2 Sạmuel 19 - Ạḍinya Iigbia

AJoab ạḅaam Devid

¹ Ụghaaph ni ọḅeni Joab mọ aDevid ọdaam mọ ramoghinaan kạḅile ạtoonaan Ạbsalom.

² Bịn iboh ọkpar opu phọ ekitonaan eḍighi ọto esi oomo awe ẹgham mọ aDevid ḍio phọ ạḍiphe phọ, loor esi dị bịdi ụnaghan ni mọ ọdaam mọ ramoghinaan ni ọony phọ ọdi.

³ Bịdi ọghi osi ẹmha phọ bịn oḍighi lẹeph oḍiku, ịdipho awe ẹgham dị umugholoor rasiph loor esi dị bịdi okiilaan ẹgham kụ rosuma.

⁴ Ọdaam mọ apukian risigh ọdi kụ amoghi amitiom, “Ọony phọ ạmi! Ọony phọ ạmi Ạbsalom! Ạbsalom, ọony phọ ạmi!”

⁵ Kụ aJoab ạghi ẹpe otu ọdaam mọ kụ ạḅeni nyọdi, “Rodon nạ masiphe umugholoor weye phọ ạna — weye phọ ạbuphe ọphel bọ ghuḍum mọ ạna rꞌaghuḍum ạnmuny rꞌạnmanyaan phọ ạna, rꞌạnmariir ḅịle rꞌịgaanyeen ạnmariir phọ ạna.

⁶ Nạ akel bụphe ọphomoghian bọ nyịna kụ nạ akuraam bụphe ọlogh bọ nyịna ḍien phọ! Nạ maḍighi amitiom mọ awe ịtooghi phọ ạna rꞌạbueri phọ awe phọ ạna ụ́man ịyaar esi ạna. Mị ạmiin ni mọ ologhi ạna mụḅaal li iboom eḍighi ịyaar dị Ạbsalom kụ odi rodon kụ oomo ayoor omuughu.

⁷ Kụ iḍighi nyịidipho ḅetenu ạghi ạsighe oodugha ọnhu ạghaaph ạadereghiom butelhedom mọ ạna. Mị akunya rꞌaḍien Ọmoogh-we phọ mọ eḍighi ịyaar dị nạ ụ́ki, pọ rꞌoniin oye kásugha sịen rꞌạna kụ egbi ọḅaal iḍue. Kụ ịphen phọ keḍighi ni igbogh ịiḅaghami dị kꞌekulha nạ kọ̋miin ghan.”

⁸ Kụ ọdaam mọ aḅetenu, kụ ạghi ạrol ude atuman ọnhu-aḍibuo ẹmha phọ. Awe phọ ọdi ụnaghan ni mọ ọdi odi ẹpe phọ, kụ bịdi ọghi okoom nyọdi. Mem mọ ạmuen phọ oomo awe phọ Ịzirel mosumughu, uwo kꞌọdi magheel kꞌọdi.

ADevid amiigh origheel aJeruselem

⁹ Oomo eelhe phọ awe phọ rọtuanagh ghan ọruonu bịn, “ADevid ọdaam mọ kụ ụphel bọ iyira ḍịghaagh ẹpomoghian phọ ayira,” oniin ạḅeni ghan nyoniin. “Ọdi kụ ụphel bọ iyira ḍịghaagh awe aFilistia phọ, kụ nyịidipho ọdi mạtuan Ạbsalom asuma ạḍua ẹmha phọ.

¹⁰ Yira uzu eghoony Ạbsalom mọ aḍighi ọolha-ẹmha ayira, kụ ọlo moghiigh nyọdi erugh ẹgham. Kụ eeghe kụ iḍighi kụ oye ọ́ghi bọ ọsighe Devid ọdaam mọ oḅulemi?”

¹¹ Ịinaghan ịphen awe phọ Ịzirel rọkaaph bọ ịghi ni ẹteeny Devid ọdaam mọ. Kụ ọdi arom bụpinyon rịkia phọ Zẹdok rꞌẠbayata mọ opuru buḍiemiom mọ aJuda, “Eeghe kụ iḍighi kụ nyina kụ kesugha bọ ọman ọsighe ọdaam mọ oḅulemi ịsiphe otu phọ ọdi?

¹² Nyina asiya ạmi, ọkaraghi ịḅaal rꞌiphulupul ạmi, eeghe kụ iḍighi kụ nyina kụ kesugha bọ ọman ọsighe ạmi oḅulemi?”

¹³ ADevid ạḅile kẹn ni ạḅeni bịdi mọ ọḅeni Amasa, “Nạ ọnyo asiya ạmi. Emiigh nyịidipho kụ ẹghiom risigh mị maḍighi nyịna uwo ẹmhu awe ẹgham mọ, nạ mạsighe ạgada phọ aJoab. Ẹnaan ịgur ịmi eghiigh eḍighi ịyaar dị mị ịduon phọ úḍighi!”

