Asidogh 14 - Ạḍinya Iigbia

¹ Eghunotu kẹki ghisigh, pọ olegheri-ịyaar ạnmariir, kụ kẹ́ki, pọ elologhi ạbidi.

² Ḍighi oye dị ịkaraph úmeeraam bịn meḍeenaan mọ nạ ạlogh eegu Ọmoogh-we phọ; meeraam ịkaraph aḍeenaan mọ nạ ọ́lhogh eegu Ọmoogh-we.

³ Ophoophe aloor uwo elologhi rạngo ghan nyọdi ọghaaph oboom ọghaaph; oye ologhi, ikpo ọnhu ọdi rẹpel ghan nyọdi.

⁴ Ạbuo iḅeph phọ ílho, pọ ekue phọ kepoghogho ni; kụ ẹdi, pọ kemuza ni rꞌịbiakpa.

⁵ Oye-ọgbaanaan kụ aḍighi oye oḍuom-ologhi, pọ oomo amem kạgba ghan igey, kụ ọpo óḍighi ogey kạgba ghan ọkpe.

⁶ Awe ophoophe aloor kósu ologhi, kụ awe olegheri-ịyaar rọnuun ghan ọkpaph ịyaar ọpham.

⁷ Kẹlan we elologhi; bịdi ụ́moogh ịyaar ọtughemi ạna.

⁸ Iḍighi ika kụ uwo ologhi alegheri bọ ịyaar? Loor esi dị ọdi alegheri ịlo oḍighi. Iḍighi ika kụ uwo elologhi mạar ólhegheri bọ? Loor esi dị ọdi rạatughian mọ ọno bịn alegheri.

⁹ Awe elologhi ụ́maghami mạar eḍighi mạar dị bịdi osoor ologh, kụ igey awe rọwa ghan ọsar ọwilenaan.

¹⁰ Ọḅaal ologhi ọlo ạna, eghiḍim ẹlo ạna; oye ólho dị rꞌạna kadian.

¹¹ Otu ogey oye kạmeera ni mem dị moogulemi otu ọkaraph oye.

¹² Ẹpe nạ agbi bọ mọ egey eten, etue ni erorori nyịna ẹlogh ḍuugh.

¹³ Ạreer atue ni aakpereghi ọto. Mem dị iboh ílho mun, okururu kụ kẹtol.

¹⁴ Ạbukaraph awe kọmoogh ni ịdi ẹkpianaan bịdi. Bugey awe koonmo ni ruunmo dị ẹkasian.

¹⁵ Uwo elologhi kameeraam tọrobo ịyaar; awe ologhi kọmaar olegheri ịgbaranuom aruwol ạbidi.

¹⁶ Awe olegheri ịyaar rogona ghan loor okoronaan ịiḅaghami, kụ ạbuo elologhi oḍighi ghan ịyaar ịlo ạteeny, bịn rọnuun ghan oḍighi omitiom.

¹⁷ Awe ofughughuuny roḍighi ghan rạraar elologhi; awe ologhi rọpoomi ghan loor.

¹⁸ Awe élegheri rọmoogh ghan ịlo ẹkpe elologhi phọ ạbidi, kụ awe ologhi roonmoom ghan olegheri-ịyaar.

¹⁹ Ạbukaraph awe kokpuḍian ọngo we aruukuan kụ ọlom ọnma ighirigiir.

²⁰ Uwekulom rạ́ḅeeraan ghan we ghạlamo amatuman ọdi, kụ ọolha ạmoogh ịbadi ạrighiri.

²¹ Nạ ạwa ọmoogh ọḅaal ologhi, pọ ḍighi ghan iiḅi we lọ ẹkparam; eḍighi ni ọpioman ọḅitonaan ọnyo ạbidi.

²² Nạ aḍighi ghan ịlo ẹnighe, nạ kạmoogh oḍuom ologhi rꞌeegu ạbunon awe; nạ aḍighi ghan ịkaraph, pọ nạ rạpioman ni.

²³ Kumuan kụ nạ ạmoogh dọl; eḍighi ịyaar lọ nạ ạrol ghan ọghaaph umoore bịn nạ kameel ekulom.

²⁴ Awe olegheri ịyaar, roonmoom ghan ẹelha; awe elologhi, olegheriom bịdi elologhi phọ ạbidi.

²⁵ Oye-ọgbaanaan rạpel ghan sighuḍum awe mem dị ọdi ạgba igey; mem dị ọdi ạgba ọkpe, ọdi aakeleghi weye.

²⁶ Ọngo arughuenian Ọmoogh-we phọ ẹngo ạkpo ologhi rꞌeekpereghian oye rꞌeghunotu ọdi.

²⁷ Nạ rạwa ni okpetenaan aḍuugh? Ọngo arughuenian Ọmoogh-we phọ bịn kụ okol aghuḍum.

²⁸ Igbogh ọdaam mọ edi ọnhu awe dị ọdi ạda; bịdi kụ úlho pọ ọdi kị́yaar.

²⁹ Nạ ạphoomi loor, nạ aḍeenaan olegheri ịyaar; kụ nạ ạmoogh oboom ofughughuuny, nạ aḍeenaan ịdi nạ ịyaar úlegheri.

³⁰ Ẹepho ologhi ẹngo omoon aloor, kụ igbeghian ẹkigh ẹzegh dị edi ịphuuny.

³¹ Nạ ạgbiphoghom rukulom awe, nạ maronyon Ẹnaan phọ ẹlhem bọ bịdi; kụ nạ aḍighi iiḅi rukulom, pọ nạ maaseeny Ẹnaan.

³² Awe ạsipioghom ọsighe ghan emeel rotuomaan loor esi eḍighinom ịyaar ạbidi, kụ ịyaar rẹ́ḅogh bugey awe loor ạdol aruukuan phọ ạbidi.

³³ Olegheri ịyaar odi ni loor ạtorobo ịitughian oye ologhi; ạbuo elologhi úlegheri ịlo olegheri ịyaar.

³⁴ Ạdol aruukuan repoophe ghan eelhe; ạdol ạsipioghom reefolomi ghan eelhe.

³⁵ Ạbudaam ropoghom ghan egey ekpeḍien we iiḍighi lọ roḍighi agey, kụ bịdi ọliom bụlo obi bịdi.