Asidogh 23 - Ạḍinya Iigbia

-6-

¹ Mem dị nạ ạrol ude olian rꞌogbogh oye, legheri ọdo oye phọ ọdi aru bọ.

² Eḍighi mạar dị nạ ạmoogh oboom ooko, pạma loor ạna.

³ Kále gbuagh gbuagh ịma eḍien phọ mọngo bọ nyịna; iini ọdi rạwa ghan olegheri ọdo oye lọ nạ aru.

-7-

⁴ Tọlom rꞌolegheri ịyaar bịn nạ kakiigha loor ạna mọ nạ rạwa ẹelha.

⁵ Iini ikpoki ạna kẹḍua ni onyam-ọḅatan, mụdi ẹmoogh raphaaph kụ ẹpeeph ẹḍua ịdipho uga ẹnun.

-8-

⁶ Kạ́lian eḍien uwo ịkaraph mụghumo ọmoogh eboom ekpooko olhe ịma eḍien phọ ọdi ạḅam bọ.

⁷ “Tue ạḅile alhe,” ọdi ạḅem kụ ọ́ḅemom rꞌoomo ologhi. Ịpe ọdi ạatughian bọ kụ ịdi ọdi ạrol.

⁸ Nạ kazuughi ni ịpe nạ malhe bọ kụ oomo iitumani phọ ạna kepe ni.

-9-

⁹ Kạ́aḅaghamian ọghaaph ọghaaph ologhi ọḅeni uwo elologhi; ọdi kạ́miin mọ nạ ạkaaph ni ịyaar.

-10-

¹⁰ Kádighiron ịyaar lọ eḍeenaan ọku bịn ạsighe de dị eḍighi ẹlo ạbunyigo ạnmuny.

¹¹ Ọmoogh-we phọ ạmoogh ịikpo dị rabianaan bịdi, kụ ọdi kạakonoghian ni ạpelom bịdi.

-11-

¹² Ler rụru ạnaghanan ọtughemia ạna kụ ạtuugha oomo ịlo nạ katue.

-12-

¹³ Káakpukian ọliom ọony. Egey ephumom kékiigh nyọdi.

¹⁴ Esi ọkar ọghaaph, iini kẹpel ghuḍum ọdi.

-13-

¹⁵ Mọony phọ, nạ ạmoogh olegheri ịyaar, kẹḅaal li ologhi ạmi.

¹⁶ Mị kaabagaam ni nyịna mem dị mị ạnaghan dị nạ rạḅa ikpo ọnhu ologhi.

-14-

¹⁷ Kágbeghe ghuḍum ạbukaraph awe; ọlogh eegu Ọmoogh-we bịn kụ eḍighi ḍịḅeeraan aghuḍum ạna.

¹⁸ Eḍighi ni ịduon, pọ kẹnighenom ni nyina iḍueneen.

-15-

¹⁹ Ler rụru, mọony ạmi, mọogh olegheri ịyaar kụ ạpham igbiighi dọl phọ ạna.

²⁰ Kátelhian we dị rọpughol ghan miim iboom mꞌạbulo role ghan eboom eḍien.

²¹ Ạbupughol miim rꞌawe eboom eḍien komeel li ekulom. Eḍighi mạar dị oomo ịitughian ạna kụ eḍighi olhe eḍien rꞌọnaani ạralha, pọ kébia bịn nạ kamuuna ghan ịghelhe arukpe.

-16-

²² Nạghanan ọde ạna; ọdi múlho bọ, nạ múmite. Mem lọ onhiin ạna mạkpo, kueni ni nyọdi.

²³ Igey, olegheri ịyaar, ịtuugha rꞌiiḅi ịitughian — ịphen kụ ịnighe ogho, ẹpughan aal.

²⁴ Ọde ọony aruukuan ạmoogh egey ẹmhu ọtuan ọḅaal ologhi. Nạ kaabagaam ni mọony olegheri ịyaar.

²⁵ Ḍighi ịdi ọde rꞌonhiin ạna koobagaam nyịna; ngọ onhiin ạna ọḅaal ologhi phọ ọpo.

-17-

²⁶ Mạar ạnaghan, mọony phọ, kụ ạtuugha dọl phọ ạmi kụ ạdaph!

²⁷ Abulhiom ẹmha rꞌạbukaraph ạnmariir aḍiphil dị ọkpami ọziom awe.

²⁸ Bịdi rogon nyịna mụdi ạruḅa dị ạaghian eten kụ oḍighi ịdi ịbadi alephiri kópogh mun nmạriir ạbidi.

-18-

^29-30 Uḍeenaan ịmi oye lọ rạpughol ghan miim iboom, dị rạwa ghan ọonema mụnon amumoom amiim, kụ mị kaḍeenaan nyịna oye dị ạdol eeph kụ ramoghinaan loor, oomo amem rạngo ghan ịiḅaghami, kụ oomo amem rạkaaph dị oḍighi nyọdi ịdi ị́nighe. Ariḍien ọdi tọgh tọgh tọgh rꞌareḅephe dị ị́kpe ọmoogh.

³¹ Kạ́moogh ekpooko amiim ịlo ạtogh tọgh, ghạlamo aphul kụ amiteghom ikpo ologhi ẹgo phọ kụ adugh ọphughol.

³² Ẹḅaal ḍịroor nạ kaloghoma mụdi ẹkaraph-ịyaar kụ ilhom nyịna.

³³ Nạ kạmiin ikon, kụ nạ kátue ạatughian ịyaar ḅịle ạḅa amitiom ịdi kọnaghan.

³⁴ Kẹkigh mụdi nạ mamite otu-ḅualhe, rꞌẹzegh ọphiiny ologhi oghuugh.

³⁵ Nạ kạḅem mọ mịgur ịmi, “Ẹkigh mụdi mukuphogh ịmi kụ mị úloghoma. Eeghe kụ mị kátue bọ aḅetenu? Mị rạwa mụnon amiim.”