Asidogh 24 - Ạḍinya Iigbia

-19-

¹ Kágbeghe ghuḍum ạbukaraph awe, kụ káḍighi rịghiri rꞌạbidi.

² Oḍighi ịiḅaghami bịn kụ ẹdi bịdi rọotughian ghan; tọrobo amem lọ bịdi ọtagharan ọnhu ạbidi, pọ oye kaḍighima mạar.

-20-

³ Otu rophighiom ghan olegheri ịyaar rꞌọnaghanan ạḍughum kụ eḍighi ephighiom aruutu phọ ịpe nạ ạlogh bọ rạkiom.

⁴ Esi dị olegheri-ịyaar odi, rọsighe ghan igey ạraraar dị ẹman mạar kọdiom iisoph phọ.

-21-

⁵ Ọmoogh olegheri-ịyaar kụ ịnighe epu ọmoogh ịnyaam. Igey ni, olegheri-ịyaar kụ ạman mạar apu ịnyaam.

⁶ Ịlo ẹrol ẹrol, ẹkpe ni dị nạ kạmaar agbiighi kụ agbi ee ẹgham. Nạ ạmoogh ogey oroma kụ ẹdi nạ kạkpar apu.

-22-

⁷ Asidogh olegheri-ịyaar ẹkpar ri dị uwelologhi kạnaghanan. Ọdi ọ́moogh ịyaar ọḅem mem lọ rọkaaph ịyaar lọ eḍighi ephigh.

-23-

⁸ Eḍighi mạar dị nạ rạmoogh ghan ịkaraph igbiighi oomo amem, aḍien ạna kẹpu ni mọ nạ oye ịiḅaghami.

⁹ Oomo igbiighi dị uwelologhi ạmoogh, pọ ịkaraph. Awe okel oye dị ịnon rạ́atughian, emuton ọmilogh ạbunon awe.

-24-

¹⁰ Eḍighi mạar dị nạ adugh mem igbogh ịiḅaghami, pọ nạ ạkar ri adugh.

-25-

¹¹ Káakpukian ọtagharan oye lọ rọwa osin dị mạar ụ́piom.

¹² Nạ kạḅem mọ kị́iḅaghami ạna kụ ạri Ẹnaan elegheri ni igbiighi ịpe ologhi phọ ạna. Ọdi raphogh ni nyịna; ọdi alegheri ni kụ ọdi kaḅulemian nyịna ạdaphan ịpe nạ aḍighi bọ.

-26-

¹³ Mọony phọ, lạay ghan ẹnuum aḍiowo. Ẹnighe ni. Kụ ịdipho ẹnuum aḍiowo dị omiim sịphe ịgumogum mọ rẹmen ghan bọ sịphe anem mọ ạna,

¹⁴ nạ kalegheri ni mọ olegheri-ịyaar ạnighenaan ni uwaloor phọ. Mọogh olegheri-ịyaar bịn kẹnighenaan nyịna.

-27-

¹⁵ Kạ́kigh ọkaraph oye phọ ragbiighi ghan bọ omi aruphua ogey oye ḅịle mꞌọsighe ọto kꞌọdi ọḍuanam.

¹⁶ Tọrobo ọnhu amem lọ oye aruukuan ameel, ọdi kạḅile ni aḅetenu. Kụ igbogh ịiḅaghami keguulemi ni oḍighinom ịkaraph.

-28-

¹⁷ Kạ́moogh iboh mem lọ ẹpomoghian ạna ạmoogh ịiḅaghami kụ ọḅaal ologhi kụ́tol mem lọ ọdi akpetaan.

¹⁸ Ọmoogh-we phọ kalegheri ni mụghumo nạ rabo ni iboh, kụ nyọdi kẹ́ḅeeraan, kụ iini Ọmoogh-we phọ nyọdi kạ́liom.

-29-

¹⁹ Kámeera ịkaraph awe ọoḅaghami nyịna; kágbeghe bịdi.

²⁰ Ọkaraph oye ọ́moogh oḍuom ologhi iḍueneen — ịyaar ophogh kụ ọmin ịghor ílho.

-30-

²¹ Lọgh eegu Ọmoogh-we phọ, mọony ạmi, kụ aghueni ọdaam. Kạ́moogh ịyaar oḍighinom bụphe rọḅaar bọ ẹmhu esi ạbidi;

²² ọdo awe phọ ạbuphe kotue ni oogulemi onyam-ọḅatan. Nạ alegheri ni mọ Ẹnaan ḅịle mꞌọolha katue ni ạngo bịdi igbogh ịiḅaghami.

Ịnon ikpo ọnhu olegheri-ịyaar

²³ Awe olegheri-ịyaar ọḅile ọḅem ịduon: Ebeeph ni dị oogboom ịiruen kaḍighan ḍiniin ạga.

²⁴ Eḍighi ịyaar dị ọdi agheelemi oye lọ aḍighiton ephum, tọrobo oye kạḍagha ni ạḅitonaan nyọdi.

²⁵ Kụ ọlo, abuugboom ịiruen dị rọliom ghan bụphe ephum bọ koḍum ni kụ ọḅile ọtolom ḍiiḅi aḍien.

²⁶ Ogey ọphagharanaan aḍeenaan igey ạrighiri.

²⁷ Ḅephogh iizo ạḍighaagh ạna kụ agbi ọlogh otu.

²⁸ Kạ́gba sịagba apume oye dị ịyaar ẹmhu ụ́piom ḅịle mꞌọghaaph ạraraar ọphuenom ọdi.

²⁹ Kạ́ḅem mọ, “Mị kaḍighi aani ni nyọdi ịpe ọdi uḍighi bọ ịmi! Mị kaselan ni rꞌọdi.”

³⁰ Mị urelhe aten ozo rꞌoghoony iimuma oghiil uwo ẹgbogholeer.

³¹ Ariisi phọ iitoor rꞌọmirimiir kụ imuza. Oghoony asighiigh phọ akoom bọ riisi phọ mameel.

³² Mị aphogh ịphen phọ ạman, kụ mị ạmoogh ịyaar ọtuugha sịphe phọ.

³³ Nyam ẹnum, ẹḅeeraan nyịna ạkuami ạnaani. Kura rạghaagh aphooghian ẹphurukpu,

³⁴ kụ mem dị nạ rạnaani, ekulom kezuom nyịna ịdipho ọḅa dị ạpham rẹenema.