2 Sạmuel 21 - Ạḍinya Iigbia

Ọzeeghi oghiil phọ ạSol

¹ Mem mọ ọpo aDevid kụ ạda bọ, iboom ịgbakuro ịrol li dị ẹman ịraar ạsia. Kụ aDevid ạtuan ịduon phọ ạghi ḍipuru esi Ọmoogh-we phọ kụ Ọmoogh-we phọ ạḅem, “ẠSol rꞌeghunotu phọ ọdi kụ ụpiom, bịdi ọko enu; ọdi ạze weye ẹmha phọ ạGibion.”

² (Awe phọ ạGibion úḍighi weye Ịzirel; bịdi uḍighi eniin ẹbam ẹkpigh Ạmorait dị awe phọ Ịzirel oguanaan ọmaar ooko, kụ ọlo ạSol eenan ophiemi ạbidi loor esi dị ọdi ọ́wa mọ oye ạaḅaghami Ịzirel rꞌaJuda.)

³ Kụ iḍighi kụ aDevid aakpomoghi weye ạGibion kụ ạḅeni bịdi, “Mị kiḍighinaan inyina eeghe? Mị rạwa ọkpeeghi ịikpia ịkaraph phọ ịpe iḍighi bọ inyina pịdi nyina ẹseph weye Ọmoogh-we phọ.”

⁴ Bịdi ọphagharanaan, “Ọruonu phọ ayoor rꞌạSol ḅịle rꞌeghunotu phọ ọdi kótue ọsighe silva rꞌagol bịn ọpoomiom, ḅịle yoor ụ́wa mọ oghiigh oye ọlo Ịzirel.” ADevid apuru, “Kụ eeghe kụ ẹdi nyina rẹwa mọ mị uḍighinaan inyina?”

⁵ Bịdi ọphagharanaan, “ẠSol ạwa oogulemi ayoor, ọ́wa mọ rꞌoniin ọnyo ayoor asugha sịen Ịzirel.

⁶ Kụ iḍighi kụ sịghe oḍual alephiri ạnmuny sịphe oḍigh phọ ọdi ụngo iyoor, yoor kosin bịdi sịphe risigh Ọmoogh-we phọ ẹpe Gibia, ẹpe ẹmha phọ ạSol, ọdaam dị Ọmoogh-we phọ ạsaḅar.” “Mị kạḅogh ni bịdi ịngo inyina,” ọdaam mọ ạphagharanaan.

⁷ Kụ ọlo loor esi oguan iigbia phọ ọdi rꞌạJonatan mọmoogh bọ aDevid ạwile ni mọony phọ ạJonatan Mẹfiboset, ọony-oko phọ ạSol.

⁸ Kụ ọlo, ọdi ạsighe ni Amoni rꞌạMefiboset, ịyal phọ ạnmuny phọ aRizpa ọnyani Aya ạmaranaan bọ Sọl; ọdi ạsighe kẹn ni oogh ạnmuny dị ọnyani ạSol dị oghol mọ ạMerab ạmaranaan Ạdriel ọony aBazilai ọlo Mehola phọ.

⁹ ADevid ạḅogh bịdi ạngo weye phọ ạGibion, kụ bịdi ọghi osinogh bịdi sịphe eegbolom mọ sịphe risigh Ọmoogh-we phọ — kụ oomo oḍual phọ ạbidi umugh eniin phọ esi phọ. Amem mọ ọze bọ bịdi iḍighi mem dị aghozogh ramuneen, ḍio dị bịdi omiigh oogbo ịbiakpa abali.

¹⁰ Pọ kụ amem dị ọyooyo phọ ạsol Rizpa, ọnyani phọ Aya, ạsighe rukpe-ọto kụ ạzaam ạgalaga ọdi sịphe ạnyu aḍighiigh sịphe osereghi bọ ruzu ạnmuny phọ, kụ ọdi ạrol sịphe phọ kꞌemiighom amem ibugha tụtu ẹteeny unu. Mem ootaany ọdi aphorogh ghan ịnun mọ kị́ba ḍizu ạnmuny phọ, ḅịle mem aḍughul ọdi aphorogh ghan ịnam lọ rẹki ạanyi aḍizu phọ.

