2 Sạmuel 20 - Ạḍinya Iigbia

ASiba atuphe

¹ Oniin oye ạrol li ẹpe Gịlgal dị ạroozo phọ ị́moogh ịyaar oḍighinom kụ ughol mọ aSiba ọony aBikri ọlo eghun phọ ạBenjamin. Ọdi aphula ni ọkuodu kụ ạlho ạmagh, “ADevid kạ́da mun! Yira kọ́daph mun nyọdi! Weye Ịzirel, ụgua ogheleghu kꞌayira!”

² Kụ iḍighi kụ awe phọ Ịzirel ọwile Devid bịn ọdaph Siba, kụ ọlo awe phọ aJuda ụnaghanan ni ọḅile ọdaph Devid emiigh ẹpe Jọdan phọ tụtu osi Jeruselem.

³ Mem dị aDevid asi bọ ogiga ọdaam mọ ẹpe Jeruselem, ọdi ạsighe ni ḍioph igaanyaan ạnmariir phọ ọdi aseere bọ mọ ophogh ghan otu phọ, kụ ọdi ạsighe bịdi ạkasiom esi kụ aseere weye mọ ophogh ghan bịdi. Ọdi ạngo ghan ni bịdi tọrotoro ịyaar lọ rẹeḅaghami bịdi, kụ ọlo ọdi ọ́rolan mun esi ọnyo ạbidi. Ughoony esi bịn kụ odoghoḍi bịdi kụ ọrol ghan oomo aghuḍum mọ ạbidi ịdipho arukpukele ạnmariir.

⁴ Kụ ọdaam mọ ạḅeni Amasa mọ, “Mạgh weye phọ aJuda aakpomoghi kụ ạpham bịdi arumom sịen ọman iḍue.”

⁵ Amasa ạghi ọmagh ạbidi, bịn óḅula mem mọ ọpo ọdaam mọ ạngo bọ nyọdi.

⁶ Kụ ọdaam mọ ạḅeni Abisai, “ASiba kụngo ni iyira ịiḅaghami dị kepu ni ịpe Ạbsalom. Sịghe weye phọ ạmi aphoroghom nyọdi, ịdipho ílho pọ ọdi kạki aḍigh rạmha phọ ịpe ọkuami bọ ọlogh bịn ukpetenaan iyira.”

⁷ Kụ iḍighi kụ awe phọ aJoab, awe ẹgham mọ ạbuphe rokori ghan bọ ọdaam mọ, ḅịle rꞌoomo ạbueri phọ awe ẹgham mọ ọḍua Jeruselem ọdaph Abisai ophorogh Siba.

⁸ Mem dị bịdi ọteeny bọ sịphe ḍiboom aḍighiigh phọ edi bọ ẹpe Gịbion, Amasa aazuanan bịdi. AJoab aanmenan ịlo ẹgham, ạḅana elhool ẹgham. Ịdipho ọdi arelhe bọ ramite bịn elhool ẹgham mọ emeel.

⁹ AJoab ạḅeni Amasa, “Ẹtol ika, ọyaghiri ạmi?” bịn ọdi ạsighe ḍịghaagh elhiom ọdi ạphamam ọleem ọdi mụdi rạwa ọkpun ọdi.

¹⁰ Amasa ógona loor esi elhool ẹgham mọ ẹpe aJoab ạphamam bọ ḍịeri phọ ạḍighaagh phọ, bịn aJoab agim ọkuruḅaka ọdi, bịn ịlha phọ ọdi emiteghu emeleghu sịphe ude phọ. Oye phọ amugh ni mem mem mọ, aJoab ọ́ḅile mun ógim. Kụ aJoab rꞌumor ọdi Abisai onyeene ọghi ọwa aSiba.

¹¹ Oniin oye aJoab ạmeera ni atuman ḍizu phọ Amasa kụ ạlho amitiom kụ ạḅem, “Tọrotoro oye lọ aḍighan Joab rꞌaDevid pọ ạdaph Joab.”

¹² Aḍizu phọ Amasa imeel sịphe ogbo eten phọ ịḅaal emuza oomo phọ ọdi. Oye phọ aJoab ạmiin ni mọ tọrotoro oye lọ asi sịphe phọ ạmeera, kụ iḍighi kụ ọdi ạghogh ḍizu phọ ạsighe sịphe eten phọ ạlogh ẹpe eḍum kụ ạsighe ukpe azuom.

