Ạḍuor Ạsuor 1 - Ạḍinya Iigbia

¹ Ạḍuor dị ẹkar ẹdugh sịphe ạsuor phọ ạSolomon.

Ạḍiḅel ạḍuor phọ Ạnir phọ

² Ịidoronhu ạna izuoghom ịmi rꞌịkpunogh; ẹphomoghian ạna ẹnighe epu miim.

³ Ịma eḍu edi ni esi ạna; ḍịmagh aḍien ạna ẹḅile ghan reḍum. Ạnir ólho dị kạbile ọphomoghian ạna!

⁴ Ụsighe ịmi ạpham, kụ yira kosuma ni; Ḍighi ọdaam ạmi kụ ụpham ịmi aḍighom osoph ạna. Ịyal ayira kọḅophan kụ ọḅaal ologhi, ọpughol muboom kụ ọoweleghian siloor esi ẹphomoghian. Mị ạḅem, oomo ạnmariir ọphomoghian bọ nyịna!

⁵ Nmạriir aJeruselem, mị abil li kụ ạnighe, abil mụdi arugbogo ade ịisaar phọ aKedar kụ ạnighe mụdi ukpe dị ọkpo rughuugh ogiga ạSolomon.

⁶ Kíphogh ịmi esooromi loor aḍizu phọ ạmi, loor esi dị erumuḍio kụ ịgbagarami ịmi. Abumor ạmi ụghagham ni ịmi ologhi kụ oḍighi ịdi mị ạrol rukumuan ozo ịizupha ireeny avain. Mị ụ́moogh mem ophogha aloor ạmi.

⁷ Ụḅeni ịmi, oye ẹphomoghian ạmi, Ẹghen kụ ẹdi nạ kạkimom ḍita ịga phọ ạna ịḅal? Ẹghen kụ ẹdi bịdi koḍigh uba mem ogogo ogbo ootaany phọ? Eeghe kụ keḍighi bọ ịyaar dị mị kạwa nyịna igbo asita ạbueri phọ abukoriom mọ?

Oye phọ

⁸ Nạ ólhegheri esi phọ, ọkar ooḅi ạnir? Kịa ạdaphan ḍita ịnam mọ; wạanaan rụtu-ịga ạna rọogho ọraal etumanan arugbogo abukoriom iyool-ịga phọ.

⁹ Nạ, ạnir ẹphomoghian ạmi, nạ ạḅeeraan weye ịdipho ọya ạsu kạḅeeraan bọ ịnam mọ ụ́po bọ sịphe aḍita ịnam ẹgham ọdaam eelhe phọ.

¹⁰ Ạsilaal ẹnighe kụ emeleghuom rukpo ạna, emeleghuom ẹdaphan orum ịdipho ịma ạraraar ịnme ọlogha orum.

¹¹ Kụ yoor kọlemenaan ni nyịna ikoli agol ịnme ọloghoḍian dị ọlhemom silva rꞌạraraar ọnighemi dị ọlhemom silva.

Ạnir phọ

¹² Ọdaam mọ ạmi ạmina ni ạnyu ẹmina phọ ọdi, kụ elho ạmi reḍum eḍu kemuzeḍi esi phọ.

¹³ Oye ẹphomoghian ạmi aphur ghan eḍu amaa mem dị ạminanam rạmamaam ạmi.

¹⁴ Oye ẹphomoghian ạmi ạtol mụdi ạsifalaway dị ẹmaar rẹpipha sịphe iizo avain ẹpe En Gedi.

Oye phọ

¹⁵ Pọ eeghe ọdo ẹnighe ạna, ạnir ẹphomoghian ạmi; pọ eeghe ariḍien ạna kụ rẹmuanan rꞌẹphomoghian!

Ạnir phọ

¹⁶ Pọ eeghe ịdi nạ ạnighe, oye ẹphomoghian ạmi; pọ eeghe ịdi nạ ụḅeeraan ịmi! Ạtugbiir ạroogho kụ kaḍighi ẹmina ayira;

¹⁷ Ireeny ọsaga kụ keḍighi sịotogh otu ayira; kụ ireeny-asaipres eḍighi ịlo okpiom ạnyu ạgba otu phọ.