Asidogh 12 - Ạḍinya Iigbia

¹ Tọrobo oye lọ ạphomoghian olegheri-ịyaar rạwa ghan mọ ọḅeni nyịno mem lọ ọno ạpioman. Ạbuo elologhi kụ ughel oroma.

² Ọmoogh-we phọ ạmoogh ḍịḅeeraan bugey awe, kụ akel bụphe rọotughian ghan bọ ịkaraph.

³ Awe ẹkaraph eḍighinom oḅio rọ́po ghan, kụ awe aruukuan oḅio-giph.

⁴ Ogey ạnir kụ eghuan rꞌọḅaal ologhi olhom ọdi; kụ ạnir dị rasiphe ghan umugholoor olhom ạkigh ẹkaraph ẹzegh dị edi ologhi ịḅarara.

⁵ Awe dị iguegue ekia kọmaar ọpham nyịna; ạbukaraph awe kọwa ghan ookeleghi ạna.

⁶ Ikpo ọnhu ịkaraph awe rẹze ghan we, kụ ikpo ọnhu awe aruukuan kẹtagharan we lọ odimom oghiilaan.

⁷ Ạbukaraph awe koozuanan emeel kụ awe olhe erua kọ́tol, kụ arughunotu awe aruukuan kẹtol bịn ẹki ghisigh.

⁸ Nạ ạmoogh olegheri-ịyaar, koboom ni nyịna; nạ ạmoogh elologhi, awe kophogh nyịna osooromi.

⁹ Oye dị ạdol ílho kụ rạmoogh ghan ni ịyaar olhe, kụ ạnighe apu oye aḍigbogh ạdol kụ ọkoony rakiigh.

¹⁰ Ogey oye ạmaar ghan rạpam ịnam ọdi, kụ ạbukaraph awe rọgurogh ghan ịlo ạbidi.

¹¹ Uwoḍighia oḅephom ozo kạmoogh ẹlo olhe kụ eepaany, kụ eḍighi élegheri-ịyaar ophiemi amem oḍighi ịyaar dị ạsuo kạ́tol.

¹² Oomo ịdi ạbukaraph awe koḍighi, ọwa ạraraar lọ eeph bịn kụ oḍighi ghan; kụ awe aruukuan phọ omiigh.

¹³ Ikpo ọnhu ọkaraph oye kụ aḍiphil dị kẹkoroghi nyọdi, kụ oye egey eḍighinom ịyaar ọ́moogh ịiḅaghami.

¹⁴ Aruunmo ạna kẹḍua esi ịlo nạ ạḅem rꞌịlo nạ aḍighi; nạ kạteeny ni ịpe ẹkpianaan bọ nyịna.

¹⁵ Ighiil awe oomo amem rogbiom ghan mọ bụno odi elhiom. Awe olegheri-ịyaar rọnaghan ghan oroma.

¹⁶ Mem dị ịyaar repin ologhi uwelologhi, ọdi ạnuun ghan raḍighi ịdi kolegheri. Bụphe ologhi phọ kọḅitonaan ọkaraph ọnhu.

¹⁷ Mem dị nạ ạgba igey phọ, iiḅi ịiruen eganana; ọkpe kamitiom ọkaraph ọoruen.

¹⁸ Ẹḍogh dị úgbiighi kụ ọḅa kegim oye ịdipho isiko; kụ ikpo ọnhu dị ogbiighi kụ ọḅa eḍighi eekonom.

¹⁹ Ọkpe rábia ghan, kụ igey phọ kẹtol ẹkiom risigh.

²⁰ Bụphe ọmoogh bọ ịkaraph igbiighi komeel ekperenom, kụ bụphe roḍighi ghan bọ ịlo kẹnighe, kọmoogh ọḅaal ologhi.

²¹ Ịlo ị́nighe rémitenaan ghan we aruukuan, kụ abuḍighinom ịkaraph ụ́moogh ẹnon ịyaar emuton ịiḅaghami.

²² Ọmoogh-we phọ akel we ọkpe kụ ạpomoghian bụphe ọmaar bọ ọpham ikpo ọnhu ạbidi.

²³ Awe ologhi roḅoronom ghan ịlo bịdi olegheri, kụ ighiil awe rogbeelom ghan élegheri-ịyaar ạbidi.

²⁴ Arukumuan kẹngo nyịna ịnyaam; ẹgbogholeer keḍighi nyịna ẹbene.

²⁵ Ọoḅaghamian aloor kạar nyịna ọḅaal ologhi ạna, kụ ạroḍogh ọnma ighirigiir kẹngo nyịna ḍidugh.

²⁶ Oye aruukuan phọ kụ otelhiom ọyaghiri ọdi, kụ eten oye ạsipioghom ẹlo amuphe ạbidi.

²⁷ Nạ aḍighi uwo ẹgbogholeer, nạ kạ́moogh ịlo nạ ạwa; kụ nạ akumuan, nạ kạmoogh ẹelha.

²⁸ Aruukuan kụ eten aghuḍum; ạsipioghom kụ eten aḍuugh.