Asidogh 19 - Ạḍinya Iigbia

¹ Ẹnighe epu oḍighi uwekulom dị ạmoogh iigbia aḅirini rꞌoḍighi uwelologhi dị rạgba ghan ọkpe.

² Oboom ọkururu dị ụ́ḅaram olegheri ịyaar ị́nighe; ẹ́moogh ọkparam kẹlogh nyịna esi ịiḅaghami.

³ Buniin awe ropiemi ghan siloor ạbidi loor eghiil eḍighinom ạbidi kụ ọkpalham Ọmoogh-we phọ.

⁴ Ạraalha rọmoogh ghan ạrighiri oomo amem, kụ arukulom mọ útue ụpham ịphurukpu ạrighiri phọ ạbidi ọmoogh bọ.

⁵ Eḍighi ịyaar dị nạ ạgba ọkpe otu ịiruen, kọliom ni nyịna — ịlo okpetenaan kẹ́tol.

⁶ Tọrobo oye kạwa mọ igbogh awe ọmoogh ḍịḅeeraan ọno; tọrobo oye kạḅem mọ ọno ọyaghiri ạbuphe kotue bọ ọngo inmo.

⁷ Oye ólho dị ạmoogh ịyaar oḍighinom uwekulom, ghạlamo rꞌabumor ọdi. Ịikia ílho ọdi ọ́moogh rịghiri. Ọdi ạwa ịlo ạwa, rạ́moogh rꞌoniin.

⁸ Ḍighinaan loor ạna igey; tụugha oomo ịlo nạ katue; kụ ạatughian ịpe nạ ạtuugha bọ bịn kẹnighenom ni nyịna.

⁹ Oye ólho dị kạgba ọkpe sịphe otu ịiruen kụ kakpetenaan ọliom; ọdi ape ni.

¹⁰ Aruwo elologhi kụ́tolom dọl igbogh, kụ ạrebene kụ́tooghi ụngo rạalha.

¹¹ Nạ aḍighi oye ologhi, pọ nạ kạpama ofughughuuny ạna. Mem dị oye ạpioman nyịna, eḍighi eboom ịma ophogh ọḅitonaan.

¹² Ophin ologhi ọdaam eelhe amite ịdipho ogbophaan ạnam-dịka, kụ ạghusan ọdi ạkigh ọlophia dị okori ghan.

¹³ Ọony dị ologhi úlho kapiemi ni ọde ọdi; ạnir ạḍiaḅa ạkigh ịdipho ạmuum dị rạteph ghan bịn.

¹⁴ Oye kale ni erua otu rꞌikpoki ọde rꞌonhiin ọdi, kụ Ọmoogh-we phọ bịn kụ kạngo nyọdi ạnir lọ ạsu ologhi.

¹⁵ Ḍighi uwo ẹgbogholeer mụghumo ẹḅeeraan nyịna; nạani ạghiom kụ ọkoony kasiph ni nyịna.

¹⁶ Kooko iilogh Ẹnaan bịn nạ kạtol li abia; nạ ạḅitonaan, pọ nạ kamugh ni.

¹⁷ Mem dị nạ ạngo rukulom mọ, ẹtol mụdi nạ atene ọmugh Ọmoogh-we phọ, kụ Ọmoogh-we phọ kụ kạkpe nyịna.

¹⁸ Lịom nmụny ạna mem dị bịdi oghom dị kotue ọtuugha; nạ ịdipho óḍighi, pọ nạ rạloghonaan bịdi ḍịghaagh ophiemi asiloor ạbidi.

¹⁹ Oye lọ ạmoogh ẹghologhol ekpom, bịle ọdi ạsighe ịikpia phọ. Nạ ạphel nyọdi ạsighe esi ịiḅaghami mem, nạ kạḅile ni ạpel.

²⁰ Nạ ạnaghan oroma kụ ameeraam ọtuugha, eniin aḍio olegheri-ịyaar kạteeny ni nyịna.

²¹ Awe kọmoogh ni igbiighi kịrokiro, kụ ịpe Ọmoogh-we phọ agbi bọ bịn kụ kemite.

²² Eḍighi ni roofola ọpaghaghaam amalhe; arukulom kụ ụnighe opu bụgbaam ọkpe.

²³ Nạghanan Ọmoogh-we phọ bịn nạ kạtol dọl dị kebia ẹgbaanyan, ạḅile akpetenaan oḍighima ịyaar.

²⁴ Buniin ọmoogh ẹgbogholeer dị kótue ọsighe eḍien ọlogh ọnhu ạbidi.

²⁵ Ophoophe aloor ạkpe ni ọliom, pịdi awe dị ịyaar úlegheri ọmoogh ịyaar ọtuugha. Nạ alegheri mạar, nạ kạtuugha ni mem dị ooleminaan nyịna.

²⁶ Eḍighi dị oye ạgilaam ọde ọdi, ạḅile aphorogh onhiin mọ ạḍua otu ọdi, pọ oye phọ ọpo maḍighi ịlo umugholoor rꞌịlo ạḅaphanya.

²⁷ Mọony phọ, mem dị nạ ạwile ọtuugha, nạ kạnuun ni abula ịpe nạ malhegheri bọ.

²⁸ Ịiruen ílho ghan mem dị ọgbaanaan mạḅem mọ ọno kaḍighi oye ịdi ị́nighe. Awe ẹkaraph eḍighinom ịyaar ọpomoghian ọonema ịkaraph.

²⁹ Uwo elologhi dị aphoophe loor kaazuanan ni ikuphogh.