2 Sạmuel 9 - Ạḍinya Iigbia

ADevid rꞌạMefiboset

¹ Eniin aḍio kụ aDevid apuru mọ, “Oye asugha ni sịphe eghunotu phọ ạSol ḍụghum? Eḍighi ịyaar dị oye odi ni, pọ kịḅeeraan ni ịmi oḍighi ọdi iiḅi loor ẹmhu phọ ẠJonatan.”

² Oniin otelhedom eghunotu phọ ạSol ạrol li dị oghol mọ aZiba, kụ ọḅeni mọ ọdi ạghi ạteeny Devid. Ọdaam mọ apuru mọ, “Nạ kụ aZiba phọ ḍụghum?” Kụ ọdi ạphagharanaan mọ, “Ii, otelhedom mọ ạna, ọdi phọ ni.”

³ Kụ ọdaam mọ apuru nyọdi mọ, “Oye asugha ni sịphe eghunotu phọ ạSol dị mị kaḍighinaan iiḅi, ịdipho mị aguanaan bọ Ẹnaan mọ mị kaḍighi phọ?” AZiba ạphagharanaan mọ, “Ọony ạJonatan dị aḍigh ẹgha aruwol dị rakughol ghan asugha ni.”

⁴ Ọdaam mọ apuru mọ, “Ọdi odi ẹghen?” Kụ aZiba ạphagharanaan mọ, “Ọdi odi ghan kꞌoye dị oghol mọ aMakir ọony phọ Ạmiel ẹpe Lọdebar.”

⁵ Kụ aDevid ọdaam mọ mọ ọghi ọmagh nyọdi.

⁶ Mem dị ạMefiboset ọony phọ ạJonatan ḅịle ọnyanyani ạSol aru bọ asi, ọdi azuman sịphe arisigh phọ aDevid ạngo rughuenian kụ aDevid ạḅem mọ, “Mẹfiboset,” kụ ọdi ạphagharanaan mọ, “Mị odi ni eeḍian ịtooghi phọ ạna, oye phọ.”

⁷ Kụ aDevid ạḅeni nyọdi mọ, “Kákiilaan. Mị kaḍighi nyịna iiḅi loor ẹmhu ọde phọ ạna Jọnatan. Mị kaḅulemi ạngo nyịna oomo ade phọ ọde-oko phọ ạna Sọl ạmoogh ghan bọ, ḅịle kẹn tue ghan sịen kꞌạmi oomo amem alhe eḍien.”

⁸ Kụ ạMefiboset ạḅile kẹn azuman kụ ạḅem mọ, “Mị ụ́nighe úpu ghoogh dị mamugh, oye phọ! Iḍighi ika kụ nạ ruḍighi bọ ịmi iiḅi dị eleeny ịduon phọ?”

⁹ Kụ ọdaam mọ ạmagh Ziba otelhedom mọ ạSol, kụ ạḅeni nyọdi mọ, “Mị rạngo Mẹfiboset, ọnyanyani ọde-otu phọ ạna, oomo ạraraar phọ ịpe eru bọ ịlo ạSol rꞌoomo ọto ọdi.

¹⁰ Nạ, ạnmuny ạna ḅịle rꞌabutelhedom ạna, ịki eḅephanaan ghan iizo ọto kꞌạSol ọde-otu phọ ạna kụ ẹsighe ghan ibugha phọ eru, pịdi ọmoogh ghan eḍien ọngo ạbidi. Kụ ọlo ạMefiboset rꞌaloor ọdi katu ghan oomo amem ẹphen kꞌạmi kụ ale eḍien.” (Mem mọ ạmuen, aZiba ạmoogh bọ ḍioph rꞌoogh ạnmuny ḅịle rꞌịyaldi abutelhedom.)

¹¹ Kụ aZiba ạphagharanaan mọ, “Mị kaḍighi ni tọrotoro ịlo ọdaam mọ ạto.” Kụ iḍighi kụ ạMefiboset alhe ghan eḍien ẹpe kꞌọdaam mọ, ịdipho ẹrol dị oniin ọony ọdaam mọ.

¹² ẠMefiboset ạmoogh ni oniin ọbumoony dị oghol mọ aMika. Oomo ọto kꞌaZiba oḍighi butelhedom ạMefiboset.

¹³ Kụ iḍighi kụ ạMefiboset, ọpo aḍighi bọ ẹkugha dị ịyal phọ aruwol phọ ítue ghan bọ ịmeera, ạrol ghan ẹpe Jeruselem, alhe ghan oomo ariiḍien phọ ọdi sịphe kꞌọdaam mọ.