Asidogh 28 - Ạḍinya Iigbia

¹ Abuḍighinom ịkaraph rokiil ghan mem dị oye bịdi ráporogh, kụ oye dị iguegue ekia ạkpo oḅio ịdipho ạnam-dịka.

² Mem dị eelhe ẹpioghom, kẹmoogh ghan ọdaam etum ọdaam. Kụ eelhe kẹkpar ẹmeera ẹtol ebia mem dị ẹmoogh buḍiemiom ologhi rꞌolegheri ịyaar.

³ Oye dị ạrolom ogbogh ạgada kụ rạgbiphoghom we ẹkparam ạkigh ọlophia dị rapiemi ịizupha.

⁴ Eḍighi mạar dị nạ ụ́logh eghuan ologh, nạ odi ạga ạbukaraph awe; kụ nạ ạnaghanan, pọ nạ rꞌạbidi ụ́ḅoph.

⁵ Ạbukaraph awe úlegheri ịyaar dị iiḅi ịiruen eru, kụ ạbuphe rooseeny ghan bọ Ọmoogh-we phọ kụ ụkar ọnaghanan.

⁶ Ẹnighe epu oḍighi uwekulom dị iḅuaḅua ekia rꞌoḍighi ọolha iigbegheḍiom.

⁷ Onyugheel ọony dị aako ologh pọ alegheri ni mạar. Ọlo aḍigh rịghiri rꞌạbuo ạpu-bịn-ạnighe ạngo umugholoor ọde ọdi.

⁸ Eḍighi ịdi nạ aḍighi ogbogh loor olhe ghan oye ipeel kụ oogbegheḍiom ạbuphe ụ́moogh bọ, ẹelha ạna keḅula kꞌoye lọ ạnma ighirigiir rukulom.

⁹ Nạ ọ́naghanan ologh phọ, ịiḅereghi ạna kekia ni Ẹnaan ọnaghan.

¹⁰ Nạ aakeleghi ogey oye oḍighi ịkaraph, nạ kameel li ḍiphil ạna. Oye phọ ọpo ạraghaagh ẹḅaal bọ kạmoogh ni ruunmo.

¹¹ Ạraalha oomo amem rogbi ghan mọ bụno ọmoogh ologhi, kụ uwekulom oye lọ ạmoogh egey ẹeghara kụ alegheri apu.

¹² Mem dị igey awe ọrolom ogbogh ạgada, tọrobo oye rạsar ri, kụ mem dị ạbukaraph awe ọda, awe ọkiighi riisi ịbooghian.

¹³ Edughom kẹ́teeny nyịna, eḍighi mạar dị nạ ạaghi ịkaraph ạna. Tuphughian amitiom bịn ạwile yogh kụ Ẹnaan keḍeenaan nyịna ọnma ighirigiir.

¹⁴ Oomo amem nạghanan ghan Ọmoogh-we phọ bịn ologhi ạna kạḅaal li. Nạ ạḅaar ẹmhu, nạ kape ni.

¹⁵ Aruwekulom ụ́moogh ẹḍogh risigh ọkaraph oye dị ạda we; ọdi ooto rꞌosooromineen mụdi ạnam-dịka dị regbophoghu, mụdi eephe-ạno dị rẹkughian.

¹⁶ Oye dị ạda kụ ọ́moogh igeny ịitughian kaḍighi ọkaraph ọdaam dị eeph. Oye dị iguegue ekia kạda ni ebia.

¹⁷ Oye dị ologh oghiigh oye kụ asiph, aagborion raguph oḍi ọdi. Kákikima nyọdi.

¹⁸ Kel ịkaraph bịn rꞌịyaar nyịna kẹ́ḅogh. Nạ aḍighi ọkaraph oye, pọ nạ kameel li ekperenom.

¹⁹ Ooḍighia oḅephom ozo kạmoogh eboom ẹlo ole. Awe dị ropiemi ghan mem kọtolom ghan ekulom.

²⁰ Abugey awe kọtol dọl dị emuza rꞌọḅaal ologhi. Kụ nạ aagborion ọmoogh ikpoki, nạ kazuan ghẹlhe.

²¹ Oḍighan eniin ạga ebeeph ni. Kụ buniin abuugboom ịiruen kọpioman ni ạar ẹnum oti ọman.

²² Awe eeph ịkaraph roogborion ghan ọmoogh ikpoki dị bịdi kóloghoma mem dị ekulom kẹteeny.

²³ Leeleminaan oye, kụ mem dị oḍighi pạ ọdi kạḅem ni mọ maḍighi apuemi nyọpo aatumeni bọ nyọdi.

²⁴ Oye lọ agbi mọ íbeeph omi ịyaar ọde rꞌonhiin ọ́nighe ópu ọkaraghi ọḅa.

²⁵ Eeph ịkaraph remitiom ghan ịiḅaghami bịn. Ọkpasaghi esi Ọmoogh-we phọ kụ rẹnighenaan ghan oye.

²⁶ Eḍighi élegheri-ịyaar ọdaph ịitughian ạna. Mạar ạrol, kụ ạdaph oroma awe olegheri ịyaar.

²⁷ Ngọ ghan rukulom mọ bịn nạ kạ́tolom ẹkparam. Nạ akpereghi riḍien ạna kụ aphoghom bụphe ị́nighenom bọ, ịbadi awe koruule ni nyịna.

²⁸ Awe rọtol ghan esi ịbooghian mem dị ạbukaraph awe kụ ọda. Kụ mem dị bịdi omeel, awe aruukuan kụ kọḅile ọda.