¹³ Rọsighe bọ ḍizu phọ sịphe eten phọ, bịn tọrotoro oye ạdaph Joab ọghi ophorogh aSiba.

¹⁴ ASiba aten ni rere oomo arughunughun phọ Ịzirel kụ ạghi asi ẹmha phọ Ebel Bẹt Maaka, bịn oomo awe ọto phọ aBikri ookpomoghan bịn ọdaph nyọdi oḍigh ẹmha phọ.

¹⁵ Awe phọ aJoab ọnaghan mọ aSiba odi ẹpe phọ, kụ bịdi ọghi okpobiom ẹmha phọ. Bịdi ọsighe ọogha ọḅiirom riisi ọḍua ọdagh iikpe ẹmha phọ, ḅịle kẹn bịdi omiigh oguph ẹpe eeḍian iikpe phọ pịdi emeel.

¹⁶ Oniin ạnir dị ạsu ologhi ạrol li sịphe ẹmha phọ kụ ọdi ạlho apeleghi iikpe phọ, “Ịnaghan! Ịḅeni Joab mọ tue sịen; mị rạwa ọḅaanaan ọdi!”

¹⁷ AJoab aten ạghi, kụ ạnir phọ apuru, “Nạ aJoab phọ ni?” “Ii, mị ọdi phọ ni!” ọdi ạphagharanaan. “Ụnaghanan ịmi, oye phọ,” ạnir phọ ạḅem. “Mị rạnaghan ni,” oye phọ ạḅem.

¹⁸ Kụ ạnir phọ ạḅem, “Mem dị mebia ni iboom dị meten, awe ụḅem ghan mọ, ‘Ịki ẹmoogh ọphagharanaan phọ anyina ẹpe ẹmha phọ Ebel’ — kụ ịduon phọ kụ ịdi bịdi oḍighi ghan ni.

¹⁹ Ẹmha phọ ayoor egbogh ẹmha ni, eḍighi eniin ẹmha dị ẹepho edi. Eeghe kụ nạ rạwa bọ ophiemi ẹmha phọ ẹphen ẹsighe bọ dọl onhiin phọ sịen Ịzirel. Nạ ụtuan ika kụ rạwa bọ ọmin erua Ọmoogh-we phọ ịduon phọ?”

²⁰ “Eeye!” aJoab ạphagharanaan, “Mị kápiemi áagulemi ẹmha phọ!

²¹ Ịpe kụ kígbiighi phọ ayoor. Oniin oye dị oghol mọ aSiba ọony aBikri, ọlo ẹmha aroogbolom mọ Ifraim, atuphiom ẹgham Devid ọdaam mọ. Ịḅogh oniin phọ oye phọ ọphon ịngo iyoor bịn mị kạbile ni ẹmha phọ.” “Yoor kotoph ẹmhu phọ ọdi opeleghi iikpe phọ oruom nyịna,” ạnir phọ ạḅem.

²² Ẹpe kụ esi dị ạnir phọ ạghi ạteeny weye ẹmha phọ kụ ạḅeni ịpe ọdi magbiighi bọ, kụ bịdi osoph ẹmhu aSiba kụ oroph opeleghi iikpe ẹmha phọ ọghiomonaan Joab. Kụ ọdi aphula ọkuodu phọ ọḅeni awe phọ ọdi mọ ọwile ẹmha phọ, kụ bịdi oḅula. Kụ aJoab agheel ẹpe Jeruselem ạghi ạteeny ọdaam mọ.

Awe ịtooghi phọ aDevid

²³ AJoab kụ aḍiemiom ghan weye ẹgham Ịzirel; aBenaya ọony ạJehoyada kụ aḍiemiom ghan weye ẹgham mọ ạbuphe okori ghan bọ ọdaam mọ.

²⁴ Adoniram kụ oḍiemiom ạbuphe ọkpaariom ghan bọ weye phọ oḍighi oḍighi; ạJehosafat ọony Ahilud kụ ọgeeghia.

²⁵ ẠSeva kụ ọgeeghia ẹpe otu ọdaam mọ, ạZedok rꞌẠbayata uḍighi bụpinyon rịkia;

²⁶ ḅịle kẹn Ira ọlo ẹmha dị oghol mọ aJair aḍighi aani kẹn oniin oyil ạrikia aDevid.