke dị ẹgbaanyan bịdi.

⁴¹ Ọdi akpegheron ḍighiigh, kụ ạmuum amite, akilogh ạnyu ịisaar mụdi ọphiiny.

⁴² Ọdi aako iikunya ọghor phọ ọpo dị aguanaan bọ ạngo Ebraham otelhedom mọ ọdi.

⁴³ Kụ ọdi ạsighe we phọ ọdi mạsaḅar bọ ạḍuanam, kụ bịdi ọmoor kụ ọlooghi esi iboh.

⁴⁴ Ọdi ạngo bịdi rere awe ịnon areelhe kụ aḍighi ịdi bịdi ọsighiogh iizo ạbidi,

⁴⁵ ẹrol dị awe phọ ọdi ooko iilogh phọ ọdi kụ ọpamanam oomo ịto phọ ọdi. Iboom Ọmoogh-we phọ!