Ạsuor 103 - Ạḍinya Iigbia

Ẹphomoghian phọ Ẹnaan

¹ Boom Ọmoogh-we phọ, nạ uwaloor phọ ạmi! Oomo ịpe mị odimom bọ, iboom ḍien iigbia phọ ọdi.

² Boom Ọmoogh-we phọ, nạ uwaloor phọ ạmi! Kábula oomo iiḅi phọ ọdi maḍighi bọ nyịna.

³ Ọdi ạsar ghan rạbilenaan ịkaraph ạmi, ạḅile aakonom oomo ạreezegh ạmi.

⁴ Ọdi ómeera mị aḍigh ọmar iḍim, ạḅile ụsephom ịmi ẹphomoghian rꞌạghusan.

⁵ Ọdi amuzeḍiom ghuḍum ạmi igey ạraraar, ọbo mị ạrol ugheel kụ amoon mụdi uga.

⁶ Ọmoogh-we phọ raagbo ghan ịiruen kạphel bụphe awe rọgbiphoghom bọ kụ ạngo bịdi ịlo ẹkpianaan.

⁷ Ọdi agananami ni igbiighi phọ ọdi aḍeenaan Mozis ạḅile aḍighi ịdi awe Ịzirel ọmiin ogbogh oḍighi phọ ọdi.

⁸ Ọmoogh-we phọ ạmoogh ghụsan rꞌẹphomoghian; ịyaar rẹ́nuun ghan kephin ologhi ọdi kụ ẹphomoghian ọdi rémunughan.

⁹ Ọdi rạ́ḅaaghiom ghan oomo amem; ọdi rápin ghan ologhi bịn kꞌagee-pọ.

¹⁰ Ọdi rụ́kpiom ghan iyira ịpe ịkaraph phọ yira ọkpianaan bọ, ḅịle rụ́kpiom ghan iyira ịpe ịkaraph ayira ẹman bọ.

¹¹ Ịdipho okuaḍio phọ ạkelan bọ de phọ — ịdipho kụ ẹdi ẹphomoghian phọ ọdi ẹbugh esi ạbuphe oghueni bọ nyọdi.

¹² Ịdipho emitenom erumuḍio phọ ẹkelan bọ emeelom mọ — ịdipho kụ ẹdi ọdi rạsighe ghan ịkaraph ayira kạkele.

¹³ Ịdipho ọde ạnma bọ ighirigiir nmụny ọdi — ịdipho kụ ẹdi Ọmoogh-we phọ ạnma ighirigiir bụphe oghueni bọ nyọdi.

¹⁴ Ọdi alegheri ni ịyaar dị ụlhemom bọ iyira, ọdi ạatughian ni mọ ụlhemom iyira ophugh.

¹⁵ Ẹlo-ẹlo ayira, aghuḍum ayira ạkigh rọogho. Yira ropoph ghan koḍum mụdi ạfalaway eḍum;

¹⁶ kụ ookuugh aphula, bịn manyororo — oye ọ́miin mun.

¹⁷ Esi ạbuphe oghueni bọ Ọmoogh-we phọ, ẹphomoghian phọ ọdi kẹtolan kꞌagee-pọ, ḅịle egeny ẹphamam mọ ọdi kẹtol bịn oghiil atum oghiil

¹⁸ esi ạbuphe ooko bọ ịyo phọ ọdi, ọḅile bọ oḍighi ịtooghi phọ ọdi.

¹⁹ Ọmoogh-we phọ maseere ạgada ọdaam mọ ọdi ẹpe kꞌạke; ọdi kụ ọdaam dị rapogh oomo ạraraar.

²⁰ Iboom Ọmoogh-we phọ, nyina abugbogh ạruukpaany kꞌạke phọ, dị rọnaghanan ghan ịtooghi phọ ọdi, dị roler ghan rụru ịlo ọdi ạghaaph.

²¹ Iboom Ọmoogh-we phọ, oomo anyina abutelhedom dị ọmoogh ịikpo ẹpe okuaḍio, dị roḍighi ghan ịlo ọdi ạḅem.

²² Iboom Ọmoogh-we phọ, oomo ịpe ọdi ạlhem bọ, oomo ịpe edi bọ oomo ariisi dị ọdi rạda. Boom Ọmoogh-we phọ, nạ uwaloor phọ ạmi!