Ạsuor 10 - Ạḍinya Iigbia

Ịiḅereghi ịlo iiḅi ịiruen

¹ Ọmoogh-we, uḍighi ika kụ nạ ạmeera bọ kꞌẹpe egher ịdipho? Uḍighi ika kụ nạ ạbooghian bọ mem ịiḅaghami phọ ayoor?

² Abuḍighinom ịkaraph phọ opoophe loor ạbidi kụ rọgbiphoghom rukulom mọ. Ḍighi ịdi bịdi kụ komeleghu siphil phọ bịdi ọkpamaghi bọ.

³ Oye ạsipioghom mọ raatumaam ghan ịkaraph ạruuphua phọ ọdi. Ọdi ạseph ghan bụo ekpooko kụ apogh Ọmoogh-we phọ asooromi.

⁴ Ọkaraph oye ọ́maghami Ẹnaan ịyaar; ịitughian ịlo Ẹnaan ologhi ọdi ílho ghan.

⁵ Oomo ạraraar rẹnighenaan ghan ni ọkaraph oye. Ịiruen phọ Ẹnaan ọdi ólhegheri. Ọdi apogh bụmulogh-ḍien phọ ọdi ạḅitonaan.

⁶ Ọdi rạḅem ghan pạ ologhi phọ ọdi mọ, “Dọl phọ ạmi ạḍien ịmi kụ́aar. Mị rꞌamem kạ́tol esi ịminimiin.”

⁷ Pạ ọnhu phọ ọdi iitunyan, ọkpe rꞌịidegheghan bịn kụ edi ghan. Ịkaraph ikpo ọnhu rꞌọwa asighiton emuza ni pạ anem mọ ọdi.

⁸ Ọdi ạbooghian aḅona pạ ạramha phọ rakori ghan we dị mạar ụ́piom ọze, kụ rạnmanaghian ghan ọmiin ạbulo ọdi kạmiine.

⁹ Ạmina ạbooghian, ịdipho ạnam-dịka rakori ghan rukulom mọ; ọdi rasiphi ghan bịdi sịphe siphil ọdi kụ kạghogh bịdi ạḍuanam.

¹⁰ Uwo ẹkaraph ẹmugh phọ mameel aḍighanaan. Ịgbagara ịikpo meghiigh nyọdi

¹¹ Ọkaraph oye phọ rạḅem ghan pạ ologhi phọ ọdi mọ, “Ẹnaan ọ́maghami ịphen ịyaar. Ọdi makpereghi riḍien phọ ọdi kụ ịmi ụ́miin.”

¹² Ọmoogh-we, ḅetenu ạlhiom bụkaraph awe phọ ạbuphe. Kábula bụphe rọmiinom bọ.

¹³ Uḍighi ika kụ ọnyo ạsipioghom mọ raafolomi bọ Ẹnaan ịduon, kụ rạḅem ghan pạ ologhi phọ ọdi mọ Ẹnaan mạar képuru?

¹⁴ Tọ nạ rạmiin ghan ni. Nạ akiririom ni apogh ịiḅaghami rꞌịminimiin, kụ aakolobian oomo amem ọlogh ạḍighaagh. Ọpo ị́nighenom bọ ạḅogh loor phọ ọdi ạngo nyịna! Nạ kụ ọpelia ạbunyigo ạnmuny.

¹⁵ Bunughi ịikpo oye ạsipioghom mọ rꞌoḍighinom ịkaraph phọ. Lịom bịdi sịpioghom mọ ịpe bịdi moḍighi bọ tụtu bịdi ụ́pioghom mun.

¹⁶ Ọmoogh-we phọ kụ ọdaam ẹmha phọ kꞌagee-pọ. Bụlo rọoḅereghi ịnon ạrumugh kope ni.

¹⁷ Ọmoogh-we, nạ alegheri ni rụuphua ạbuphe osooromi bọ loor. Nạghan emoghi phọ ạbidi ạḅile ạkparami iloghi phọ ạbidi.

¹⁸ Leeleminaan ịiruen ạnmuny-ịgo rꞌạbuphe rọmiinom bọ, ọbo oye phọ ọlhemom bọ ọposo kạdeghogh ghan bọ bịdi bịn okpereghaan yogh.