Asidogh 22 - Ạḍinya Iigbia

¹ Oghimanaan nyịna ḍiiḅi aḍien rꞌegbogh ẹelha, pin ḍiiḅi aḍien.

² Ọolha phọ rꞌuwekulom mọ ọḅophan eniin ịyaar; Ọmoogh-we phọ kụ ạlhem ịyal ạbidi.

³ Awe ịitughian kọmiin ịdi ịiḅaghami retu kụ ọgbol; kụ ọpo ụ́moogh bọ igbiighi katelhe ạki asuma kụ ạḅem mọ eeghe kụ isu ịmi.

⁴ Nạghanan Ọmoogh-we phọ, asooromi loor, bịn nạ kạmoogh ẹelha rꞌeghuan, ạḅile ạtol abia.

⁵ Nạ ạphomoghian ghuḍum ạna, pọ kẹlan ḍiphil dị kesiph bụkaraph awe eten erelhe ạbidi.

⁶ Tụghemi mọony ịlo ọdi kạtol, bịn ọdi kạatughian ghan ni oomo aghuḍum ọdi.

⁷ Arukulom mọ kụ ạrebene ạraalha phọ. Le ọmugh oye bịn nạ maḍighi ẹbene ọdi.

⁸ Nạ ạzuph ịizupha ịkaraph ịiruen, ịiḅaghami kemite ni, kụ ọgbiphoghom ạbunon phọ ạna kekunughian ni.

⁹ Nmo inmo kụ adian eḍien ạna rꞌarukulom. Nạ kạmoogh ni ḍịseph loor ịpe phọ.

¹⁰ Kátelhian oye ophoophe aloor, bịn ipakian rꞌọruonu rꞌọtaaghi asiḍien kẹ́tol mun.

¹¹ Nạ ạmoogh ọserereeny ologhi rꞌegey ẹghaaph ịyaar, pọ ọdaam mọ kạsighe nyịna rịghiri.

¹² Ọmoogh-we phọ akel ikpo ọnhu ọgbaam ọkpe, ọmiin mọ igey phọ ẹmeera ni.

¹³ Uwo ẹgbogholeer odi otu rạḅem ghan mọ ọno amite erugh ạnam-dịka kesiph nyịno.

¹⁴ Olhe ẹmha — aḍiphil dị resiph ghan bụphe Ọmoogh-we phọ rạkagham bọ ologhi phọ.

¹⁵ Ịbam ạnmuny ọmoogh eghiil eḍighinom ịyaar, rạraar dị ị́kpe dị koḍighi, kụ ọkuami ophum esin ạbidi kẹtughemi ịlo ọmaar ọrol.

¹⁶ Nạ ạngo ruunmo we dị ọmoogh, mụghumo ạgbiphoghom rukulom kụ oḍighi ogbogh, nạ rꞌaloor kameel li ekulom.

Ịraardi ikpo ạraraar dị awe olegheri ịyaar ọḅem

¹⁷ Ler rụru ạnaghan, kụ mị kạtughemi nyịna ịdi awe olegheri ịyaar ọḅem. Tụugha ịtughemi phọ ạbidi,

¹⁸ kụ kẹdugh ni esi ạna lọ nạ ạatughian ghan kụ ạḅem ghan.

¹⁹ Mị rạwa mọ kpạsi ologhi ạna esi Ọmoogh-we phọ; ịduon kụ iḍighi kụ mị rạḅeni bọ nyịna nyịidipho.

²⁰ Mị mạge ịraardi ikpo ạraraar aseenaan nyịna. Sịphe phọ olegheri-ịyaar rꞌogeny oroma kụ odi,

²¹ kụ ạtughemi nyịna ịyaar ọkar igey phọ, kụ mem dị orom nyịna ọwa omitiom, nạ kạpam ọkar ogey ọphagharanaan kụ atumom.

-1-

²² Káagbegheḍiom uwekulom loor esi dị nạ katue ni; káagbegheḍiom we lọ ọloghonaan ạḍighaagh úlho sịphe otu ịiruen phọ.

²³ Ọmoogh-we phọ kạgbaanaan ni ḍighiton bịdi kụ ạpaar oye lọ ạpaar ghuḍum ạbidi.

-2-

²⁴ Káḍighi rịghiri rꞌawe lọ ọmoogh ẹghologhol ekpom.

²⁵ Iini sịen nạ ạtuugha rạaghara ạbidi bịn onmia kạkpar ri.

-3-

²⁶ Kạ́merenyan ọkpianaan ịimugh lọ ọnon oye kụ alhe.

²⁷ Eḍighi mạar dị nạ útue ụkpe, bịdi koḍighi eḍighi ghạlamo rꞌẹmina ạna ọḍuanam.

-4-

²⁸ Kátuphuron ịyaar lọ eḍeenaan ọku dị ạburude ạburude ạna kụ oseere.

-5-

²⁹ Uḍeenaan ịmi oye dị aḍighi ogey oḍighi, kụ mị kaḍeenaan nyịna oye dị ạnighe apu ịbadi kụ ạkpe orelhian ạraalha.