2 Timoti 4 - Ạḍinya Iigbia

¹ Mị ạsighe ni ḍien Ẹnaan rꞌạJizos Kraist phọ kaagbo bọ ịiruen ạngo oomo awe, bụlo odi rꞌạbulo momuughu, kụ righiremi inyina ịyo loor ẹmhu aḍio phọ ọdi kamite bọ egaan phọ rꞌọmar phọ ọdi mọ

² kạaph ni ọghaaph phọ Ẹnaan aleenye eleeny. Mem lọ ẹnighe rꞌamem lọ ị́nighe, kạ́bile dị nạ ụ́kaaph. Kịa ạghaaph aḅonyon iloghi awe. Tuphughiom, ạḅaam bịdi ịkaraph phọ ạbidi. Kpạrami iloghi phọ ạbidi. Mọogh ọkparam kụ ạtughemiom ghan.

³ Amem ketu ni dị awe kọ́naghanan mun igey ịtughemi phọ. Bịdi kọdaph ghan rụuphua ạbidi bịn, kụ ookpomoghi bụtughemia otum bụtughemia dị kọtughemi ghan ịpe retiirogh bọ iloghi phọ ạbidi.

⁴ Bịdi kọgumom ni ọman ọnaghan ghan igey phọ, kụ ozuumaam ghụn ịkaraph asidum.

⁵ Kụ nạ phọ, pạmaghan loor ạna esi oomo ạraraar. Mịnoghom ghan ịminimiin, aḍighi oḍighi oye dị rạkaaph ghan ooḅi ọghaaph phọ. Ḍighi kꞌịkpara kꞌikpuru oḍighi phọ ạna ịdipho otelhedom Ẹnaan.

⁶ Mị kụ ọlo, amem mọ mẹteeny ni dị romoor ghan ịḅaal aghuḍum mọ ạmi ịdipho amiim. Amem mọ mịteenyaan ịmi dị mị kạbile ghuḍum mọ ạkuen.

⁷ Mị mee ni egey eenom. Mị maghiil li eghiil phọ ạteeny eekuna. Mị maako ni ịpe omeeraam mọ ạḅem bọ.

⁸ Kụ nyịidipho abin ọkpar opu phọ rukori ni ịmi. Ọmoogh-we phọ aḍighi bọ oogboom ịiruen aruukuan phọ kuzu ni ịmi eghoony aruukuan phọ ḍio phọ ạḍiphe. Ọdi kázu ogina ạmi bịn, kazu aani ni oomo ạbuphe ọphomoghian bọ nyọdi kụ rokori ghan bọ mem mọ ọdi kamite bọ egaan phọ.

Ọghaaph ọlo oye rꞌoye

⁹ Káabinyemiom ọnuun oru ọteeny ạmi.

¹⁰ ADimas mạḅile akiton ạpomoghian aḅirini phọ ọphon kụ mumutonaan ịmi. Ọdi mạḍua akeel Tẹsalonika. ẠKreskens mạghi Galetia, ạTaitos ạki Dalmatia.

¹¹ ALuk bịn kụ udianaan ịmi. Sịghe Mạk ạpham arumom, ịdi eḍighi bọ ọdi kụloghonaan ni ịmi ḍịghaagh esi oḍighi phọ.

¹² Mị atom Tịkikos mọ ạghi Ẹfesos.

¹³ Mem lọ nạ ratu sịghe ạsuoma phọ mị aseere bọ kꞌạKapos ẹpe Troas uruom. Pạmam ni rịnya phọ, ụ́bile ghan rọwile ruzu ịnam mọ ọge bọ rạraar phọ.

¹⁴ Ạleksander ọlemom ọlem mọ uḍighi ni ịmi iboom ịkaraph. Ọmoogh-we phọ kụ kạkpe nyọdi ịikpia dị ẹgbaanyan rꞌeḍighinom ịyaar phọ ọdi.

¹⁵ Nạ rꞌaloor ạna gona ni loor esi ọdi, ịdi eḍighi bọ ọdi ạkaraghi ni ạkuami ạgbagharan dom mọ ayira.

¹⁶ Rꞌoniin oye ịmi úḍighan, mem mọ mị ạdagh bọ rạgba kạphelaam ẹmhu phọ ạmi. Tọrobo oye umutonaan ni ịmi. Ẹnaan kị́sighe ịphen phọ ịḅam rụmhu ạbidi!

¹⁷ Kụ Ọmoogh-we phọ ụrolan ni ịmi, ụngo ghan ịmi ịnyaam, dị mị arue ni agbeelom ghan dom mọ ạmadan ạngo oomo aruuruen phọ, kụ ụphel li ịmi ạsighe ọnhu ạnam-dịka.

¹⁸ Kụ Ọmoogh-we phọ kụphel kẹn ni ịmi esi oomo ịkaraph, kụ uuko ni ịmi asiemi ọmar phọ kꞌạda-otu. Eegu ẹrolonaan ni nyọdi kꞌagee-pọ kꞌagee-pọ! Ẹrol li ịdipho!

Iipuruan

¹⁹ Upurunaan ịmi Prịsila rꞌẠkuila, rꞌọto kꞌỌnesiforos.

²⁰ Ẹrastos ạrol ẹpe Kọrint, kụ mị ạwile Trọfimos ẹpe Mailitos, loor esi dị ọdi ạrol emoon.

²¹ Káabinyemiom origheel kụ egbi ọteeny amem ẹephoom mọ. ẠYubulos, rꞌaPudens, rꞌạLinos, rꞌạKlodia, rꞌoomo ạbueri asiya phọ mopuru nyịna.

²² Ọmoogh-we phọ ạrolonaan uwaloor phọ ạna! Ooḅi ọghor phọ kꞌẸnaan ịrolonaan inyina!