2 Sạmuel 22 - Ạḍinya Iigbia

Ạḍuor ọkpar-opu phọ aDevid

¹ Mem dị Ọmoogh-we phọ ạphel bọ Devid ḍịghaagh ạSol rꞌạbueri phọ ẹpomoghian phọ ọdi, aDevid ạmoor ḍụor phọ ạḍien aboom Ọmoogh-we phọ.

² Ọmoogh-we phọ kụ oghoony ạpeleeny phọ ạmi; ọdi kụ oghoony iikpe phọ ạmi.

³ Ẹnaan ạmi, kụ ọsuaram ạmi, ḅịle esi ọdi mị akpetenaan ni. Ọdi ughoonyom ịmi ịdipho ọsuaram; ọdi rabe ghan kụngo ịmi ẹereegh. Ọdi kụ ọpelia ạmi; ọdi uuko ịmi ạḅile ụphel ịmi esi ạraagham.

⁴ Mị ạmagh Ọmoogh-we phọ, kụ ọdi ụphel ịmi ḍịghaagh ẹpomoghian phọ ạmi. Iboom Ọmoogh-we phọ!

⁵ Oologh aḍuugh ukoom ni ịmi; oologh oogulemi uzuom ni ịmi.

⁶ Ịiḅaghami aḍuugh ikoom ni ịmi, ḅịle oḍi phọ ụkpaminaan ịmi ḍiphil.

⁷ Igbo ịiḅaghami phọ ạmi mị ạmagh Ọmoogh-we phọ; Mị ạlom Ẹnaan phọ ạmi ọlhoghonaan ạḍighaagh; Sịphe otu iigbia phọ ọdi ọdi ạnaghan ẹḍogh ạmi; ọdi ạnaghan emoghi ịlom ọlhoghonaan ạḍighaagh phọ ạmi.

⁸ Ẹpe kụ esi dị ade phọ ephiigha; ịpe ophighi bọ okuaḍio phọ ephiigha loor esi dị Ẹnaan rẹkagh ologhi.

⁹ Ạmughi amiteghu izon ọdi, anem ạnian rꞌiiḅu dị rẹda emiteghu ọnhu ọdi.

¹⁰ Ọdi ạphanyi okuaḍio phọ aru asoor, rꞌoḍiil ọotu eeḍian aruwol phọ ọdi.

¹¹ Ọdi ạpheeph egina amem ạnyu ọokpaany aghuḍuul phọ ọdi ẹmoogh bọ raphaaph phọ; ọdi aḍigh ạnyu araphaaph ookuugh.

¹² Ọdi aakpereghian loor ọdi ufiri; ogbigiri ọotu, dị ạmuum amuza, akoom nyọdi.

¹³ Iiḅu dị reemor ẹḍua emite rẹmepheghian sịphe egbodo phọ ọdi.

¹⁴ Kụ Ọmoogh-we phọ amoogha ẹpe okuaḍio phọ, kụ ẹḍogh Ọkaraghi Egbogh Ẹnaan phọ emite.

¹⁵ Ọdi ạraḅal ịkpina phọ ọdi ạwalalami ẹpomoghian phọ ọdi; aphoroghom nem ạnian ọomaany kụ bịdi oghilighu osumughu.

¹⁶ Ude otu-ḅualhe phọ aganana, kụ ịpe ophighi bọ de phọ emite ạnyu mem mọ ọpo Ọmoogh-we phọ ạḅaam bọ ẹpomoghian phọ ọdi kụ amooghaam bịdi rꞌọghagh ologhi.

¹⁷ Ọmoogh-we phọ ạḍua kꞌạke aru kụ ụpham ịmi; ọdi uḍur ịmi amitiom esi aḍigher.

¹⁸ Ọdi ụtagharan ịmi ḍịghaagh egbogh ẹpomoghian phọ ạmi rꞌesi oomo ạbuphe ụlogh bọ ịmi ḍien phọ — bịdi ụkpar ri ọphughan esi ạmi.

¹⁹ Mem dị mị ạrol esi ịiḅaghami, bịdi uzuom ịmi ẹgham; kụ ọlo Ọmoogh-we phọ uuko ni ịmi.

²⁰ Ọdi uphune ịmi esi ịiḅaghami; ọdi ụphel ịmi loor esi dị mị ụḅeeraan ni nyọdi.

²¹ Ọmoogh-we phọ uunmo ịmi ruunmo loor esi dị mị raḍighi ghan ịpe eḍighi bọ elhiom; ọdi rụseph ghan ịmi loor esi dị mị ụ́piom.

²² Mị aako ni ologh Ọmoogh-we phọ; mị ụ́ḅitonaan Ẹnaan phọ ạmi.

²³ Mị maako ni oomo iilogh phọ ọdi; mị ụ́ḅaar ẹmhu esi ịtooghi phọ ọdi.

²⁴ Ọdi alegheri ni mọ mị ụ́piom, mọ mị ạpamaghan ni loor phọ ạmi esi oḍighi ịkaraph

²⁵ Kụ iḍighi kụ ọdi rụngo ghan bọ ịmi ruunmo loor esi dị mị raḍighi ghan ịpe eḍighi bọ elhiom, loor esi dị ọdi alegheri ni mọ mị ụ́piom.

