Asidogh 17 - Ạḍinya Iigbia

¹ Ẹnighe epu olhe eḅigh ọgharaghar ạbred rꞌẹepho, rꞌolhe amugbogh amalhe otu dị ịiḅaghami emuza.

² Otelhedom dị ạsu ologhi katuman ọde-otu ọdi apu ọkar ọony dị ụ́moogh ịyaar oḍighinom, ạḅile ạteeny pạkiri erua oye phọ.

³ Ogey agol rꞌasilva kọlogh nịan kụ olegheriom, kụ ologhi oye Ọmoogh-we phọ bịn kụ ralegheri ghan.

⁴ Ạbukaraph awe rọnaghanan ghan ịkaraph ạraghaaph, kụ ạbugbaam ọkpe rọnaghanan ghan ọkpe.

⁵ Nạ ạmilogh uwekulom pọ nạ ạgilaam Ẹnaan phọ ẹlhem bọ bịdi. Kọliom ni nyịna eḍighi mạar dị nạ ạmoogh iboh mem dị ịiḅaghami kụ emitenaan oye.

⁶ Ikumoor awe roobagaam ghan nmụny ạnmuny ạbidi, ịdipho ạnmuny koobagaam bọ bụrude ạbidi.

⁷ Awe dị moghueni rọ́gba ghan ọkpe, kụ ạbuo elologhi ụ́moogh egey ịyaar ọghaaph esi.

⁸ Buniin awe ogbi mọ oti ọman raḍighi ghan ịiḍaany; bịdi omeeraam mọ katue ni aḍighi tọrobo ịyaar.

⁹ Nạ ạwa mọ nạ ạḅeeraan we, pọ sạr ạwilenaan bịdi mem lọ bịdi ọpioman nyịna. Ọotughian ghan ọpioman rạgbarion ghan rịghiri.

¹⁰ Oye olegheri-ịyaar kọḅaam mem bịn ạnaghan kụ uwelologhi kọgurogh okuron amem.

¹¹ Aḍuugh ketu mụdi ọkaraph ọokpaany esi ịkaraph awe lọ rọkom ghan ịiḅaghami oomo amem.

¹² Ẹnighe epu oozuanan eephe-ạno lọ oziton mọony ọdi rꞌoozuanan uwelologhi lọ ạpham ọwalawala oḍighi.

¹³ Nạ ạsighe ịkaraph kụ ạkpiom iiḅi, ịkaraph kẹ́ḍua otu ạna.

¹⁴ Emiighom ipakian ẹkigh ẹḅel esi dị eruphaan iikpe dị ọḅiir; sophe ọbo kebugh ghan bọ.

¹⁵ Ọkpalham oye dị ụ́pioman rꞌọwile ọkaraph oye kạḍua dị ụ́liom — ịyal phọ ịdi Ọmoogh-we phọ akel.

¹⁶ Ị́ngo uwelologhi sụo olhiom ikpoki ọtuughaam ạḍinya, loor esi dị ịitughian nyọdi ílho.

¹⁷ Ạrighiri roḍeenaan ghan ẹphomoghian oomo amem. Abumor dị ụ́miin mem ịiḅaghami, pọ eeghe ọdo?

¹⁸ Oye lọ ịitughian ụ́moogh bịn kụ kạmerenyan ọkpianaan ịimugh ọnon oye.

¹⁹ Ọmoogh ạḍiḅeeraan ịkaraph pọ ọmoogh ạḍiḅeeraan ọwa asighiton. Nạ aphoophe loor oomo amem, pọ nạ rạwa ghan ịiḅaghami.

²⁰ Tọrobo oye dị ạatughian kạḅem ḍịkaraph kátue ạmiin ịyaar lọ ẹnighe — emuton rạraar oḍighi aḍiigu.

²¹ Ọde ọony uwelologhi ọ́moogh ịyaar emuton mukum ologhi rꞌokururu.

²² Ạreer kụ rạngo ghan oye omoon aloor. Oghire rạmagh ghan ḍuugh oomo amem.

²³ Ọkaraph oogboom ịiruen rale ghan oti ọman esi ịbooghian, bịn ogeny ọoruen kósoph.

²⁴ Oye olegheri-ịyaar aseere ologhi oḍighi egey eḍighinom ịyaar, kụ uwelologhi rạpam ghan ịbadi iiḍighi mem.

²⁵ Ọony elologhi ratuomaan ghan okururu ọde ọdi rꞌịitughian eghiḍim onhiin ọdi.

²⁶ Íḍighi elhiom oḍighi ịdi oye dị ologh úsoor kạkpe ịikpia apum. Mọgbole ọoruen mem dị ọliom oye dị ịyaar ụ́piom.

²⁷ Oye lọ ạphoomi loor bịn kụ rạ́ḅa ghan oomo amem. Awe lọ ọrol oḅoorian bịn kụ rọmiin ghan ịlo retu.

²⁸ Ọmaar ophogh, ghạlamo uwelologhi kogbi mọ alegheri ni ịyaar eḍighi dị ạrol aḅoorian kụ ạpham ọnhu ọdi.