Asidogh 30 - Ạḍinya Iigbia

Ikpo ọnhu phọ Agur

¹ Ịphen phọ iiphoneen ikpo ọnhu phọ Agur ọony aJake: “Ẹnaan ịmi ílhoonaan, Ẹnaan ịmi ílhoonaan kụ ẹpelenaan ịmi ílhoonaan.

² Mị ạkar ạkigh ẹnam kụ apu oye; mị ụ́moogh ịitughian dị ẹkpe dị oye kạmoogh.

³ Mị kọ̋tuugha ghan olegheri ịyaar, kụ ịyaar lọ mị alegheri ịlo Ẹnaan ílho.

⁴ Ạnhian kụ ọdi mạkar ghan alegheri olegheri ịyaar kꞌạke? Ạnhian kụ ọdi masiph ghan oghim ḍịghaagh ạkpaghatiom? Ọbo obọ aphurughiom mụum opoḍi ukpe? Ọbo ọbo amiteghom ịiku ade phọ? Ọdi ạnhian, eḍighi ịyaar dị nạ alegheri? Ọony ọdi ạnhian?

⁵ “Ẹnaan phọ reḍighi ghan kemitiom tọrobo ịpe ọdi aguanaan bọ. Ọdi aḍighi ịdipho oghoph esi oomo ạbulo ọwa mọ ọdi aakpereghi bịdi.

⁶ Nạ aghophora mọ ọdi ạḅem ịyaar dị ọdi ụ́ḅem, ọdi kạlhiom ni nyịna kụ aḍeenaan mọ nạ oye ọkpe.”

Ịnon asidogh

⁷ Mị ạlhom nyịna, Ẹnaan, dị nạ kameera mị ạmoogh ịyal ạraraar kụ mị agbi omugh:

⁸ ḍighi ịdi mị ọkpe kạ́gba, kụ aḍighi ịdi mị kạtol ogbo ẹelha rꞌekulom. Ịduon phọ, ụngo ịmi eḍien lọ ẹkasian ẹlo mị ạwa bịn.

⁹ Mị ạmoogh ẹlo ẹphughan, iini mị kạḅem mọ mị nyịna ụ́wa mun. Kụ mị ameel ekulom, iini mị kami kụ asiphe umugholoor Ẹnaan ạmi.

¹⁰ Kạ́ḍagha ọony-otu risigh ọde-otu ọdi. Koronyon ni nyịna kụ nạ ạmiinom.

¹¹ Awe odi ni dị oronyon bụrude ạbidi kụ ụ́ḅeni onhiin ạbidi mọ maḍighi.

¹² Awe odi ni dị ogbi mọ bụno ọserere mem dị bịdi oḍighi ni ẹenir iboom.

¹³ Awe odi ni dị ogbi mọ bụno ọnighe iboom — ọkar ika kụ ẹdi bịdi ọnighe bọ!

¹⁴ Awe odi ni dị rọkpiloghom ghan rukulom rꞌạbuphe ụ́moogh bọ dọl; pọ kụ ạdol ạbidi.

¹⁵ Ẹenunughi ẹmoogh ịyal ạnmanyaan, kụ ịyal phọ ạbidi okol mọ “Ụngo ịmi!” Edi bọ inya ạraraar dị ịyaar rẹ́gbaanyan ghan:

¹⁶ ọmar iḍim, ạnir dị nmụny ụ́mar, ade dị ẹgharaghar kụ rẹwa ọlophia, rꞌạnian dị reemor kụ ịlo oḍime ílho.

¹⁷ Tọrobo oye lọ ạmaarom ịmaar ọnhu ọde ọdi mꞌọḅitonaan onhiin ọdi mem ạḍikpo ạkpe dị ạredelhe kụ keekpophi, ḅịle mꞌạreghiligho kụ kẹponyon riḍien ọdi.

¹⁸ Edi bọ inya ạraraar dị eḍighi ịikia esi ạmi ọnaghanan:

¹⁹ uga dị rạpeeph okuaḍio, ẹkaraph-ịyaar dị retelhe ạnyu aḍighiigh, ụnwunyaru dị rayeela ogbo ọphiiny, ḅịle rꞌolephiri rꞌạnir dị odi élegherian.

²⁰ Ịduon kụ ẹdi ạnir oghir ạrol: ọdi rale ghan ẹmha, kawura mụum kụ ạḅem mọ, “Mị kőḍighi ịyaar dị eeph!”

²¹ Edi inya ạraraar dị ade phọ rꞌaloor kẹ́sighe:

²² ẹbene dị ạḅile aḍighi ọdaam, uwelologhi dị ạmoogh oomo ịlo ọdi rạwa olhe,

²³ ạnir dị awe oghel kụ ạmiin ilhom ạal, ḅịle rꞌọnyani-otu dị ạaram onhiin-otu ọdi.

²⁴ Edi inya ịnam sịen aḅirini phọ dị eghom, kụ ẹmoogh oboom olegheri-ịyaar:

²⁵ Ịimara: ịnyaam bịdi ílho, kụ rookpomoghi ghan eḍien ạbidi mem aghozogh.

²⁶ Ịbam ịnam dị erugh ologhi asighiigh: ịnyaam bịdi kẹn ụ́moogh, kụ romitiom ghan marugh ạbidi igbo asighiigh.

²⁷ Igurubia: bịdi ụ́moogh oḍiemiom kụ rodian ghan kụ kọḍua esi ọgba esi.

²⁸ Asiḅoku: nạ katue ni ạpam ḍiniin ḍịghaagh ạna, kụ ọlo tọrobo amarugh ọdaam bịdi odi ni.

²⁹ Edi inya ạraraar dị ẹdugh ophoghoghom mem lọ retelhe:

³⁰ ạnam-dịka ẹmoogh ịikpo epu oomo ịnam kụ rékiilaan ghan ịnon ịnam;

³¹ ịga; ilephiri ạsikenegh dị eefughemi suphuugh aloor; ḅịle rꞌạbudaam dị oḍia ghisigh awe ạbidi.

³² Eḍighi ịyaar dị esi elologhi kụ nạ maphoophe loor kụ ạmoogh ịkaraph ịitughian, bịleghi kụ ạatughian!

³³ Nạ akirion mịliki, nạ kamitiom bọta. Nạ agiph izon oye, ịḅaal kụ kemite. Nạ aḍighi ịlo ophin-ologhi, nạ kaḍigh ni esi ịiḅaghami.