¹⁴ Ikpo ọnhu phọ aDevid ịḅeeraan ni oomo phọ awe phọ aJuda kụ bịdi orom mọ ọḅeni nyọdi mọ ọdi ạpham oomo awe ịtooghi phọ ọdi arighelom.

¹⁵ Ọdi aten ratigheel kụ ọdaam mọ azuan weye aJuda sịphe ọphiiny phọ ạJodan, dị moru osi Gịlgal ororori ọdi ọḅeenye ọphiiny phọ.

¹⁶ Eniin phọ amem mọ, aSimei ọony phọ aGera ọlo kꞌạBenjamin ẹpe Bahurim aagborion ni ạghi asi ẹpe ạJodan phọ ọteeny aDevid ọdaam mọ.

¹⁷ Ọdi ạphamam oniin ọonir awe eghun phọ ạBenjamin. Ḅịle kẹn aZiba otelhedom eghunotu phọ ạSol, aru kẹn ni ạphamam ḍioph rꞌoogh ạnmuny ọdi rꞌịyaldi abutelhedom kụ bịdi kụ ụphur osi ẹpe Jọdan phọ kụ ọdaam mọ agbi osi.

¹⁸ Bịdi ụḅeeny ni ọphiiny phọ ororori ọdaam mọ ọḅeenye ḅịle rꞌoḍighinaan ạtorotoro ịyaar lọ ọdaam mọ rạwa. Ịdipho ọdaam mọ raakolobian bọ ọḅeeny phọ, aSimei ameel sịphe risigh ọdaam mọ

ADevid aḍeenaan ọnma ighirigiir Simei

¹⁹ kụ ạḅem, “Nạ Ogbogh Ọdaam mọ, seseeny, sạr ạwile ịkaraph phọ mị aḍighi bọ ḍio phọ ạḍiphe nạ ạḍua bọ Jeruselem. Ịmi kúḅulemian ḅịle kạ́atughian mun.

²⁰ Mị alegheri ni, oye phọ, mọ mị maḍighi ịkaraph, kụ ẹphen kụ ịyaar phọ mị kụ aḍighi bọ ọḅel oye dị ạḍua ẹpe ạramha ephunom mọ aru ọteeny ạna Ogbogh Ọdaam mọ rodon.”

²¹ Abisai ọony phọ aZeruya ạghaaph amitiom, “ASimei ạkpe oghiigh loor esi dị ọdi aatuuny oye dị Ọmoogh-we phọ kụ ạsaḅar aḍighi ọdaam mọ.”

²² Kụ ọlo aDevid ạḅeni Abisai rꞌumor phọ ọdi Joab, “Ạnhian kụ apuru bọ nyịna ọghaaph ịlo ologhi ạna? Nyina rẹwa ọngo ạmi ịiḅaghami ḍụghum? Mị kụ ọdaam mọ Ịzirel nyịidipho, kụ oye ọlo Ịzirel ólho dị kokiigh rodon.”

²³ Kụ ọdi ạḅeni Simei, “Mị rạḅeni ghan nyịna mọ oye nyịna rághiigh.”

ADevid aḍeenaan ọnma ighirigiir Mẹfiboset

²⁴ Pọ kụ amem dị ạMefiboset ọnyanyani phọ ạSol aru asi ọteeny ọdaam mọ. Ọdi ruwol ọdi óotola, ọleem ọdi ọ́boora, ḅịle rukpe ọdi óotol emiigh kꞌaḍio phọ ọdaam mọ ạḍua bọ Jeruselem tụtu ẹteeny sịen ọdi ratigheel bọ rꞌọkpar opu phọ.

²⁵ Mem dị ạMefiboset ạḍua bọ Jeruselem asi ọteeny ọdaam mọ, ọdaam mọ ạḅeni nyọdi, “Mẹfiboset, nạ ịmi ụ́daph ụ́ḍua. Eeghe kụ iḍighi bọ?”

²⁶ Kụ ọdi ạphagharanaan, “Ịduon nạ alegheri bọ ni, nạ Ogbogh Ọdaam mọ, mị aḍighi ẹkugha dị rátelhe ghan. Mị ụḅeni otelhedom mọ ạmi mọ ọdi aakolobian ẹnam adool phọ ạmi pịdi mị aḍigh ạdaph nyịna, kụ ọlo ọdi uukeleghi ni ịmi.

²⁷ Ọdi ụgbaam ịmi ọkpe risigh ạna Ogbogh Ọdaam mọ, kụ ọlo nạ ạkigh ọokpaany kꞌạke. Kụ iḍighi, ḍighi ịlo nạ aphogh mọ eḍighi elhiom esi ạna.

²⁸ Oomo eghunotu ọde phọ ạmi ọkpe ni dị Ogbogh Ọdaam mọ kạze, kụ ọlo nạ ụngo ịmi ịikpo mọ mị ule ghan eḍien sịphe kꞌạna. Mị ụ́moogh riliom ọḅile ọlom ọloghonaan ạḍighaagh ḍịghaagh ạna Ogbogh Ọdaam mọ.”

