Asidogh 1 - Ạḍinya Iigbia

Ạsuo asidogh

¹ Asidogh phọ ạSolomon ọony aDevid rꞌọdaam mọ Ịzirel.

² Ịphen kụ asidogh dị kẹloghonaan nyịna ḍịghaagh ọlogh elegh ologhi rꞌogey oroma, ọḅile ọnaghan ạraghaaph dị ídugh olegheri.

³ Kẹtughemi ni nyịna ọmaar ọrol ạdol elhiom rꞌaruukuan rꞌegey eḍighinom ịyaar.

⁴ Ketue ni ekiton oye lọ ariḍien ị́ḅaranu ạmoogh olegheri-ịyaar, ẹḅile ẹtughemi ugheel ạnmuny ọwa ghan ịyaar omitiom.

⁵ Kẹbughe ni olegheri-ịyaar awe, ẹḅile ẹma eten eḍeenaan we bụo ạrinya,

⁶ ọbo bịdi ọnaghan rụmhu asidogh lọ ạaghian, ọḅile ọphagharanaan sipuru lọ awe ologhi romitiom ghan.

Oromoghiom dị ọngo bụo ịḍoogh

⁷ Tụtu nạ kạmoogh olegheri-ịyaar, nạ kạpur ạlogh eghuan Ọmoogh-we phọ. Ighiil awe rókueni ghan ologhi kụ úmeera ọtuugha.

⁸ Mọony ạmi, ler rụru ạnaghan ịlo ọde ạna rꞌonhiin ạna ọḅeni nyịna.

⁹ Ịtughemi ạbidi keselemi ni ẹzo ạna ịdipho ogeny okuughaam mꞌikoli orum kẹnighemi bọ loor ạna.

¹⁰ Mọony ạmi, mem dị abuḍighinom ịkaraph ọdegh nyịna, kámeel áḍighanaan.

¹¹ Eḍighi ịyaar lọ bịdi ọḅem mọ, “Tue ọwa oye oghiigh, ozuom we lọ mạar ụ́piom reten ephegh bịn.

¹² Bịdi komoon ni mem dị yira ọmiin bịdi, kụ omugh mem lọ yira mọmadan rꞌạbidi!

¹³ Yira kọmiin ni ọdo kịrokiro ẹelha kụ obum omuzeḍiom ruutu ayira.

¹⁴ Tue ụdaph iyoor, kụ oomo ayira kodian rạraar lọ yira omi.”

¹⁵ Mọony ạmi, kátelhian ọdo awe phọ ạbuphe. Kẹlan bịdi.

¹⁶ Bịdi útoph mem oḍighi ịyaar dị eeph. Bịdi ọnya oomo amem oghiigh.

¹⁷ Ị́ngo sụo olher ọseki osiphom ẹnun mem dị ẹnun phọ repogh,

¹⁸ kụ ọdo awe phọ ạbuphe rọkpaminaan ḍiphil siloor ạbidi, ḍiphil dị kẹze bịdi.

¹⁹ Awe lọ romiom ghan rꞌẹekpara ekpeḍien, romugh ghan ni ọdo aḍuugh phọ ạḍiphe — ịduon kụ ịdi kemitenaan we aḍigburugburu ạdol.

Olegheri-ịyaar rạmagh ni

²⁰ Ịnaghan. Ologhi rạmagh ni ẹpe areten ẹmha phọ rꞌariisi omuul aḍighi.

²¹ Ạmagh ni ạlho ạkiom ạnyu sịphe eḍighom ẹmha phọ ḅịle rꞌạtoro esi lọ awe oru ookpomoghan:

²² “Ighiil awe, kꞌapuraḍio kụ ẹdi nyina kẹtol dọl phọ ạḍien. Kꞌapuraḍio kụ ẹdi nyina kẹtol omurughiom ịghor olegheri-ịyaar? Nyina kẹ́tuugha?

²³ Ịnaghan mem lọ mị rịḅaam inyina; mị kịngo inyina ogey oroma kụ nyina elegheri ịpe mị alegheri bọ.

²⁴ Mị rịmagh ghan inyina, riyapha ghan inyina mọ itu, kụ nyina ị́naghan. Nyina ịmi ị́naghanan.

²⁵ Nyina mẹḅitonaan oomo oroma ạmi kụ nyina ị́wa mọ mị uulhemi reten anyina.

²⁶ Ịduon phọ mem dị nyina eḍigh esi ịiḅaghami, mị kịmilogh ni inyina. Mị kịnmoghoghoom inyina mem lọ ạraraar oḍigh aḍiigu emite,

²⁷ mem dị ịiḅaghami isoorom inyina ịdipho ogbogh oghim, kụ nyina edimom eephina rꞌạḍikaraph ạdol.

²⁸ Pọ kụ amem dị nyina kẹmagh olegheri-ịyaar mọ aru, kụ mị inyina kị́phagharanaan. Nyina kịwa ni ịmi oomo ariisi, kụ nyina ịmi kị́miin.

²⁹ Nyina kꞌekulha kẹ̋moogh ghan ịyaar oḍighinom olegheri-ịyaar kụ oomo amem edi ghan ọḅaar ẹmhu esi Ọmoogh-we phọ.

³⁰ Nyina kẹ̋wa ghan oroma ạmi ḅịle rꞌọsighe amem lọ mị iilemi inyina.

³¹ Kụ ịduon phọ nyina kẹmiin ni ịpe ịkpianaan bọ inyina, kụ eḍighinom ịyaar anyina kụ kịngo inyina eephina.

³² Awe dị ariḍien ị́ḅaranu romugh ghan, loor esi dị bịdi okel ologhi. Ighiil awe ropiemian ghan siloor loor esi dị ụ́sighe ịyaar ụ́manami mạar.

³³ Kụ ọlo tọrobo oye lọ ụnaghanan ịmi ịyaar nyọdi kẹ́ḅogh. Ọdi kạtolom dọl eekpereghian dị ịyaar kákiilaan.”