Asidogh 26 - Ạḍinya Iigbia

¹ Ị́kpianaan ọseph uwelologhi, ịdipho ibikpo rẹkar ghan bọ ghozogh ḅịle mꞌọlophia mem ibugha.

² Igurughian nyịna mạar kéḍighi, emuton lọ nạ ạkpe ogurughi. Ẹkigh ịnun dị ẹpheeph kụ esi ị́lel.

³ Ịkpara ịlo ạsu, ọkagh ọnhu ịlo ẹnam adool, ikuphogh ịlo uwelologhi.

⁴ Nạ ạphagharanaan ḍipuru elologhi, nạ aḍighi aani uwelologhi ịdipho ọpo phọ apuru bọ.

⁵ Ngọ oghiil ọphagharanaan ḍighiil aḍipuru, kụ ọpo apuru bọ kaloghoma mọ ọno ọ́moogh ologhi ịdipho ọno ạatughian bọ.

⁶ Nạ arom dom oghiil oye, ịduon phọ pọ nạ raagbo ruwol ạna; nạ rạwa ịiḅaghami.

⁷ Uwelologhi kadogh ḍidogh ịdi ị́kpianaan, ịdipho oye ẹgha katelhiom bọ ruwol ọdi.

⁸ Ootumeni okuḍuuku ẹkigh ọlogh ekpo loor ạkatapoti.

⁹ Uwelologhi lọ adogh ḍidogh ạkighimaam ọpughol-miim dị rạsighenaan ootoor ḍịghaagh ọdi.

¹⁰ Oye lọ aphir oghiil oye oḍighi oḍighi raḍighi yogh bụnon awe rạraar.

¹¹ Uwelologhi dị aḍighi eghiil eḍighinom ịyal amem ạkigh ghoogh dị ạḅile rale ịpe ọdi akuḅa bọ.

¹² Ọkar eekuna uwelologhi kụ ạnighe apu oye phọ ọpo agbi bọ mọ ọno alegheri ịyaar mem dị ọdi úlegheri.

¹³ Iḍighi ika kụ uwo ẹgbogholeer erugh rámite ghan bọ? Ọdi rakiilaan ghan eeghe? Ạnam-dịka ḍụghum?

¹⁴ Uwo ẹgbogholeer rakironaan ghan ẹmina. Ọdi ọ́ḍua ọkel opu eghuugh dị rẹeghelaan loor ịsisi phọ.

¹⁵ Buniin awe ọmoogh ẹgbogholeer dị kótue ọlogh eḍien ọnhu ạbidi.

¹⁶ Uwo ẹgbogholeer kagbi mọ ọno ạsu ologhi apu oḍual awe dị kọkaaph ịyaar kụ ọgba ẹmhu phọ omitiom.

¹⁷ Opel bịn oḍigh ipakian dị nyịna ị́moogh emite ịdipho oye dị odi eten ogbo ẹmha kụ ạmiin ghoogh bịn asiph aḅeri.

^18-19 Oye phọ ọpo aakeleghi bọ ọnon oye kụ ạḅem mọ ọno apheghom ephegh ạkigh ọkpoom-ikpoko dị rapeghom rẹenema dị eroph.

²⁰ Ịpe kụ ílho ạnian eḍim; ịkalaghian kụ ílho, ọruonu kạ́tol.

²¹ Iiḅu kụ iḍighi mạar dị iiruum rẹmoogh ghan; ịpe kụ iḍighi mạar dị ạnian reemor ghan, ịpe kụ ịdi awe ịiḅaghami roḍighi ghan ịdi ịpakian résophoghian ghan.

²² Iḅughuḅughu ịkalaghian rẹdughaan ni! Pọ kụ ịyaar phọ ịḅeeraan bọ iyira ọmin ghan.

²³ Ọghaaph dị úḍeenaan ịdi ẹkar edi ologhi ạna ẹkigh ịma egbulom oko ạmuum dị ụ́kpar ḍighi.

²⁴ Opuemiom rạbooghi ghan ḍikia ọdi loor ịkponhu ootumeniom.

²⁵ Kẹdugh ni ọnaghan, kụ kámeeraam nyọdi, loor esi dị ologhi phọ ọdi aḍikia kụ imuza ẹepheleghian.

²⁶ Iini ọdi katue ni ạbooghi ḍikia phọ ọdi, kụ ạri tọrobo oye kạmiin ni ịkaraph ạraraar phọ ọdi raḍighi bọ.

²⁷ Awe dị ọkpaminaan ḍiphil bụnon awe, bịdi kụ romeel ghan. Awe dị ookilemi ḍighiigh, kemeel li epum bịdi.

²⁸ Emuton dị nạ ạmoogh ni ḍikia oye, nạ nyọdi kạ́gbaam ọkpe. Ọghaaph dị úḍeenaan ịdi ẹkar edi ologhi ạna kámitiom ẹnon ịyaar emuton ọphue.