Ạsuor 101 - Ạḍinya Iigbia

Oguan ọdaam

¹ Ạḍuor ạmi egbolomaan ọokpara ọmeeraam rꞌiiḅi ịiruen, kụ mị ạmooraan nyịna, Ọmoogh-we.

² Ẹzo ạmi kẹ́moogh ịyaar ọḍagha. Pụr aḍio kụ nạ atu ụteeny ịmi? Mị kạtol ḍịserereeny ạdol kꞌạmi,

³ kụ kámeeraam ịkaraph. Mị akel iiḍighi ạbuphe ọgbol bọ esi Ẹnaan. Mị kạ́moogh ịyaar oḍighinom ạbidi.

⁴ Mị maghel oomo iigbegheḍiom kụ kạ́moogh ịyaar oḍighinom ạsipioghom.

⁵ Mị kátelhian oye lọ aaghologh ịkaraph bụnon awe. Oye lọ aphoophe loor kụ raabaga káḍighi ọyaghiri ạmi.

⁶ Ạbuphe omeeraam bọ Ẹnaan kụ ụḅeeraan ịmi. Mị kameera ni bịdi ọrol ogiga ạmi. Bụphe rọzo ghan bọ eeḅi ẹzo lọ ẹkar eseleman kụ ẹdi mị kameera mọ ọrol rꞌạmi.

⁷ Oye ọkpe kátugh ogiga ạmi; oḍighinom ịkaraph lọ ạḅem mọ ọno raḍighi ghan igey kạ́tol egbodo ạmi.

⁸ Ḍio etum ḍio mị kapiemi bụkaraph awe sịphe ade phọ ayira; mị kaporogh oomo awe ạsipioghom sịphe ẹmha Ọmoogh-we phọ.