Asidogh 2 - Ạḍinya Iigbia

Aruunmo ọmoogh olegheri-ịyaar

¹ Mọony ạmi, tụugha ịlo mị ạtughemi nyịna, kụ kábula ịlo mị ạḅeni nyịna oḍighi.

² Nạghanan ẹḍogh olegheri-ịyaar kụ ạwa ẹmhu phọ.

³ Ii, lọm olegheri-ịyaar; ḅẹeḅereghi ọmoogh ịitughian.

⁴ Wạ ạkparami ịdipho rọwa ghan bọ silva dị ạaghian.

⁵ Eḍighi dị nạ ạdaphan, nạ kalegheri ịyaar dị oghiilaan Ọmoogh-we phọ aru kụ kedughanaan nyịna ọtuugha ịlo Ẹnaan.

⁶ Ọmoogh-we phọ kụ rạngo ghan ologhi; esi ọdi kụ ẹdi olegheri-ịyaar rꞌọnaghanan ạḍua aru.

⁷ Ọdi rạngo ghan pẹleeny rꞌeekpereghian we lọ olegheri Ẹnaan kụ ụ́ḅaram iḅuaḅua ạdol.

⁸ Ọdi raakpereghi ghan we lọ ọmaar ọpham bụnon, kụ akori ghan bụphe omeelom bọ nyọdi.

⁹ Eḍighi dị nạ ụnaghanan ịmi, nạ kalegheri ni ịlo eḍighi elhiom, ẹkpe, kụ eeleeny. Nạ kalegheri ịlo oḍighi.

¹⁰ Nạ kạsu ologhi, kụ olegheri-ịyaar ạna kạngo nyịna ḍidugh.

¹¹ Ọḅaranu ariḍien ạna rꞌọnaghanan ạna keekpereghi ni nyịna,

¹² ekikima nyịna oḍighi ịdi ị́nighe. Bịdi kẹgbole nyịna esi eghoroghan awe lọ roḍighi ghan ịlo ị́nighe —

¹³ we dị moghel dọl aruukuan kụ odi ufiri ạdol ạsipioghom,

¹⁴ we dị ọmoogh ḍidugh oḍighi ghan ịkaraph kụ olomaan oḍighi ghan ịkaraph elologhi,

¹⁵ we dị ụ́kpe oḍuom ologhi kụ kótue oḍuom ologhi.

¹⁶ Nạ katue ni ạḅitonaan tọrobo ạnir ipesi lọ ạwa ọteenyom ạna rꞌẹedugha ẹḍogh ọdi,

¹⁷ lọ ụ́ḅogh loor ụ́ngo olhom ọdi kụ awula iikunya aḍio apineen ọdi.

¹⁸ Nạ ạghi kꞌọdi, pọ nạ ratelhe eten aḍuugh. Ọghi ịsiphe phọ pọ otuman ẹmha iḍim.

¹⁹ Oye ólho dị ạghi kꞌọdi kụ ạḅile aḅula eten aghuḍum.

²⁰ Esi ịduon sịghe bugey awe ạmaam ghan, pịdi nạ ạdaph ghan ịgbaranuom aruwol aruukuan phọ ạbidi.

²¹ Awe aruukuan — awe eeḅi ẹzo — kọtol li de phọ ạḍien ayira.

²² Kụ Ẹnaan keziton ni we ẹkaraph eḍighinom sịen ade phọ kụ etuph buḍighinom ịkaraph ẹsighe ịdipho ạroogho dị asi ude.