Asidogh 16 - Ạḍinya Iigbia

¹ Yira otue ni ọmoogh igbiighi ayira kụ Ẹnaan kẹḅem bịn kụ emuneen.

² Esi ạna oomo ịlo nạ aḍighi ẹnighe ni, kụ ọlo Ọmoogh-we phọ kụ rạaḅeghion ghan ịitughian ạna.

³ Lọm mọ Ọmoogh-we phọ ạseph igbiighi phọ ạna, bịn nạ kaḍighi ni ạlogh ẹmhu oomo phọ ịne.

⁴ Tọrobo ịyaar lọ Ọmoogh-we phọ ạlhem ẹmoogh ni ọda, kụ ọda awe ẹkaraph eḍighinom ịyaar amuphe.

⁵ Ọmoogh-we phọ akel oomo awe ophoophe aloor; ọdi kámeera bịdi okpetenaan ghẹlhe.

⁶ Meeraam ạḅogh loor ạna ạngo, kụ Ẹnaan kẹsar ri ịkaraph ạna ẹwilenaan nyịna. Nạghanan Ọmoogh-we phọ bịn ịkaraph nyịna kémitenaan.

⁷ Nạ aḍighi ịlo ẹḅeeraan Ọmoogh-we phọ, ẹpomoghian ạna katen ọyaghiri.

⁸ Ẹnighe epu ọmoogh ẹphurukpu dị nạ agbo igey areten, rꞌọmoogh igbogh ikpoki reten dị ị́nighe.

⁹ Nạ atue ni ạmoogh igbiighi ạna, kụ Ẹnaan kụ keḍeenaan nyịna ịlo oḍighi.

¹⁰ Ọdaam mọ rạkaaphom ghan ịikpo kꞌẸnaan; ịlo ọdi ạḅem pọ igey ni.

¹¹ Ọmoogh-we phọ rạwa ghan dị oomo ịtoom ẹemor rꞌạḍidoony keeleeny, kụ tọrobo ibool, iigbegheḍiom kị́tol.

¹² Ạbudaam rómeeraam ghan ịkaraph, loor esi dị ịiruen dị esel kụ rẹkparami ghan ịtooghi.

¹³ Ọdaam rạwa ghan ọnaghan igey phọ kụ kạloghonaan ḍịghaagh bụphe ọgba bọ igey phọ.

¹⁴ Oye ologhi rạwa ghan oḍighi ịdi kẹḅeeraan ọdaam mọ; eḍighi ịyaar dị ọdaam mọ ạghagh ologhi, oye kamugh ni.

¹⁵ Ạghusan ọdaam mọ rạngo ghan ghuḍum ạkigh ọotu ọlophia emiighom aghozogh — aghuḍum odi sịphe.

¹⁶ Ẹnighe — ẹkar ẹnighe — ọmoogh ologhi rꞌolegheri ịyaar, kpạripe rꞌọmoogh agol rꞌasilva.

¹⁷ Igey awe rotelhe ghan eten dị ẹgbal ịkaraph; ịduon kụ iḍighi kụ mạar aphogh ẹpe nạ rạki bọ — etue ni ẹpel ghuḍum ạna.

¹⁸ Ophoophe aloor rạma ghan oogulaan, kụ oobaga aruomaan emeel.

¹⁹ Ẹnighe epu osooromi aloor kụ oḍighi uwekulom, rꞌoḍighi oniin ọdi raabaga kụ odian aruphua imi ạbidi.

²⁰ Ler rụru ạnaghan ịlo ọtughemi nyịna kụ kẹnighenom ni nyịna; kpạsaghi emooph ạna esi Ọmoogh-we phọ bịn ọḅaal ologhi kaḍighi ni ọlo ạna.

²¹ Oye ologhi dị mạmanam rolegheriom ghan nyọdi esi ọnaghanan ạḍughum ọdi. Ịdipho ikpo ọnhu phọ ọdi redugh bọ, ịdipho kụ ẹdi rẹḅogh rokpom awe.

²² Ologhi aḍighi okol aghuḍum esi awe ologhi; kụ ọkururu ọtughemi ighiil awe, pọ ophiemi amem.

²³ Awe ologhi kọotughian kụ ogbi ọḅem; kụ ịpe bịdi ọḅem bọ egbi nụun ọḅogh arokpom awe.

²⁴ Oodugha ọnhu ạkigh ẹnuum aḍiowo — ẹmen nem kụ ẹngo omoon aloor.

²⁵ Ẹpe nạ agbi bọ mọ elhiom eten etue ni ẹghimom nyịna esi aḍuugh.

²⁶ Oye lọ ophir oḍighi rạtuan ghan ọkuruḅaka kụ kakumuan, loor esi dị ọdi rạwa ghan oḍimighi ọkoony ọdi.

²⁷ Ạbukaraph awe rọwa ghan reten oḍighi ạbunon ịdi ị́nighe; ghạlamo ikpo ọnhu ạbidi bịn reemor ghan rꞌịkaraph.

²⁸ Ịkalaghian, ạbukaraph awe kụ roleenye ghan; bịdi roḅerion ghan sighiton kụ ọgbarion rịghiri.

²⁹ Awe ọwa asighiton rookeleghi ghan rịghiri ạbidi koseere ḍịkaraph ạdol.

³⁰ Mạar aphogh we dị ọmiin nyịna kụ ọyigh, kụ ọḅile ọmeephi nyịna; bịdi ọmoogh ni ịnon ịkaraph ịitughian.

³¹ Ọrol obia kụ ịikpia awe aruukuan; ạsuol ẹmhu eḍighi eghoony arughuenian.

³² Ẹnighe epu ọmoogh ọkparam, rꞌọmoogh ịnyaam; ọphamaghan aloor ẹnighe epu ọmaar ophogh ẹmha.

³³ Awe rodi ghan ẹdo olegheri ogbi Ẹnaan, kụ ọlo Ẹnaan rꞌaloor bịn kụ ịmoogh ọphagharanaan.