Asidogh 13 - Ạḍinya Iigbia

¹ Ọony ologhi kaler rụru mem lọ ọde ọdi aroma nyọdi, kụ oye lọ aphoophe loor rámeera ghan mọ ọno ạpioman ni.

² Igey awe kọmoogh ruunmo esi ịlo bịdi ọḅem, kụ bụphe areekeleghian phọ ọmoogh ẹephua ọwa asighiton.

³ Miighe loor ịlo nạ rạḅem ọbo ạpham ghuḍum ạna. Oye lọ rạkaaph ghan ịyaar ịlo ạteeny rapiemian ghan loor.

⁴ Tọrobo ịlo uwo ẹgbogholeer ạwa ọmoogh ịyaar, ọdi kátue ạmoogh. Oye arukumuan kạmoogh tọrobo ịlo ọdi ạwa.

⁵ Awe dị iḅuaḅua ekia okel ọkpe, kụ ikpo ọnhu awe ạsipioghom eḍighi umugholoor rꞌaroofola.

⁶ Aruukuan rẹpel ghan oye lọ úlegheri aani; ẹkaraph ẹrolom kụ emeel abuḍighinom ịkaraph.

⁷ Buniin ọpu bịn roḍighi ghan mụdi ọmoogh ẹelha kụ rꞌịyaar ụ́moogh. Bụeri phọ oseere loor mụdi arukulom kụ ạri ọmoogh ni ẹelha.

⁸ Ọdaam kạsighe ikpoki ọdi ạpelaam ghuḍum ọdi, kụ oye ólho dị rạpaar uwekulom.

⁹ Awe aruukuan phọ ọkigh ọtozi dị asoor wosooph; abuḍighinom ịkaraph ọtol mụdi ọtozi dị rạnmeeghu ẹlo oḍim.

¹⁰ Ophoophe aloor ọ́moogh ịyaar oḍighinom emuton ịiḅaghami. Ẹnighe ghụn opuru ọnon oye oroma.

¹¹ Ẹelha dị nạ aagborion ạmoogh, ịdipho kụ ẹdi kẹnuun ẹḍua. Nạ ạkparagha kụ ạmoogh, pọ nạ kạḅile ạmoogh ịnon.

¹² Mem dị oḍuom ologhi kụ úlho mun, ekpom mọ mẹphu; ịlo oye ạwa kụ ạmoogh, pọ ologhi phọ kạḅaal li.

¹³ Nạ aghel ịma oroma, pọ nạ rạmagh ịiḅaghami; dạphan bịn ịyaar nyịna kẹ́ḅogh.

¹⁴ Ịtughemi oye ologhi, aḍikol ạmuum aghuḍum; kẹlogh ḍịghaagh okpetenaan ooto rꞌosooromineen.

¹⁵ Olegheri-ịyaar rạngo ghan rughuenian, kụ bụphe ụ́kpe bọ oḍuom ologhi odi eten amuphe.

¹⁶ Awe lọ ọmoogh ologhi rọotughian ghan kụ oḍighi ịyaar, kụ ạbuo elologhi kogananami élegheri-ịyaar ạbidi.

¹⁷ Abutelhedom dị ologhi úḍuom rọkom ghan ịiḅaghami, kụ bụphe oḍuom ologhi rọngo ghan ẹepho.

¹⁸ Oye lọ kạ́tuugha kameel ekulom kụ oofolomi. Tọrobo oye lọ ạnaghanan oroma kọngo ni eghuan.

¹⁹ Ẹdugh iboom ọteeny ịlo nạ ạwa! Ạbuo elologhi rómeera ghan ọwile ịkaraph.

²⁰ Telhian we olegheri ịyaar bịn nạ kạmoogh ni olegheri ịyaar. Nạ aḍighi rịghiri rꞌạbuo elologhi, nạ kape ni.

²¹ Ịiḅaghami rẹdaph ghan buḍighinom ịkaraph tọrobo esi, kụ awe aruukuan koonmo igey aruunmo.

²² Igey awe kọmoogh ẹelha oseenaan ạnmuny ạnmuny ọdi, kụ ẹelha abuḍighinom ịkaraph keḍigh rạghaagh awe aruukuan.

²³ Ọbo ade dị ẹkpo mịngo ni rukulom eḍien, kụ ạbuo ịghilighom mọ úmeera mọ oḅeph.

²⁴ Nạ mọony ạna kạ́liom, pọ nạ nyọdi ọ́phomoghian. Nạ ạphomoghian, nạ kạliom ni nyọdi.

²⁵ Awe aruukuan role ghan ni kẹpher, kụ awe ạsipioghom rọtol ghan ọkoony oomo amem.