Ạḍuor Ạsuor 8 - Ạḍinya Iigbia

¹ Ọbo nạ kụ aḍighi umor ạmi dị onhiin ạmi kụ aakonom rạmamaam ọdi. Ịduon phọ edi bọ ni, eḍighi ịyaar dị mị ạmiin nyịna eten, ọbo mị mụkpun ni nyịna bịn oye ịyaar kạ́ḅem.

² Mị mụsighe ni nyịna ạghimom kꞌonhiin ạmi, esi dị nạ mụtughemi ịmi ẹphomoghian. Mị mụngo nyịna miim eeḅi eḍu dị ọdughemiom rịnya ọonha rꞌamiim arekpetughe phọ ạmi mụo ọphughol.

³ Ạḍighaagh ekeeny ạna edi eeḍian ẹmhu ạmi kụ ạḍighaagh elhiom ạna rịipholion ghan ịmi.

⁴ Iguanaan ịmi, nmạriir aJeruselem, mọ nyina késophoghom ẹphomoghian ayoor.

Ạḍuor dị emuneniom odiiny Ạnmariir phọ

⁵ Ọphon phọ ạnhian ạḍua bọ ẹpe ade ịisaar phọ kụ ratu, ạkoman bọ rạghaagh oye ẹphomoghian phọ ọdi? Sịphe oozin ẹḍara phọ mị ụsumeeny ni nyịna, sịphe ọmar bọ nyịna.

Ạnir phọ

⁶ Kạ́miin ẹnon ẹphomoghian emuton nyẹen ạmi; epel ịlo ạmi, kạ́koman rạghaagh ọnon oye. Ẹphomoghian ẹmoogh ịikpo ịdipho aḍuugh; aḍiboom ạḍiḅeeraan ẹmoogh ịikpo ịdipho aḍuugh rꞌaloor. Retuphaan ghan kụ anem ạnian kemite kụ eemor ịdipho ạnian ọnuza.

⁷ Ạmuum kátue aḍime; aḍigho ílho dị ketue eekpereghiom. Kụ oye ạḅem mọ ọno kakoom ẹphomoghian ẹelha ọno, ophogh osooromi bịn kụ ẹdi ọdi kạmoogh.

Abumor ạnir phọ

⁸ Yira ọmoogh ọbam umarani, kụ ạramamaam ọdi ekom ni. Yira koḍighinaan nyọdi eeghe mem lọ onyugheel ọony rạwa ophin?

⁹ Mụghumo ọdi aḍighi iikpe otu, yira mụlhoghonaan nyọdi ọkololoony otu ẹedaneen asilva. Mụghumo ọdi aḍighi ọbalalaany ọnhu-aḍibuo, yira mukoonyom nyọdi ipoḍi ọsaga.

Ạnir phọ

¹⁰ Mị aḍighi iikpe, kụ ạramamaam ạmi kụ ẹsogolo esi otu ạbidi. Oye ẹphomoghian phọ ạmi alegheri mọ ạdol ọdi kụ rịgbanyaan ghan ịmi rꞌoḅio giph.

Oye phọ

¹¹ ẠSolomon ạmoogh ni oghoony ịizupha avain ekpisi dị oghol mọ aBaal Hamon. Abuḅephom iizo odi ni dị ọlhomom ghan iizo phọ ọdi; tọro ọnyo ạbidi ạkpe ghan oniin ọonir ipoḍi asilva.

¹² ẠSolomon kạsighe ni oniin ọonir ipoḍi asilva phọ ọdi, kụ ọngo buḅephom iizo phọ ịyal okuron bin mụo ạbidi. Mị ạmoogh ni oghoony ịizupha avain ọlo ạmi.

¹³ Mị ụnaghan ẹḍogh ạna dị ẹḍua ẹpe oghoony phọ eru, ạnir ẹphomoghian ạmi; awe dị rꞌạmi rotelhian rokori ni ọnaghan ịdi nạ kạkaaph.

Ạnir phọ

¹⁴ Tue esi ạmi, oye ẹphomoghian phọ ạmi, ịdipho ezoogh, ịdipho onyugheel ọoroogh dị odi rạaḅaraph, esi dị ạraraar ọtukemiom eḍien kụ esiighi.