2 Sạmuel 4 - Ạḍinya Iigbia

Moghiigh Isboset

¹ Mem dị Isboset ọony phọ ạSol ạnaghan bọ mọ moghiigh Ạbner ẹpe Hẹbron, aruugu asiph ni, ḅịle kẹn oomo awe phọ Ịzirel ukpereghaan ni.

² Isboset ạmoogh ni ịyal awe ịtooghi dị oḍiemiom ghan weye ibum, aBaana rꞌaRekab, ạnmuny ạRimon ẹpe Beerot ẹpe eelhe eghun phọ ạBenjamin. (Ogbiom Beerot phọ mọ ạpakiri ạBenjamin.

³ Ọkaraghi awe phọ orugh ghan bọ mosumughu okeel ẹpe Gitaim, kụ odi ghan ẹpe phọ kꞌagee-pọ.)

⁴ Ọnon ọlo kꞌạSol, ọony ạJonatan dị oghol mọ ạMefiboset; ọdi ạman oogh ạsia mem mọ oghiigh bọ Sọl rꞌạJonatan. Mem mọ ọghaaph ịlo aḍuugh phọ ạbidi ạḍua bọ Jẹzreel aru, oobia phọ ọdi ạsighe ni nyọdi asomanam; kụ ọlo loor oboom oogborion ọdi atebeeny ni ọony phọ, bịn ọony phọ aḍigh ẹgha.

⁵ ARekab rꞌaBaana unyeene ni ọghi ẹpe otu phọ Isboset, kụ bịdi ọghi osi mem ootaany, mem dị ọdi rapooghian.

⁶ Ạnir phọ ạrol bọ sịphe eghuugh phọ ạson ghan ịbiakpa phọ, aloor medugh bịn rạnaani, bịn aRekab rꞌaBaana oḍighi lẹeph oḍigh.

⁷ Bịdi roḍigh ologhi bịn onyeene ẹpe osoph phọ Isboset bịn oghiigh nyọdi dị ọdi rạnaani. Kụ bịdi osoph ẹmhu phọ ọpham omitenom kụ orelhiom oomo phọ aḍughul phọ ẹpe eḍiiny phọ ạJodan.

⁸ Bịdi ọsighe ẹmhu phọ ẹphen phọ ọngo Devid ọdaam mọ ẹpe Hẹbron kụ ọḅeni nyọdi mọ, “Pọrono ẹmhu phọ Isboset, ọony ẹpomoghian phọ ạna Sọl, ọpo ạwa ghan bọ reten oghiigh ạna. Rodon phọ Ọmoogh-we phọ mạngo ọgel ọdaam mọ mọ aḍighi aḅulemian Sọl rꞌẹemara ẹemara phọ ọdi.”

⁹ Kụ aDevid ạphagharanaan bịdi mọ, “Mị akunya rꞌỌmoogh-we phọ ọpo odi ghan bọ bịn, ọpo mụphel bọ ịmi esi oomo ariisi ịkaraph.

¹⁰ Otelhedom mọ ọpo aru bọ ụteeny ịmi ẹpe Zịklag kụ ụḅeni ịmi ịlo aḍuugh phọ ạSol agbiom ghan mọ ọno ạsighe ooḅi ọghaaph kụ aru.

¹¹ Kụ kẹtol ika mem dị ạbuo ạsipioghom mọ ọghi oghiigh oye aruukuan phọ kꞌọdi ạnyu ẹmina oye phọ? Mị kiḅulemian inyina ịduon nyina eghiigh bọ nyọdi, ḅịle kẹn kigbuurogh inyina ạsighe sịen ade phọ!”

¹² ADevid ạto ni ạngo kụ awe ẹgham mọ ọdi oghiigh Rekab rꞌaBaana kụ oogbo rạghaagh rꞌaruwol phọ ạbidi, kụ ọsighe ọkereri esi otumeniom ọodu phọ ạHebron. Kụ bịdi ọsighe ẹmhu phọ Isboset oḍi sịphe oḍi phọ Ạbner ẹpe Hẹbron.