Asidogh 6 - Ạḍinya Iigbia

Ịnon ạraghaaph ọphur aruru

¹ Mọony ạmi, nạ mamerenyan ni ọkpe ọmugh ọnon oye ḍụghum?

² Ikpo ọnhu phọ ịpe nạ aguanaan bọ oye, mẹghoroghi ni nyịna ẹlogh esi ịiḅaghami ḍụghum?

³ Pọ ịduon phọ, mọony ạmi, oye phọ kụ ạmoogh nyịna. Kụ ọlo, ịduon kụ eten okpetenaan: nụun ạghi ạteeny nyọdi kụ ạaḅereghi mọ ọdi ạtagharan nyịna.

⁴ Kámeera rꞌaloor dị nạ kạki ạmina apooghian.

⁵ Mite sịphe aḍiphil phọ ịdipho ẹnun mꞌọnuen dị rakiil okpetenaan ọnyo ịtaya.

⁶ Awe ẹgbogholeer ọtuughaany dọl phọ ịimara!

⁷ Bịdi ụ́moogh oḍiemiom mꞌọolha mꞌoye dị ạda,

⁸ kụ bịdi rokpol ghan eḍien ạbidi ghozogh, ookolobian ịlo amem unu.

⁹ Kꞌapuramem kụ ẹdi uwo ẹgbogholeer kạmina ẹmina? Puramem kụ ẹdi ọdi kaḅetenu?

¹⁰ Ọdi rạḅem ghan mọ, “Mị kanyam ẹnum. Mị kakura rạghaagh apooghian ẹnum.”

¹¹ Kụ ịdipho ọdi rạnaani bọ, ekulom kezuom nyọdi ịdipho ạruḅa dị ọpham rẹenema.

¹² Ighiil awe ẹkaraph eḍighinom ịyaar ọḍua esi ọgba esi ọgba ghan ọkpe.

¹³ Bịdi onyamam ekpeḍien kụ oḍighi ịphen oḍighi ịpe ookeleghiom ạna,

¹⁴ oomo amem mọ rogbiighi ghan ịkaraph sịphe iloghi phọ ạbidi, ọozaghami ịiḅaghami oomo ariisi.

¹⁵ Loor ịduon phọ, ạraraar aḍiigu kemitenaan bịdi dị ọphur ạruru kạ́tol, kụ bịdi oḍighima rạraar iboom.

^16-19 Oḍual ạraraar edi bọ dị Ọmoogh-we phọ aghel kụ kạ́sighe ni: ophoophe aloor, anem ọgba ọkpe, ạraghaagh dị kẹze we dị ịyaar ụ́piom, ologhi dị rạatughian ịkaraph, aruwol dị reegborion oḍighi ịkaraph, oye-ọgbaanaan dị ạgba ọkpe atum ọkpe, ḅịle rꞌoye dị kaḍighi ịdi ạrighiri kọḅaaghi.

Ọphur ạruru esi ipesi

²⁰ Ḍighi ịlo ọde ạna ạḅeni nyịna, mọony ạmi, kụ kábula ịdi onhiin ạna ạtughemi nyịna.

²¹ Pạmanam ikpo ọnhu ạbidi ạkasi sịphe ologhi ạna.

²² Ịtughemi ạbidi keḍiemiom nyịna mem lọ nạ odi erelhe, eekpereghi nyịna mem aḍughul, kụ eromoghiom nyịna ootaany.

²³ Ikpo ọnhu ạbidi ọtozi dị rạmuanan nyịna; oolemi ạbidi kẹtughemi nyịna ịlo ọrol.

²⁴ Kẹgbole nyịna esi ịkaraph ạnmariir, esi ikpo ọnhu ạnmariir ạbunon awe dị kọwa nyịna ipesi.

²⁵ Ẹnighe ạbidi kị́kigh mạar esi ạna. Kámeera oonyamaghian ariḍien ạbidi esiph nyịna.

²⁶ Oye kạsighe ni eniin eeḅoghoḍi ạbred atenom ạnir lọ odi dọl ipesi, kụ ọwa ạnir ọnon oye kạsighiogh oomo ịlo ọdi ạmoogh.

²⁷ Nạ kaḅol li nịan ekpologhi ạna kụ ẹ́bile ạsuoma ạna ị́su ḍụghum?

²⁸ Nạ katelhe ni loor ịghologhol iiḅu kụ ẹ́bile rạda ạna ị́suughi ḍụghum?

²⁹ Ịduon phọ kụ eḍighi ooto rꞌosooromineen ọmina esi ạnir ọnon oye. Tọrobo oye lọ aḍighi kạmiinom ni.

³⁰ Awe kọ́ḍagha ni ọḅa dị ami eḍien mem dị ọkoony rasiph;

³¹ kụ eḍighi mạar dị osiph, ọdi kạkpe oḍual amem apeeliom — ọdi kamiteghom ni oomo ịlo ọdi ạmoogh.

³² Kụ oye lọ ạrolan ạnir ọnon oye aḍighi uwo elologhi. Ọdi rapiemian loor ọdi.

³³ Kọkporion nyọdi ạsuoma eghuan phọ ọdi, kụ okuphogh ọḅaram; komuton nyọdi eephoogh kꞌagee-pọ.

³⁴ Olhom óphin ologhi ẹnon ịyaar ịdipho amem dị oye ạḅogh ạnir ọdi; ịdi ọdi kaḅulemian ọku kạ́tol.

³⁵ Ọdi kạ́boor ịikpia; aruunmo ílho dị kẹpoomi ophin ologhi ọdi.