2 Sạmuel 7 - Ạḍinya Iigbia

Adom mọ aNetan ạḅeni bọ Devid

¹ ADevid ọdaam mọ ạḍerian odi sịphe kꞌọdi, ḅịle kẹn Ọmoogh-we phọ maako nyọdi esi oomo ạbumulogh-ḍien phọ ọdi.

² Kụ ọdaam mọ ạḅeni Netan oyil phọ Ẹnaan mọ, “Sịen phọ mị atugh otu dị ọloghom rạsaga, kụ ọlo Igbe Ịyo Ọmoogh-we phọ edi ogbogo!”

³ ANetan ạphagharanaan mọ, “Ḍighi tọrobo ịlo edi ologhi ạna loor esi dị Ọmoogh-we phọ odi ni rꞌạna.”

⁴ Kụ ọlo ḍughul phọ ạḍiphe Ọmoogh-we phọ ạḅeni ni Netan mọ,

⁵ “Kịa ạḅeni Devid otelhedom mọ ạmi mọ mị ạḅeni nyọdi mọ, ‘Nạ kụ kạ́logh otu ịiḅereghi dị mị katugh.

⁶ Emiigh kꞌamem mọ mị ạtagharan bọ we phọ Ịzirel ḍịghaagh Ijipt kụ ẹteeny rodon, mị kőrugh ghan otu ịiḅereghi dị ọlogh; mị ratelhe ghan kakitonom karugh ghan rugbogo.

⁷ Esi oomo erelhe phọ ạmi rꞌawe phọ Ịzirel, mị kőpuru ghan rꞌoniin oḍiemiom lọ mị ạsaḅar ịpe eḍighi bọ kụ bịdi ụ́sighe bọ rọsaga ụ́loghonaan ịmi otu ịiḅereghi.’

⁸ “Kụ iḍighi kụ ḅẹni Devid otelhedom mọ ạmi mọ mị Ọmoogh-we Oomo Ịikpo phọ rạḅeni nyọdi mọ, ‘Mị ụsighe nyịna dị nạ odi rapogh ghan iyool-ịga ẹpe eḍum mọ kụ ạsighe nyịna ạdaami weye phọ ạmi Ịzirel.

⁹ Mị odi ghan ni rꞌạna tọrobo ekpisi lọ nạ ạghi, kụ nạ rạki ọteeny ẹpomoghian phọ ạna bịn mị ụngo ghan ni nyịna ọkpar opu. Mị kamitiom ni ḍien phọ ạna ịdipho aḍien ọkar abugbogh abuḍiemiom dị odi aḅirini phọ.

^10-11 Mị mạsaḅar esi aseenaan weye phọ ạmi Ịzirel, kụ marughemi bịdi sịphe phọ, esi dị bịdi kotugh dị oye kạ́gbiphoghom mun bịdi. Kꞌagee phọ bịdi oḍigh bọ de phọ ạḍien, ạbukaraph awe rotuphiom ghan ni bịdi rạagham, kụ ọlo ịphen kémite mun. Mị aguanaan ọmaar ooko ạna esi oomo ạmulogh-ḍien phọ ạna ḅịle rꞌọloghonaan nyịna ọophi.

¹² Mem lọ nạ amugh kụ oḍi nyịna nạ ạtuonom bụrude phọ ạna, mị kạsighe ni oniin ọony ạna aḍighi ọolha-ẹmha kụ ọmar phọ ọdi kạmoogh ni ịikpo.

¹³ Ọdi kụ kụloghonaan ịmi otu ịiḅereghi kụ mị kạwa ni ạmiin mọ oḍigh phọ ọdi ạtol kꞌagee-pọ.

¹⁴ Mị kaḍighi ọde ọdi kụ ọdi aḍighi mọony ạmi. Mem lọ ọdi ạpioman, mị kạliom ni nyọdi ịdipho ọde rạliom ghan bọ mọony ọdi.

¹⁵ Kụ ọlo mị kạ́bile ọloghonaan ọdi ḍịghaagh ịdipho mị aḍighi bọ Sọl, ọpo mị asoore bọ pịdi nạ aḍighi ọolha-ẹmha.

¹⁶ Nạ kạmoogh ghan ni nmụny oomo amem kụ mị kạmeremi ni ọmar phọ ạna kꞌagee-pọ. Oḍigh ạbudaam mọ ạna kási eekuna.’”

