Asidogh 11 - Ạḍinya Iigbia

¹ Ọmoogh-we phọ akel weye lọ ọtoom ạbidi úmunughan. Igey ịtoom kụ ịngo nyọdi ọḅaal ologhi.

² Awe lọ ophoophe loor kọnuun ni oofolomi. Eḍighi ologhi, lọ nạ asooromi loor.

³ Eḍighi ịyaar lọ nạ ạnighe, pọ egey ẹrolom kụ kerelhiom nyịna. Awe dị ụ́kpe ọḅogh ịyaar ọngo koogulaan loor ạdol ạbidi dị ị́nighe.

⁴ Ẹelha kéḍighi nyịna ịma ḍio dị nạ ạmiin ḍuugh, kụ ịma ạdol bịn kụ kẹphel nyịna.

⁵ Egeny ẹeghara reḍughe ghan ghuḍum ogey oye, kụ ọkaraph oye kụ kạsam ni eten emeel ọdi.

⁶ Aruukuan rẹtagharan ghan ogey oye, kụ oye dị ụ́kpe ọḅogh ịyaar ọngo, olhe ẹpher ọdi kụ kesiph nyọdi.

⁷ Mem dị ọkaraph oye amugh, oḍuom ologhi ọdi ramughan ghan rꞌọdi. Oḍuom ologhi dị ọkpasi esi aruphua óḍighi mạar.

⁸ Oye aruukuan kookpereghi ni mem ịiḅaghami; kẹḅile kụ ẹteeny ọkaraph oye.

⁹ Ạraghaaph awe dị Ẹnaan úlegheri kephiemi ni nyịna, kụ ologhi awe aruukuan kạphel li nyịna.

¹⁰ Ẹmha kẹḅaal ologhi mem dị aghuḍum ạteeny bugeny awe, kụ ạḍiolo iboh kẹtol mem dị ạbukaraph awe omugh.

¹¹ Ẹmha keḍum mem dị awe aruukuan ọngo ḍịseph ạbidi, kụ ẹmha kepe ni esi ikpo ọnhu ịkaraph awe.

¹² Eḍighi elologhi ọghaaph ọphuenom ạbunon awe. Nạ aḍighi oye ologhi, nạ kaḅoorian.

¹³ Ị́kpianaan nyịna ọḅeni oye ịkalaghian ịyaar ịbooghian. Ẹnighe ni epu ọkpasi oḍuom ologhi oye dị anem ẹpho.

¹⁴ Eelhe kemeel li eḍighi ịyaar dị ị́moogh oḍiemiom. Ịbadi abutomoghiom kụ abukoriom mọ.

¹⁵ Eḍighi ịyaar dị nạ amerenyan ọkpe ọmugh ooruen, nạ kạḅem ni mọ eeghe kụ isu ịmi. Ẹnighenaan nyịna ghụn dị nạ úmerenyan.

¹⁶ Ooḅi ạnir rokueni ghan ni, kụ ọkaraph ạnir komuton ni eephoogh. Uwo ẹgbogholeer kạ́moogh ikpoki, kụ oye dị ạkururu ạwa kaḍighi ni ọdaam.

¹⁷ Nạ aḍighinaan loor ạna iiḅi mem dị nạ aḍighi oye inmo. Eḍighi mạar dị nạ ạlogh ạaku ịyaar, pọ nạ aḍighima mạar loor ạna.

¹⁸ Awe ẹkaraph eḍighinom ịyaar róḍum ghan iboom, kụ nạ aḍighi ịdi ẹnighe, nạ kạmoogh ni ruunmo.

¹⁹ Tọrobo oye lọ ạkururu oḍighi ịlo ẹnighe kạtol li kụ tọrobo ọlo ạmoogh ḍịḅeeraan oḍighi ghan ịkaraph kamugh ni.

²⁰ Ọmoogh-we phọ akel we lọ ịkaraph kụ edi ghan ologhi, kụ ạpomoghian we lọ roḍighi ghan ịpe ẹnighe bọ.

²¹ Mạar alhegheri mọ kọliom ni buḍighinom ịkaraph kụ mọ awe aruukuan kokpetenaan ni.

²² Ẹnighe ạnir dị ụ́moogh egeny ẹzo ẹkigh gulu agol dị ọlogh izon ophoropo.

²³ Ịyaar lọ igeny awe ọwa oomo amem rẹsighe ghan igey kụ keru; mem dị abuḍighinom ịkaraph kụ ọmoogh ịlo bịdi ọwa, epin ologhi ạtorobo oye.

²⁴ Buniin awe roliom ghan ikpoki ạbidi rꞌophooph ologhi kụ roḍum ghan bịn; bụnon ọkpaghatiom ịlo ọmoogh kụ róḍum.

²⁵ Ḍighi iiḅi ạngo weye bịn nạ kạmoogh ni ẹelha. Lọghonaan ḍịghaagh bụnon kụ kọloghonaan ni nyịna ḍịghaagh.

²⁶ Awe kotonyon ghan oye lọ aseere eḍien okoriom amem dị aḍighi kẹki ạnyu, kụ bịdi ọseph nyọpo amitiom bọ aal.

²⁷ Eḍighi dị igbiighi ạna kụ ẹnighe, kọlogh ni nyịna eghuan; kụ eḍighi dị nạ rạwa ghan ịiḅaghami, ịpe kụ ịdi nạ kạmiin.

²⁸ Awe lọ oḍuom ologhi ẹelha ạbidi komeel ịdipho ạrinya oreeny amem aghozogh; kụ awe aruukuan phọ koḍum ni ịdipho ạrinya oreeny amem unu.

²⁹ Oye dị ạsighe ịiḅaghami aruomaan eghunotu ọdi kạ́moogh rꞌịyaar eekuna phọ. Awe elologhi koḍighi ghan butelhedom awe ologhi.

³⁰ Aruukuan rẹngo ghan ghuḍum, kụ ogburugburu rapiemi ghan ghuḍum.

³¹ Bụphe ọnighe bọ, aruunmo ạbidi edi sịen ade phọ. Ịduon phọ pọ mạar alegheri mọ kọliom ni bụo ạsipioghom rꞌawe ẹkaraph eḍighinom ịyaar.