Asidogh 7 - Ạḍinya Iigbia

¹ Mọony ạmi, tụutughian ịpe mị ạḅem bọ kụ kábula ịlo mị ạḅeni nyịna oḍighi.

² Ḍighi ịlo mị ạḅem bịn nạ kabia ni. Mạar amiighe loor ọdaph ịtughemi ạmi ịdipho nạ kaakoronaan bọ riḍien ạna.

³ Pạm ịtughemi ạmi loor oomo amem; gẹ sịphe ologhi phọ ạna.

⁴ Mạar aadeki olegheri ịyaar ịdipho umarani ạna kụ ọḅaranu ariḍien ịdipho ẹmhu-ọyaghiri ạna.

⁵ Ịphen phọ kẹgbole nyịna loor ạnmariir ạbunon awe, loor ạnmariir dị ọmoogh ikpo ọnhu osiphom oye.

Ạnir ipesi phọ

⁶ Eniin aḍio mị rapogh ghan epogh loor eghuugh-ookuugh otu ạmi,

⁷ kụ mị ạmiin ịbadi ugheel dị iloghi kẹ̋kpo kụ mị ạkar aphogh ọkar oniin dị aḍighi uwo elologhi.

⁸ Ọdi ratelhe ghan eten kụ ạkuuraam ẹkul esi dị oniin ạnir arugh. Ọdi rạḅeeny otu ạnir phọ,

⁹ dulhe mem dị mẹwepheghian.

¹⁰ Pọ kụ amem dị ạnir phọ aazuanan oye phọ; ạnir phọ aanmenan mụdi oliom-ẹmha dị ạmoogh igbiighi.

¹¹ Ọdi ạnir dị ạkpo ekpeḍien kụ umugholoor ụ́moogh, dị odi ghan orelhe ghan ikol areten,

¹² eeni amem ạmeera ọgbal, eeni amem ạmeera ogbo, eeni amem ạmeera riisi aḍighi.

¹³ Ạnir phọ ạkom onyugheel phọ, ạkpun nyọdi, aphogh riḍien ọdi gori gori, kụ ạḅem,

¹⁴ “Mị mạphinyonaan rịkia rodon kụ aseere etigh ẹnam mọ ọphighironom bọ,

¹⁵ kụ mị amite rạwa ghan nyịna. Mị ụwa ghan ọmiin ạna kụ nạ masi sịen.

¹⁶ Mị mạdiom ẹmina ạmi ịma oopa ọmelemele ukpe dị ạḍua Ijipt kụ aru.

¹⁷ Mị mạsaraghiom maa rꞌalos rꞌọoza, rạraar eḍu kịrokiro.

¹⁸ Tue ọḍua, ọrolan esi oomo aḍughul phọ. Yira kọmoogh ọḅaal ologhi mem dị oniin aḅol nyoniin.

¹⁹ Olhom ạmi ólho ologhi otu. Ọdi mạghi erelhe dị kebia ni.

²⁰ Ọdi ạsighe ni ikpoki dị ẹbugh ạlogh okuru ọdi kụ kátigheel tụtu omoom ụnwanyu amite.”

²¹ Ịduon phọ kụ ẹdi ạnir phọ ạdeghom oye phọ ẹnighe phọ ọdi, kụ ọdi ameel aḍighanaan ịma ọghaaph ạnir phọ.

²² Ekperenom bịn oye phọ amiigh ọdaph ạnir phọ mụdi ạnam dị rọkimom esi ọkanyan, mụdi ọnuen dị rạki omeel aḍiphil,

²³ esi dị ẹkpina kepuur ekpom. Ọdi ạghigh ẹnun dị rẹki esi ọseki — ọdi ólhegheri mọ aghuḍum ọno aḍighi ooto rꞌosooromineen.

²⁴ Nyịidipho, nmụny ạmi, ịmaar ẹnaghan. Iler rụru ẹnaghan ịlo mị ạḅem.

²⁵ Kémeera ọdo ạnir phọ ọphon ịḅeeraan inyina; íyeela ghan ọwa ọdi.

²⁶ Ạnir phọ maagulemi ni ịbadi awe kụ ạze ịbadi dị kótue ogbi.

²⁷ Nyina ẹghi otu ọdi, nyina edi eten ọmar iḍim. Eḍighi eekpera eten ọteeny aḍuugh.