2 Sạmuel 23 - Ạḍinya Iigbia

Ikpo ọnhu dị aDevid ạghaaph akureriom

¹ ADevid ọony phọ ạJesi kụ oye phọ Ẹnaan ẹbughe bọ, ọpo Ẹnaan phọ ạJekob ẹsaḅar bọ mọ aḍighi ọdaam mọ kụ adoghoḍi ịma ạsuor ạngo Ịzirel. Ịphen kụ ikpo ọnhu aDevid dị esugha ọman:

² Uwaloor Ọmoogh-we phọ ạkaaph ụḅeni ịmi, ọghaaph phọ ọdi odi ni sịphe ịidoronhu ạmi.

³ Ẹnaan phọ Ịzirel mẹḅem ọpelia phọ Ịzirel ụḅeni ịmi: “Ọdaam mọ ọpo ạdaam bọ iiḅi ịiruen, dị ạnaghanan Ẹnaan kụ ạdaam,

⁴ ạkigh erumuḍio dị rẹmu ḍịroor aḍio lọ ọotu úlho, erumuḍio dị reḍighi ghan ịdi ạroogho kạnmana mem lọ ọlophia ạsoroph.”

⁵ Ịduon kụ ịdi Ẹnaan kẹseph ẹemara ẹemara ạmi, loor esi dị ọdi maghiran ịyo kꞌagee-pọ rꞌạmi ịyo dị kótue oogbonyon, oguan dị kótue onme. Ịpe kụ oomo ịdi mị rạwa; ịpe kụ ọkpar opu phọ ạmi, kụ Ẹnaan keḍighi ni emitiom.

⁶ Kụ ọlo awe aruru ọkigh iitoor dị moroḅologhi; kụ oye ólho dị kạḅoghom bịdi rꞌoopho ạraghaagh.

⁷ Nạ ạmoogh oḍighinom okuron mụghumo ọsoph; koguom nịan oomo ạbidi.

Awe ẹgham aDevid dị ọkar oḍia

⁸ Ịphen kụ asiḍien awe ẹgham aDevid dị ọkar aḍia: ọḅel phọ Jọseb-Bạsebet ọlo ẹpe Takemon. Ọdi kụ oḍiemiom “Ịraar phọ”. Ọdi ạpham ọsoph ọdi kụ eenan rꞌọphaanyadi awe kụ ạze oomo phọ ạbidi eniin erugh ẹgham.

⁹ Ọdi amuneniom ịyal sịphe ịraar abugbogh phọ Ẹliazar ọony phọ aDodo ọlo ọto Aho. Eniin aḍio ọdi rꞌaDevid ozuom ẹgham weye aFilistia dị mookpomoghan. Awe Ịzirel oḅula ọman,

¹⁰ kụ ọlo ọdi ạmeera ni eenan rꞌawe aFilistia phọ tụtu ạḍighaagh phọ ọdi ẹkpamian bịn ítue mun ị́bile elhool ẹgham mọ ọdi. Ọmoogh-we phọ ạmoogh ni oboom ọkpar opu ḍio phọ ạḍiphe phọ. Ẹgham mọ remuneen, kụ awe Ịzirel oruughi sịphe Ẹliezar ạrol bọ kụ ọkporion yogh ibura ẹgham ạbuphe momuughu bọ.

¹¹ Ọdi amuneniom ịraar esi ịraardi abugbogh phọ aSama ọony Agee, ẹpe Harar. Awe aFilistia phọ ụghi ookpomoghan ẹpe Lehi, esi ozo ẹkiḍi. Awe Ịzirel ọtuan weye aFilistia phọ osumughu.

¹² Kụ ọlo aSama ạmeera ni sịphe ozo phọ eenan, kụ ạze weye aFilistia phọ. Ọmoogh-we phọ ạmoogh ni oboom ọkpar opu ḍio phọ ạḍiphe phọ.

¹³ Mem dị mẹkpul mem ibugha, ịraar awe esi “Ịraardi phọ” ụghi ni osi sịphe epogh aḍighiigh phọ Ạdulam, sịphe aDevid ạrol bọ, mem dị bụo aFilistia phọ odoghoḍi rugbogo ẹpe eḍiiny phọ aRefaim.

¹⁴ Mem mọ ọpo phọ aDevid ạrol ạnyu eegbolom dị ọsighe rạraar ẹgham oghoonyom, ḅịle kẹn aḍiniin aḍita awe aFilistia mọghi oḍigh Bẹtilihem.

