Asidogh 18 - Ạḍinya Iigbia

¹ Awe lọ rótelhian ghan bụnon awe, ịpe aloor phọ ạbidi bịn kụ ịḅeeraan; bịdi kómeeraam ịpe oomo ạbunon awe olegheri bọ mọ ẹnighe.

² Uwelologhi ọ́oḅaghamian loor mụghumo ạnaghan ịyaar mọ ọ́naghan; oomo ịdi ọdi rạwa, oḍeenaan mọ ọno alegheri mạar.

³ Ạsipioghom rꞌumugholoor kụ rotelhian ghan; mutonaan eephoogh ạna bịn nạ kạmiin ni itulughian.

⁴ Ikpo ọnhu oye ologhi ẹkel ude ịdipho otu-ḅualhe ọphiiny, ẹḅile ẹserere ịdipho okol ạmuum dị rakil.

⁵ Íḍighi elhiom oḍighan ọpo ephum bọ kụ okikima ọpo úlegheri bọ ọmoogh iiḅi ịiruen.

⁶ Uwelologhi lọ amiigh ipakian rạwa ghan ikuphogh.

⁷ Mem dị uwelologhi ạḅa, ọdi rạpuenaan ghan loor; ikpo ọnhu phọ ọdi kụ kạkoroghi nyọdi.

⁸ Ịkalaghian rẹdugh ghan ni iboom — ẹnighe ọmin.

⁹ Uwo ẹgbogholeer abeeph ịdipho oye lọ rạpue ghan rạraar.

¹⁰ Ọmoogh-we phọ ạkigh ẹkul otu, esi dị awe aruukuan kọki kụ ọbooghian.

¹¹ Ạraalha rogbi ghan mọ ẹelha ạbuno kekoph ni bụno ịdipho iiphopha iḅidi dị ekoom egbogh ẹmha.

¹² Oye ólho dị rọngo ghan rughuenian emuton lọ masooromi loor. Awe ophoophe aloor rotelhe ghan eten amuphe.

¹³ Nạghan kụ agbi ọphagharanaan. Nạ óḍighi ịduon, pọ nạ uwo elologhi rꞌosu ọnhu.

¹⁴ Nạ ạḅem mọ nạ kámugh pọ nạ kaḍum ni mem dị aloor ạna kụ ị́nighe, kụ ologhi ạna eeph pọ oḍuom ologhi ạna ólho mun.

¹⁵ Awe olegheri-ịyaar oomo amem ẹḅeeraan ọkururu ọtuugha.

¹⁶ Nạ rạwa ọmiin ogbogh oye ḍụghum? Kịomaan ruunmo bịn medugh.

¹⁷ Ọḅel oye lọ ạgba sịagba otu ịiruen kẹkigh mụdi ọdi kụ odi elhiom, tụtu ọphori phọ amiigh opuru asipuru.

¹⁸ Eḍighi ịyaar lọ ịyal ikakara awe kụ rọokonoghian esi otu ịiruen, odi-ẹdo bịn kụ kesoph ọoruen phọ.

¹⁹ Pẹl umor ạna ọdi ạḅaki ni nyịna ịdipho iḅidi dị ekoom ẹmha, kụ nạ ạruan rꞌọdi, ọdi kakughi ni eghuugh ọdi mem lọ ạmiin nyịna.

²⁰ Nạ kạtolan rꞌạtoro ịlo ẹdaphan ịlo nạ ạḅem.

²¹ Ịlo nạ ạḅem kẹpam ni ghuḍum mꞌepiemi. Nạ ạmoogh ọsighe ịlo ẹdaphan ịpe nạ ạghaaph bọ.

²² Mọogh ạnir bịn nạ ạteeny egey ịyaar; eḍeenaan mọ Ọmoogh-we phọ ạphomoghian ni nyịna.

²³ Mem lọ uwekulom rạkaaph, ọdi rasooromi ghan loor, kụ mem lọ ọolha phọ rạpagharanaan, ọdi oye eegu kạ́logh.

²⁴ Iniin ạrighiri rẹ́kpo ghan, kụ iniin ẹḅophan epu bumor.