2 Sạmuel 5 - Ạḍinya Iigbia

ADevid aḍighi ọdaam Ịzirel rꞌaJuda

¹ Oomo awe phọ Ịzirel ụghi ni ọteeny Devid ẹpe Hẹbron, kụ ọḅeni nyọdi mọ, “Yoor oḍighi ni ịḅaal rꞌiphulupul phọ ạna.

² Mem dị meten, ghạlamo amem mọ ọpo ạSol aḍighi bọ ni ọdaam ẹmha phọ ayira, nạ kụ uḍiemiom ghan ni weye phọ Ịzirel ọghi ẹgham, kụ Ọmoogh-we phọ aguanaan ni nyịna mọ nạ kụ kaḍiemiom ghan weye phọ ọno ạḅile ạda bịdi.”

³ Kụ iḍighi kụ oomo ikumoor awe phọ Ịzirel uru ni ọteeny Devid ẹpe Hẹbron. Kụ ọdi aghiran ịyo rꞌạbidi, bịdi ọsighe mụnum-ịko ọsagharan nyọdi lọ kaḍighi ọdaam aJuda.

⁴ ADevid ạman ịraardi ạsia mem mọ ọdi aḍighi bọ ọdaam mọ, kụ ọdi ạda bọ ịman inyadi ạsia.

⁵ Ọdi ạrol bọ Hẹbron kụ ạda Juda ịman oḍual ạsia rꞌạpakiri, kụ ọdi ạrol bọ Jeruselem kụ ạda oomo Ịzirel rꞌaJuda ịman ịraardi rꞌịraar ạsia.

⁶ Amem iru ni ẹteeny dị aDevid ọdaam mọ rꞌawe phọ ọdi oḅetenu ọghi ozuom ẹgham Jeruselem. Awe aJebus phọ orugh bọ sịphe phọ ugbi ghan mọ aDevid kátue ạkpar apu ẹmha phọ, kụ iḍighi kụ bịdi ọḅeni nyọdi mọ, “Nạ kátue ni bịn aḍigh ẹmha phọ ẹphen; ghạlamo awe ikpom ariḍien rꞌạrukugha bịn kotue ni okikima nyịna.”

⁷ (Kụ ọlo aDevid arue ni ạkpar apu ẹkpana ẹmha phọ ạZayon, bịn kụ ọḅile ghan oghol mọ, “Ẹmha aDevid.”)

⁸ Ḍio phọ ạḍiphe phọ aDevid ạḅeni ni weye phọ ọdi mọ, “Oye odi ni sịen dị ạlogh ḍien weye phọ aJebus uuleeny ịmi ḍụghum? Dị katue ni ạze bịdi? Pọ aḅugh sịphe okiilia ạmuum mọ ạghi azuom ẹgham ighiil ạrukugha ikpom ariḍien phọ ạbuen.” (Ẹpe kụ ịyaar phọ rọḅem ghan bọ mọ, “Awe ikpom ariḍien rꞌạrukugha kótue oḍigh otu Ọmoogh-we phọ.”)

⁹ Ọdi rọkpar rọsighe ẹmha phọ, kụ aDevid arugh sịphe kụ aghol mọ “Ẹmha aDevid.” Ọdi ạlogh ẹmha phọ akitonom, emiigh sịphe ade phọ ẹkpaariom bọ eegbolom mọ ḍịghaagh phọ ạḍiphe erumuḍio phọ remite ghan bọ.

¹⁰ Ọdi ạkpar ghan ịikpo bịn ạghiom risigh loor esi dị Ọmoogh-we phọ ạrolan rꞌọdi.

¹¹ AHiram ọdaam mọ aTaya arom ni dom omuulan aḍighi ạghiomonaan Devid; ọdi ạsighe ni rạsaga ạghiomonaan Devid kụ ạḅaram bụkaam ạmaka rꞌawe dị ọmaar ọsighe asighiigh kụ ọloghom otu mọ ọghi ọlogh otu ọdaam mọ.

¹² Kụ iḍighi kụ aDevid aloghoma ni mọ Ọmoogh-we phọ kụ ạmeremi bọ nyịno oḍighi ọdaam Ịzirel, ḅịle kẹn ọdi raḍighi ni ịdi eelhe phọ kẹki risigh loor esi awe phọ ọdi.

¹³ ADevid rọḍua bọ Hẹbron rogheel Jeruselem, bịn ọdi ạḅile ạmoogh bụnon ịgaanyeen, ạḅile aphinogh bụnon ạnmariir bịn kụ ạmoogh bụnon ạnmuny rꞌạnmanyaan.

¹⁴ Bụen kụ ạnmuny dị ọmaranaan nyọdi ẹpe Jeruselem: aSamua, aSobab, aNetan, ạSolomon,

¹⁵ Ibhar, Elisua, aNefeg, ạJafia,

¹⁶ Elisama, Ẹliada, rꞌElifelet.

Moogulemi weye aFilistia phọ

¹⁷ Ụghaaph ni ọḅeni weye aFilistia phọ mọ moḍighi Devid ọdaam Ịzirel, kụ awe phọ ạbidi onyeene ọghi osiph ọdi. Mem dị aDevid ạnaghan bọ ịphen phọ, ọdi ạghi ni esi dị ọmaar oghoony kụ ạrol.

¹⁸ Awe aFilistia phọ ọghi osi Eḍiiny aRefaim kụ ọrologhu.

¹⁹ Kụ aDevid apuru Ọmoogh-we phọ mọ, “Mị ụki ni uzuom ẹgham we aFilistia phọ ḍụghum? Nạ kụngo ni ịmi ọkpar opu ḍụghum?” Kụ Ọmoogh-we phọ ạphagharanaan mọ, “Ii, kịa ni. Mị kạngo ni nyịna ọkpar opu phọ.”

²⁰ Kụ aDevid azuom bịdi ẹpe Baal Perazim kụ ạkpar apu bịdi. Kụ ọdi ạḅem mọ, “Ọmoogh-we phọ maḅoorogh atoḅologhi esomanan ạmi ẹpomoghian phọ ạmi dịadi umooph mụum.” Kụ iḍighi kụ moghol esi phọ ịpa phọ mọ aBaal Perazim.

²¹ Mem mọ awe aFilistia phọ rosumughu bọ, bịdi ụwile yogh ni ịkaaneen ạrumugh phọ ạbidi, kụ aDevid rꞌawe phọ ọdi ọghi ọsighiogh.

²² Pọ kụ amem dị awe aFilistia phọ oḅula ẹpe eḍiiny phọ aRefaim kụ ọḅile ọrol.

²³ Kụ aDevid ạḅile apuru Ọmoogh-we phọ, kụ ạphagharanaan kụ ạḅem mọ, “Kạ́ki. Googo akiton ọman ạbidi kụ ạghi azuom ẹpe etuman bọ iworoworo ireeny abalsam mọ.

²⁴ Mem dị nạ ạnaghan ḍịgum awe dị rogiriph erelhe ẹpe ạnyu ireeny phọ, pọ kịa azuom loor esi dị mị kạpurom ni atelhe aḍiemi ghan ọghi oogulemi awe ẹgham mọ aFilistia phọ.”

²⁵ ADevid aḍighi ni ịpe Ọmoogh-we phọ ạto bọ, kụ ọdi arue ni aphorogh aḅulemi weye aFilistia phọ emiigh ẹpe Geba kụ ẹghi esi Gezer.