¹⁵ Inyaam ologhi otu resiph Devid kụ ạḅem, “Ḅẹlee mọ oye katue ni ụngo ịmi mụum ọphughol dị oḍu sịphe aghuḍia phọ ọpo odi bọ sịphe ọnhu-aḍibuo ạBetilihem!”

¹⁶ Ịraar abugbogh awe ẹgham ọphaar igbo arugbogo ẹgham awe aFilistia phọ oḍu mụum sịphe aghuḍia phọ kụ ọsighe oruomonaan Devid. Kụ ọlo ọdi ómeera ọphughol; kpạripe ghụn ọdi ạsighe kụ azu ạphighironom ẹkia ạngo Ọmoogh-we phọ

¹⁷ kụ ạḅem, “Ọmoogh-we, mị kátue ạpughol mụum mọ ạmuen! Kẹkigh mụdi mị rạpughol ịḅaal awe phọ ạbuen phọ ọsighe bọ ghuḍum mọ ạbidi ọwa ọlogh esi ịiḅaghami.” Kụ ọdi ómeera ọ́phughol. Ịpe kụ iiḍighi arephelegbe dị ịraar abugbogh awe ẹgham mọ oḍighi.

¹⁸ Abisai, umor aJoab (onhiin phọ ạbidi ughol mọ aZeruya) kụ aḍighi oḍiemiom “Ịraardi phọ.” Ọdi ạpham ọsoph ọdi kụ eenan ịraar okuron awe kụ ạze bịdi, kụ amitiom ḍien sịphe ogbo “Ịraardi phọ.”

¹⁹ Ọdi kụ aghuan apu ḍụghum sịphe “Ịraardi phọ” kụ aḍighi oḍiemiom ạbidi, kụ ọlo ọdi óoleeny “Ịraar Abugbogh phọ.”

²⁰ ABenaya ọony ạJehoyada ọlo ẹpe Kạbzeel aḍighi ni ọnon ogbogh oye ẹgham; ọdi aḍighi ni ịbadi iiḍighi arephelegbe, ạḅile ạziom ịyal arephelegbe ạMoab. Eniin aḍio dị ibikpo ẹghar, ọdi ạghi ni bịn asoor ooni bịn aghiigh nạm-dịka.

²¹ Ọdi kẹn aghiigh ni oniin oye ọlo Ijipt, oye dị ạbugh kụ aphoph kꞌẹpe ạnyu kụ ạpham ọsoph. ABenaya ạpham ẹḅam bịn kụ azuom oye phọ elephiri, aziton ọsoph phọ ḍịghaagh oye ọlo Ijipt phọ kụ aghiighom oye phọ.

²² Ịphen phọ kụ iiḍighi arephelegbe phọ aBenaya, ọpo aḍighi bọ oniin esi “Ịraardi Abugbogh phọ.”

²³ Ọdi ạkar ri amitiom ḍien sịphe igbo phọ ạbidi, kụ ọlo ọdi óoleeny “Ịraar Abugbogh phọ.” ADevid ạsighe bịdi aḍiemiom weye ẹgham mọ ạbuphe okori ghan bọ nyọdi.

^24-39 Ạbueri phọ ịsiphe “Ịraardi phọ” uḍighi: Ạsahel, umor aJoab Elhanan ọony aDodo ọlo ạBetilihem ASama rꞌElika ạbuo aHarod AHelez ọlo ạPelet Ira ọony Ikes ọlo aTekoa Abiezer ọlo Anatot AMebunai ọlo aHusa AZalmon ọlo Aho AMaharai ọlo aNetofa ẠHeleb ọony aBaana ọlo aNetofa Itay ọony phọ aRibai ọlo aGibia ẹpe ạBenjamin ABenaya ọlo aPiraton AHidai ọlo ighool aGaas Abi-Ạlbon ọlo Araba Azmavet ọlo aBahurim Eliaba ọlo aSaalbon Ạnmuny phọ aJasen ẠJonatan ASama ọlo aHarar Ahiam ọony aSarar ọlo aHarar Elifelet ọony Ahusbai ọlo aMaaka Ẹliam ọony Ahitofel ọlo aGilo AHezro ọlo ạKarmel APaarai ọlo Arab Igal ọony aNetan ọlo aZoba ABani ọlo ạGad AZelek ọlo Amon ANaharai ọlo aBeerot; ọpamam ạreenema aJoab Ira rꞌạGareb ạbuo aJatir AYuraya ọlo ạHitait phọ. Awe ẹgham mọ ọkar bọ omitiom ḍien uḍighi ịraardi rꞌoḍual awe.