Asidogh 25 - Ạḍinya Iigbia

Ịnon asidogh ạSolomon

¹ Ịphen kụ ịnon asidogh ạSolomon dị awe ịtooghi ọta ọsighe sịphe ogiga ạHezekaya ọdaam mọ aJuda.

² Yira ọngo Ẹnaan eghuan esi ạraraar dị ọdi ạaghi; yira ọngo eghuan bụdaam esi ạraraar dị bịdi ọgba ọogbunion.

³ Nạ ólhegheri ịdi ọdaam rạatughian; ịitughian ọdi ipel iyira ịdipho ạḍikel okuaḍio ḅịle mụdi ạḍikel-ude otu-ḅualhe.

⁴ Sịghiogh ịzeghe sịphe asilva phọ bịn oye ọlem mọ kamitiom ni ịyaar dị ẹnighe.

⁵ Gbọle we ọkaraph oroma loor ọdaam mọ bịn ịtooghi ọdi kesel li.

⁶ Mem dị nạ ạmeera ghisigh ọdaam mọ, kạ́ḅem mọ ịma ịdi nạ kaḍighi, bịn ạpu aḍighi mụdi nạ ogbogh oye.

⁷ Ẹnighe epu dị ọdi ạḅeni nyịna ọsighe ogbogh ạgada rꞌọḅeni ạna mọ ḅetenu ạgada ogbogh oye.

⁸ Kạ́nuun ọghi otu ịiruen esi ịyaar lọ nạ ạmiin. Eḍighi mạar dị ọnon oye-ọgbaanaan aḍeenaan mọ ịpe nạ mạghaaph bọ ọkpe ni, nạ kaḍighi ika mem mọ ọpo?

⁹ Eḍighi mạar dị amatuman ạna rꞌạna kụ ạmuḅoph úlho, ịtuugh bịn ẹphomoghian siloor anyina kụ kẹ́kaaph ịyaar lọ eeghian esi ogbo awe.

¹⁰ Ịdipho kụ ílho, pọ tọrobo oye kalegheri mọ nyina kétue ẹbooghi ịyaar kụ nyina kékpetenaan umugholoor.

¹¹ Ekpo ọnhu dị ọmaar ọghaaph ẹkigh ịdipho agol dị oselemi kụ ọḅam ạnyu asilva.

¹² Ọphur ạruru dị ạḍua esi oye olegheri-ịyaar kụ ạteeny oye dị rạwa ọnaghan, ẹmoogh sụo epu sigulu agol ḅịle mꞌikpo ẹbe dị ọlhemom ogey agol.

¹³ Otelhedom oḍuom ologhi rạpoomi ghan ologhi ọpo arom bọ nyọdi dom mọ, ịdipho ạmubo ạmuum rạpoomi ghan bọ loor oye mem ibugha.

¹⁴ Awe dị oguan rạraar dị bịdi útue ụ́ngo, ọkigh ọotu rꞌoghim dị ọlophia ụ́daphan.

¹⁵ Ịiḅereghian dị ẹḅaram ọkparam ketue ni egboton rạraar dị ekikima, ẹḅile ekiton iloghi awe ạgada ịiruen.

¹⁶ Kạ́laay ẹnuum aḍiowo dị epel ịdi aloor ạna ẹwa; ẹphughan, pọ keḍighi ịdi nạ kazuughi.

¹⁷ Kágbor amitiani kꞌamatuman ạna; kẹper ọmiin ạna bịn ạlogh nyịna ḍien.

¹⁸ Ọgbaanaan oye ịyaar lọ oye phọ úḍighi epin ịdipho isiko, ẹḅam, ḅịle mꞌẹkpina lọ ọkpol.

¹⁹ Ọkpasi emooph oye dị ụ́kpe oḍuom ologhi mem ịiḅaghami ẹkigh mụdi rọtaalom ọlaay dị rapiigha, ḅịle rꞌorelhiom ẹgha owol.

²⁰ Ọmoor ạsuor ophoghomiom oye dị ologhi ụ́ḅaal ẹkigh mụdi ọkporion ạsuoma ọdi ḍio ẹephoom, ḅịle mꞌogbul aboph loor esi dị obena.

²¹ Eḍighi ịyaar dị ọkoony rasiph bụmulogh-ḍien, ngọ nyọdi eḍien; ạmuum kụ rạpu, ngọ nyọdi mụum.

²² Nạ kaḍighi ịdi umugholoor kasiph nyọdi, kụ Ọmoogh-we phọ kamuzeḍinaan nyịna.

²³ Ịkalaghian remitiom ghan ophin-ologhi ịdipho oghim ephunom mọ ratumom ghan bọ ọlophia.

²⁴ Ẹnighe epu orugh ạnyu otu phọ rꞌorughan oniin otu rꞌạnir ạḍinmooma ạḍiaḅa.

²⁵ Ọnaghan igey iphirigba dị ẹḍua ẹekela ekpisi kụ eru, ẹkigh ọphughol ạmubo ạmuum mem lọ ẹḍogh oye ẹekaraghan.

²⁶ Ogey oye dị ạdaph oye dị ụ́nighe ạkighima okol ạmuum dị mọphue rꞌaghuḍia dị ọlogh ọogho aḍuugh.

²⁷ Eboom ẹnuum aḍiowo ị́nighenaan nyịna; ịduon kẹn kụ ịdi ẹrol mem dị oye rạwa iboom ịsephian.

²⁸ Eḍighi mạar dị nạ kátue ạpamaghan ophin-ologhi ạna, nạ ạkigh ẹmha dị iikpe íkoom, kotue ni ozuom ẹgham.