Asidogh 15 - Ạḍinya Iigbia

¹ Oodugha ọphagharanaan raḍime ghan ophin-ologhi, kụ ọgbagara ọnhu phọ raatieni ghan kaphoophe.

² Ọghaaph awe ologhi ratoor ghan we, kụ ikpo ọnhu awe elologhi ẹmhu ílho ghan.

³ Ọmoogh-we phọ rạmiin ghan ịlo emite oomo ariisi; ọdi rugon ni iyira mụghumo yira oḍighi igey mọ úḍighi igey.

⁴ Oodugha ọnhu rạngo ghan ghuḍum, kụ ịkaraph ikpo ọnhu rekiigh ghan uwaloor oye.

⁵ Eḍighi ni elologhi ọḅitonaan ịdi ọde ạna ạtughemi nyịna; eḍeenaan olegheri ịyaar ọnaghanam mem lọ oromoghiom nyịna.

⁶ Awe aruukuan kọmaar ri ọpam ẹelha ạbidi, kụ awe ẹkaraph eḍighinom ịyaar kotoḅologhi ịlo ạbidi mem dị ạraraar ẹkpar.

⁷ Awe olegheri-ịyaar kụ rọsuemi ghan we ologhi, káwe elologhi.

⁸ Ọmoogh-we phọ rạsighe ghan ịiḅereghi abugey awe, kụ akel rịkia lọ ạbukaraph awe ọphinyon ọngo.

⁹ Ọmoogh-we akel reten awe ạsipioghom, kụ ạpomoghian bụlo roḍighi ghan igey.

¹⁰ Nạ aḍighi ịdi eeph, kọliom ni nyịna agey; nạ kamugh ni eḍighi ịyaar dị nạ ạḅem mọ oye nyịna kútoma.

¹¹ Ghạlamo bụlo momugh bịn kókikima Ọmoogh-we phọ olegheri ịdi edi ọmar iḍim; ika kụ ẹdi oye kạbooghi ịitughian ọdi esi Ẹnaan?

¹² Awe igbogh ologhi rọ́wa ghan mọ oroma bịdi; bịdi ụ́wa bụlo ọmoogh olegheri ịyaar oroma bịdi.

¹³ Mem dị iloghi awe ẹḅaal, bịdi ọyigh, kụ mem dị iloghi ị́ḅaal, bịdi okururu.

¹⁴ Awe olegheri-ịyaar rọwa ghan ọtuugha, kụ élegheri-ịyaar ẹgbaanyan bụo elologhi.

¹⁵ Aghuḍum uwekulom oye odi ghan ọkparagha oomo amem, kụ ọde odianaan ni ghan bụo ọḅaal ologhi.

¹⁶ Kpạripe tọl dọl ekulom kụ ạlogh eegu Ọmoogh-we phọ, rꞌọmoogh ẹelha kụ ọrolom rꞌịiḅaghami.

¹⁷ Kpạripe le ịikiripha rꞌawe dị nạ ạphomoghian, rꞌạa ẹkar egey ephulupul ẹnam esi dị ạmulogh-ḍien kụ ọdi.

¹⁸ Ekpom remitiom ghan ịpakian, kụ ọkparam rạsighe ghan ẹepho karu.

¹⁹ Nạ aḍighi uwo ẹgbogholeer, nạ kaazuanaan ghan ịiḅaghami tọrobo esi, kụ iigbegheḍiom ekia nyịna, nạ kạ́moogh ịiḅaghami.

²⁰ Ọony olegheri ịyaar rạngo ghan ọde ọdi ọḅaal ologhi. Opokorodom rạḅitonaan ghan onhiin ọdi.

²¹ Ạbuo elologhi roboom ghan élegheri-ịyaar ạbidi, kụ ạbuo olegheri ịyaar koḍighi ghan ịlo ẹnighe.

²² Nạghanan oomo oroma lọ nạ arue, bịn kẹnighenom ni nyịna; oroma kụ ólho, pọ nạ maphe.

²³ Pọ eeghia iboh dị edinaan ọghaaph phọ ọnhu dị ẹkpianaan egey esi!

²⁴ Awe olegheri ịyaar rotelhe ghan eten dị ẹkar ọmoogh aghuḍum, kéten dị esoor ozuan aḍuugh.

²⁵ Ọmoogh-we phọ kaagulemi rughunotu awe ophoophe aloor, kụ ọdi kạmaar aakonom ruphua ekpukele ạnir.

²⁶ Ọmoogh-we phọ akel ịkaraph ịitughian, kụ ikpo ọnhu ẹphomoghian kụ ịḅeeraan.

²⁷ Nạ ạḅem mọ nạ kạmoogh sụo reten iigbegheḍiom, nạ kạlogh eghunotu ạna esi ịiḅaghami. Kále oti ọman bịn nạ kạtol li abia.

²⁸ Abugey awe kọotughian kụ ọpagharanaan. Ạbukaraph phọ rọnuun ghan kọphagharanaan kụ ẹkom ịiḅaghami.

²⁹ Mem lọ abugey awe ọoḅereghi, Ọmoogh-we phọ ạnaghanan, kụ ạḅitonaan ịlo ạbukaraph awe.

³⁰ Ọyigh rạngo ghan oye ọḅaal ologhi, kụ ooḅi ọghaaph ramoonomi ghan oye.

³¹ Eḍighi ịyaar dị nạ aler rụru mem dị roroma nyịna pọ nạ oye olegheri ịyaar.

³² Nạ ómeera mọ ọtughemi nyịna, pọ nạ raḍighi ịkaraph loor ạna. Nạ ạsighe oroma, nạ kạbughe.

³³ Ọlogh ghan eegu Ọmoogh-we phọ, ịtuugha ni rꞌaloor. Nạ kasooromi loor kụ nạ agbi ọmoogh arughuenian.