²⁹ Kụ ọdaam mọ ạphagharanaan, “Kạ́kaaph mun ịyaar. Mị magbiighi ạḅem mọ nạ rꞌaZiba kụ kodian ephua phọ ạSol.”

³⁰ “AZiba ạsighe oomo phọ ịdi,” ạMefiboset ạphagharanaan, “Mịgbaanyan ni ịmi ịduon nạ ogbogh ọdaam mọ kụ marigheel bọ ni rꞌẹepho.”

ADevid aḍeenaan ọnma ighirigiir Bazilai

³¹ ABazilai ọlo ạGiliad ạḍua ni kẹn ẹpe Rogelim aru ororori ọdaam mọ ọḅeenye ạJodan phọ.

³² ABazilai aḍighi ni ọkar okumoor oye dị mạman ọphaanyadi ạsia. Ọdi aḍighi ni ogbogh oye dị ạngo ghan ọdaam mọ eḍien mem mọ ọpo ọdi ạrol bọ ẹpe Mahanaim.

³³ Kụ ọdaam mọ ạḅeni nyọdi, “Tue ụdaph ịmi ọghi Jeruselem, mị kạmaar ri ạpham nyịna.”

³⁴ Kụ ọlo aBazilai ạphagharanaan, “Mị ụ́moogh mun ghuḍum dị ạdoony; eeghe kụ iḍighi kụ mịna kạdaph bọ nyịna ogbogh ọdaam mọ ạki Jeruselem?

³⁵ Mị mạman bọ ọphaanyadi ạsia kụ ịyaar reḍugh ghan mun esi ạmi. Mị úlegheri mun ḍịdugh ịyaar lọ mị rale ḅịle rạpughol, ḅịle kẹn mị rạ́naghan mun rọḍogh ạroko-ạsuor phọ. Esi ika kụ ẹdi nyịidipho otelhedom mọ ạna kạ́sighe ịiḅaghami bịn awiririom nyịna ọde-otu phọ ạmi ọdaam mọ?

³⁶ Mị ụ́kpianaan ọngo aruunmo dị eleeny ịduon. Kụ iḍighi kụ mị kạdaph nyịna ẹphurukpu ạḅeenye Jọdan phọ.

³⁷ Kụ mị aḅula ologhi otu kụ amugh atuman riiḍi ọde rꞌonhiin ạmi. Pọrono ọony ạmi Kimam, ọdi kụ kakumu nyịna; sịghe nyọdi ạghimom, nạ Ogbogh Ọdaam mọ, aḍighinaan nyọdi ịlo nạ ạatughian mọ ẹnighe ni.”

³⁸ Kụ ọdaam mọ ạphagharanaan, “Mị kạpam ni nyọdi ạkimom kụ mị aḍighinaan nyọdi tọrotoro ịlo nạ rạwa. Ḅịle kẹn mị kaḍighinaan ni nyọdi tọrotoro ịlo nạ ạlom.”

³⁹ Kụ aDevid rꞌoomo awe phọ ọdi ọḅeeny Jọdan phọ. Ọdi ạkpun Bazilai kụ ạngo nyọdi ḍịseph, kụ aBazilai agheel ẹpe kꞌọdi.

AJuda rꞌỊzirel ọogbanaghian ọnhu esi ọdaam mọ

⁴⁰ Mem dị ọdaam mọ mạḅeeny bọ, oomo awe aJuda rꞌoolemi-odi awe Ịzirel kụ ororori bọ ọḅeenye, ọdi ạghi ni asi Gịlgal, kụ aKimam ạdaph ni nyọdi.

⁴¹ Pọ kụ amem dị oomo awe phọ Ịzirel ọghi ọteeny ọdaam mọ kụ ọḅeni nyọdi mọ, “Nạ Ogbogh Ọdaam, eeghe kụ iḍighi kụ abumor phọ ayoor awe phọ aJuda ọotughian bọ mọ bụno kọmoogh ni riliom ọsighe ạna ọḍuanam ḅịle rꞌororori ạna rꞌeghunotu phọ ạna, ḅịle rꞌawe phọ ạna ọḅeenye ạJodan phọ?”

⁴² Awe phọ aJuda ọphagharanaan, “Yoor uḍighi ịduon phọ loor esi dị ọdaam mọ oniin ọnyo ayoor. Kụ eeghe kụ ịphen phọ repin bọ iloghi phọ anyina? Ọdi ọ́kpe ikpoki eḍien ayoor ḅịle iyoor ịyaar ọ́ngo.”

⁴³ Kụ awe phọ Ịzirel ọphagharanaan, “Yoor ọmoogh Devid ọdaam mọ ḍioph amem ipu inyina, ghạlamo ịduon ọdi aḍighi bọ ni oniin ọnyo anyina. Eeghe kụ iḍighi kụ nyina iphogh bọ iyoor esooromi? Kébula mọ yoor kụ ụphur bọ ọghaaph ịlo ọghi ọsighe ọdaam mọ oḅulemi ẹphen!” Kụ ọghaaph ọlo awe aJuda kụ alom apu ọlo awe Ịzirel.