¹¹ Mem dị aDevid ạnaghan bọ ịphen aRizpa maḍighi bọ,

¹² ọdi ạghi ni ạsighe ịḅarara phọ ạSol rꞌịpe ọony phọ ọdi ạJonatan ḍịghaagh awe aJabes ẹpe Gịliad. (Bịdi ụghi omi sịphe egbogh erugh phọ ẹpe Bẹt Sạn, ẹpe awe aFilistia phọ ọkereri yogh bọ iḍim mọ ḍio phọ ạḍiphe bịdi oghiigh bọ Sọl sịphe eegbolom aGilboa.)

¹³ ADevid ạsighe ni ịḅarara phọ ạSol rꞌạJonatan, ạḅile aakpomoghi ịḅarara oḍual phọ awe phọ osinogh bọ,

¹⁴ kụ bịdi oḍi ịḅarara phọ ạSol rꞌạJonatan sịphe oḍi aKis ọde phọ ạSol ẹpe Zela ẹpe eelhe phọ ạBenjamin. Bịdi oḍighi oomo ịpe ọdaam mọ mạto bọ. Kụ ịphen phọ reten, kụ Ẹnaan ẹnaghanan ịiḅereghi phọ bịdi ọoḅereghinaan bọ ẹmha phọ.

Ạraagham dị eenan rꞌarephelegbe awe phọ aFilistia

¹⁵ Ẹnon ẹgham ịrol li igbo awe aFilistia rꞌỊzirel, kụ aDevid rꞌawe phọ odi ọghi eenan rꞌawe aFilistia phọ. Ọdi robe ghan eniin ẹgham mọ, aloor aDevid edugh.

¹⁶ Oniin ophelegbe dị oghol mọ Isbibenob dị ạpham ọsoph dị oḍighinom enaba dị ẹemor phọ rẹkiom ni ịraar rꞌegbem igbogh ịtoom ẹemor; ḅịle kẹn ọdi ạḅana emoom elhool ẹgham, kụ agbiighi ghan mọ ọno katue ni akiigh Devid.

¹⁷ Kụ ọlo Abisai ọony phọ aZeruya aru ạloghonaan ḍịghaagh Devid. Ọdi azuom ẹgham ophelegbe phọ kụ aghiigh nyọdi. Ẹpe kụ esi dị awe phọ aDevid ọkpooghiom nyọdi mọ ọdi aguanaan mọ, “Amem kị́tol mun dị ọdi kạdaph bịdi ạki ẹgham, nạ kụ oḍuom ologhi phọ Ịzirel. Yoor ụ́wa dị nạ aphe.”

¹⁸ Ịphen phọ reten kụ bịdi eeghi ẹnon ẹgham rꞌawe aFilistia phọ ẹpe Gob. Odi robe kụ aSibekai ọlo ẹpe Husa aghiigh oniin oye dị oghol mọ aSaf; oye phọ ọphon oniin ọnyo ạbuphe ọḍua bọ sịphe ọkuruḅaka arephelegbe phọ kụ omite.

¹⁹ Bịdi ọḅile eeghi ẹnon ẹgham rꞌawe aFilistia phọ ẹpe Gob, kụ Elhanan ọony aJair ọlo ạBetilihem aghiigh Gọlayat ọlo ạGat, dị ạpham ghan ọsoph dị ạman ni ḍigbe otu.

²⁰ Kụ ẹnon ẹgham ẹrol ẹpe Gạt, kụ oniin ophelegbe ạrol dị ạphomoghian elebiri. Ọdi ạmoogh bọ odiiny diiny ạsunugh rạghaagh phọ ḅịle odiiny diiny ạsunugh ruwol phọ ọdi.

²¹ Ọdi ạkaraghi ni kụ ạgilaam weye Ịzirel, kụ ạJonatan ọony umor aDevid aSama kụ aghiigh nyọdi.

²² Inya phọ ạbuen phọ kụ ạnmuny ạnmuny arephelegbe phọ ạGat, kụ aDevid rꞌawe phọ ọdi kụ ụze bịdi.