Asidogh 20 - Ạḍinya Iigbia

¹ Iboom ịpughol pọ oopolha ọghaaph rꞌelologhi. Eḍighi dọl uwo elologhi ọphughol amiim dị kakiigh.

² Kiilaan ọdaam lọ ịyaar repin ologhi ịdipho nạ kakiilaan ghan bọ ạnam-dịka dị rạkughian; oḍighi ịdi kepin ologhi ọdi pọ oghiigha aloor.

³ Tọrobo uwo elologhi kamiigh ni ipakian; ịyaar dị eḍighi eghuan ọrol esi lọ ipakian ílho.

⁴ Oḅephom ozo dị aḍighi uwo ẹgbogholeer iboom mem dị ẹkpe oḅeph ozo ọdi kạ́moogh ẹlo obugha.

⁵ Ịitughian oye ẹkigh mụum aghuḍia dị ạkel ude, kụ oye dị ạmoogh ọnaghanam ạḍughum kaḍu ni amitiom.

⁶ Ịbadibadi awe rọḅem ghan mọ ạbuno awe dị ọkpe ọkpasi oḍuom ologhi kụ wạ ophogh mọ kọmiin ni rꞌoniin.

⁷ Ịbam ạnmuny ozuan iiḅi eḍighi ịyaar dị bịdi ọmoogh ọde aruukuan dị raḍighi ghan ịdi ẹnighe.

⁸ Ọdaam mọ ạtolom ạgada ịiruen kụ alegheri ọpioman mem dị ọdi ạmiin.

⁹ Oye katue ni ạḅem mọ ịkaraph ílho ologhi ọno, mọ ọno mạwileghi ịkaraph ọno ḍụghum?

¹⁰ Ọmoogh-we phọ akel we lọ oboolom ịtoom ẹemor rꞌạḍidoony dị íileeny.

¹¹ Ghạlamo ọony bịn aḍeenaan ni ọdo ọony dị ọdi aru esi eḍighinom ịyaar ọdi. Ịphen kụ ịdi nạ kalegheriom mụghumo ọdi ạnighe mꞌọ́nighe.

¹² Ọmoogh-we phọ mụngo iyira riḍien ọmiinom rꞌareḅeri ọnaghanam.

¹³ Eḍighi ịyaar dị nạ aphiemi mem ạna ạnaani, nạ kaḍighi uwekulom; kumuan bịn nạ kạmoogh ni eboom ẹlo ole.

¹⁴ Ọpo rako bọ odi ghan ọḅem mọ aḍighi ẹki ạnyu ẹpughan; kụ ọdi kạḍua kụ aatuma ịdi etenenaan nyọdi.

¹⁵ Nạ alegheri ni ịyaar dị nạ rạkaaph bọ, nạ ạmoogh ịyaar dị ẹman mạar epu gol rꞌịbekulari.

¹⁶ Uwo elologhi dị kaguanaan ọkpianaan ọmugh ooruen oye, pọ ạkpe ni dị kọpam ruphua ọdi esi oguanaan phọ.

¹⁷ Ịyaar phọ ẹpe nạ ạmoogh bọ reten iigbegheḍiom kẹdugh esi ạna ịdipho egey eḍien, kụ kébia bịn kẹkigh ẹezua ịisaar dị ọlogh ọnhu.

¹⁸ Sịghe ogey oroma bịn kẹnighenom ni nyịna; ụ́ki ghan ẹgham dị nạ úukolobian.

¹⁹ Oye ịkalaghian kạ́pam ezue; kátuman weye dị ọghaaph rạ́per ghan.

²⁰ Nạ aronyon ọde rꞌonhiin ạna, aghuḍum ạna kakureri ịdipho ọtozi dị aḍim ufiri.

²¹ Ẹelha dị nạ ụ́miinom kụ ạmoogh kéḍighi egey ịyaar ẹngo nyịna.

²² Nạ kụ kạ́kpe ịkaraph dị oye aḍighi nyịna. Ḍuom ologhi Ọmoogh-we phọ bịn ọdi kaḍighi ni ịdi kẹnighe.

²³ Ọmoogh-we phọ akel we lọ oboolom ịtoom ẹemor rꞌạḍidoony dị íileeny.

²⁴ Ọmoogh-we phọ mạsam ni eten ayira. Ika kụ ẹdi oye alegheri ạga phọ aghuḍum mọ ọdi rạki bọ?

²⁵ Mạar agbiighi kụ aguan oruomaan Ẹnaan ịyaar aghuḍum ọbo nạ kạḅem ghan bọ mọ eeghe kụ isu ịmi mem dị ẹman mem.

²⁶ Ọdaam dị ạmoogh ologhi kạwa ni amitiom oye lọ ạpioman, kụ ạliom nyọdi dị ọnma ighirigiir kạ́tol.

²⁷ Ọmoogh-we phọ ụngo iyira ologhi rꞌịitughian; yira kótue ọbooghinaan ịyaar siloor phọ ayira.

²⁸ Ọdaam kạtolom ạgada phọ bịn ạkiom eḍighi ịyaar dị ịtooghi ọdi ẹnighe esel kụ oye ówiririom.

²⁹ Yira ọseph ịnyaam ugheel phọ kụ ọngo eghuan sụol ẹmhu okumoor oye.

³⁰ Eeni amem kokuphogh oye bịn kụ ọdi agbi onme eḍighinom ịyaar phọ ọdi.