²⁶ Ọmoogh-we, nạ rábi ghan weye lọ omeeraam nyịna agey, nạ ạkar ạnighe si ạbuphe oseleman bọ.

²⁷ Nạ aseleman ni esi ạbuphe oseleman bọ, kụ ọlo bụkaraph awe nạ ráḍigh ghan rịghiri.

²⁸ Nạ rạpel ghan bụlo osooromi loor, kụ ọlo nạ rasooromi ghan ni bụlo ophophe loor.

²⁹ Nạ, Ọmoogh-we, kụ ạḍiḅaal ạmi; nạ maphorogh ufiri ạmi.

³⁰ Nạ ụngo ịmi ịnyaam ozuom ẹgham ẹpomoghian ạmi rꞌịikpo opel iikpe phọ ạbidi.

³¹ Ẹnaan phọ ẹphen — iiḍighi phọ ọdi eseleman ni, amabi ólho ghan ikpo ọnhu ọdi! Ọdi ạkigh ọsuaram esi oomo ạbuphe rọwa bọ mọ ọdi aako bụno.

³² Ọmoogh-we phọ bịn kụ Ẹnaan; Ẹnaan bịn kụ ọsuaram ayira.

³³ Ẹnaan phọ ẹphen kụ esi ịbooghian ạmi; ọdi aḍighi ịdi ooḅurom úlho eten phọ ạmi.

³⁴ Ọdi aḍighi ịdi aruwol ạmi emiigh ịdipho ịlo ọnuen, ọdi useere ịmi dọl ẹereegh ạnyu ạraaḅaraph phọ.

³⁵ Ọdi ụtughemi ịmi ịlo ẹgham, pịdi mị atue ạpam tọrotoro ạkumugh.

³⁶ Ọmoogh-we, nạ uuko ịmi ạḅile ụphel ịmi; ọloghonaan ạḍighaagh phọ ạna mụbughe ịmi.

³⁷ Nạ ómeera mọ awe ẹgham usiph ịmi, ḅịle kẹn mị kőmeel ghan.

³⁸ Mị raporogh ghan ẹpomoghian phọ ạmi kạkpar apu bịdi; mị rạ́meera ghan tụtu mị aagulemi bịdi;

³⁹ Mị rạgur ghan bịdi kaler, kụ bịdi rótue ghan mun koḅetenu; bịdi rọmina ghan koḅololo risigh ạmi.

⁴⁰ Nạ rụngo ghan ịmi ịnyaam eenom ẹgham rꞌọkpar opu ẹpomoghian phọ ạmi.

⁴¹ Nạ raporogh ghan ẹpomoghian phọ ạmi; mị raagulemi ghan bụphe ụlogh bọ ịmi ḍien phọ.

⁴² Bịdi rọwa ghan ọloghonaan ạḍighaagh, kụ ọlo oye kạ́pel bịdi; bịdi ọlo ọmagh Ọmoogh-we phọ, kụ ọlo ọdi kámeera.

⁴³ Mị ạgbe bịdi, kụ bịdi ọkigh ọoru; mị ạazeghi bịdi ịdipho ọogha lọ odi eten.

⁴⁴ Nạ ụphel ịmi ḍịghaagh awe phọ ọḅaar bọ esi ẹmhu phọ ạmi, ạḅile ạmeremi ịtooghi phọ ạmi ephogh bọ reelhe phọ; awe dị mị úlegheri kụ mị kụ ụtooghi rạngo.

⁴⁵ Aruuruen okpuḍian rụngo ghan ịmi; bịdi rópel ghan ịlo mị ạḅem.

⁴⁶ Asiloor ạbidi redugh ghan ḅịle kẹn ropiigha ghan kọḍuaghu riisi ịbooghian phọ ạbidi komiteghu.

⁴⁷ Ọmoogh-we phọ odi ni! Iboom ọpelia ạmi! Igbeelom ḍịbugh Ẹnaan Ịikpo phọ ọpo ụphel bọ ịmi!

⁴⁸ Ọdi ụngo ịmi ọkpar opu esi ẹpomoghian phọ ạmi; ọdi asooromi rạmha phọ eeḍian ạmi,

⁴⁹ ạḅile ụphel ịmi ḍịghaagh ẹpomoghian phọ ạmi. Ọmoogh-we, nạ ụngo ịmi ọkpar opu esi ẹpomoghian phọ ạmi, ạḅile uuko ịmi ḍịghaagh awe ẹpomoghian.

⁵⁰ Kụ iḍighi kụ mị raboom ni nyịna igbo areelhe phọ; mị ạmoor raboom nyịna.

⁵¹ Ẹnaan rẹngo ghan ogbogh ọkpar opu ọdaam mọ ọdi kꞌagee-pọ; ọdi aḍeenaan ẹphomoghian nyọpo ọdi mạsaḅar bọ, esi aDevid rꞌẹemara ẹemara phọ ọdi.