¹⁷ ANetan ạḅeni Devid oomo ịpe Ẹnaan eḍeenaan bọ nyọdi.

Ịiḅereghi dị aDevid ạsephom Ọmoogh-we phọ

¹⁸ Kụ aDevid ọdaam mọ ạghi aḍigh Ogbogo ạrol ude egbodo Ọmoogh-we phọ kụ ạaḅereghi mọ, “Mị ụ́kpianaan oḍighi ịphen nạ muḍighinaan bọ ịmi, nạ Ogbogh Ọmoogh-we phọ, ghạlamo eghunotu phọ ạmi kẹn ni bịn ị́kpe.

¹⁹ Kụ ghạlamo ạnyiidipho phọ nạ ạḅile bịn raḍighi ghan ịnon, nạ Ogbogh Ọmoogh-we; nạ maguanaan rạraar ẹemara ẹemara ạmi esi ạsia dị retu. Kụ nạ Ogbogh Ọmoogh-we phọ ameera ni mọ oye ạmiin ịphen phọ.

²⁰ Mịna kạḅile ạḅeni nyịna eeghe? Nạ ulegheri ni ịmi otelhedom mọ ạna.

²¹ Iḍighi ni ogbi ạna rꞌịto ạna oḍighi ịphen phọ ọsighe ọtughemiom ạmi.

²² Pọ eeghe ọdo ịdi nạ ạbugh, Ogbogh Ọmoogh-we phọ. Oye dị ạghigh nyịna ólho; yoor molhegheri ni mọ nạ bịn kụ Ẹnaan.

²³ Ẹnon eelhe sịen ade phọ dị ẹghigh Ịzirel ílho, bụen nạ ạtagharan bọ dọl ạrebene phọ kụ ạsighe aḍighi weye ạna. Igbogh rꞌịikia ạraraar phọ nạ aḍighinaan bọ bịdi memitiom ḍien phọ ạna eleenye aḅirini phọ. Nạ uphorogh ni ịnon areelhe rꞌạrumugh phọ ạbidi ạsighiogh mem mọ awe phọ ạna rotu bọ, awe phọ nạ ạtagharan bọ ẹpe Ijipt, mọ oḍighi bụo ạna.

²⁴ Kụ nạ aghononomi ạsighe Ịzirel ạloghoma ạsighe aḍighi weye ạna kꞌagee-pọ, kụ nạ Ọmoogh-we kụ Ẹnaan ạbidi.

²⁵ “Kụ nyịidipho, Ọmoogh-we Ẹnaan, ḍighi ni amitiom oomo amem ịpe nạ uguanaan bọ ịmi rꞌẹemara ẹemara phọ ạmi, ạḅile aḍighi ịpe nạ ạḅem bọ mọ nạ kaḍighi phọ.

²⁶ Aḍien phọ ạna keeleghaan ni, kụ awe ọḅem ghan oomo amem mọ, ‘Ọmoogh-we Oomo Ịikpo kụ Ẹnaan phọ repogh bọ Ịzirel.’ Kụ nạ kạmaar ri ạpam oḍigh ạbudaam mọ ạmi oomo amem.

²⁷ Ọmoogh-we Oomo Ịikpo, Ẹnaan phọ Ịzirel, mị ạmoogh ni ạkpo ologhi ọoḅereghi ạna ịduon phọ, loor esi dị nạ muḍeenaan ịmi otelhedom mọ ạna oomo phọ ịphen phọ, kụ ạḅile kẹn ụḅeni ịmi mọ ẹemara ẹemara ạmi koḍighi ni rạalha.

²⁸ “Kụ nyịidipho, Ogbogh Ọmoogh-we, nạ kụ Ẹnaan; nạ raḍighi ghan ni ịlo nạ aguanaan, kụ nạ muguanaan ịmi ọokia oguan phọ ọphon.

²⁹ Mị rạlhom ni nyịna mọ sẹph ni nmụny ạnmuny phọ ạmi pịdi bịdi ọkelom igey phọ ạna ọkiom risigh. Nạ Ogbogh Ọmoogh-we maguanaan ni ịphen phọ, ḅịle kẹn ạḍiseph phọ ạna kẹtolan nmụny ạnmuny phọ ạmi kꞌagee-pọ.”